Mboe 34:5-18

⁵Zin wal ta so tiur matan pini mi tipase pini, nako lelen ambai kat mi menmeen zin. Pa zin ko tiur sorok matan pini na som.

⁶Nio ti, muŋgu pataŋana ikam yo ma leŋ zaala sa som, tana aŋtaŋroro Yooba. Mi ni ileŋ suŋŋana tio mi itatke yo pa pataŋana tio ta boozomen.

⁷Zin wal ta timototo Yooba mi tileŋleŋ la kalŋaana na, aŋela kini imenderkalkaala zin. Mi ni itatkewe zin pa pataŋana kizin.

⁸Yooba ni ambaiŋana kat. Ituyom kotoombo zaala kini to kere. Zin wal ta so tipase pini be iwe ur pizin mi imenderkaala zin, na ni ikampewe zin ma lelen ambai kat.

⁹O niom wal kini potomŋoyom, komototo i mi keleŋleŋ la kalŋaana. Pa zin wal ta tikamam ta kembei na, irao tiru zalan pa kosa sa som.

¹⁰Laion popoŋan na, buzur mburanŋan ma tilip. Tamen lwoono pakan petel zin mi tiru zalan pa kan buzur. Tamen zin wal ta tikam kinkiini be tiute Yooba mi timbot kolouŋana pini na, zin ko tirao pa koroŋ ambaimbaiŋan ta boozomen.

¹¹Niom naŋgaŋ tio, kamar mi keleŋ sua tio ti. Nio ko aŋpaute yom pa zaala tabe komoto Yooba mi kembeeze pini i.

¹²Parei, niom leleyom be kombot ambai su toono ma molo raama leleyom ambai men?

¹³Na komboro kat kwoyom. Kokena sua sananŋana sa, som pakaamŋana sa ipet pa kwoyom.

¹⁴Mi kipizil ndemeyom pa mbulu sananŋana, mi kakam mbulu ambaiŋana men. Kakam kinkiini pa mbulu luumuŋana. Kuru zaala be niomŋan tomtom ta boozomen kaparlup yom ma kombot ambai.

¹⁵Wal ndeeŋeŋan na, Yooba mataana pizin. Mi ni ileŋleŋ tiŋiizi kizin.

¹⁶Tamen wal sananŋan na, ni iurur koi pizin mi ipiŋgisŋgis mataana pizin. Mi ko ipambiriizi zin ma timap kat. Kaimer tomtom ko matan iŋgal zin mini som.

¹⁷Sombe wal ndeeŋeŋan titaŋroro Yooba be iuulu zin, na ni ko ileŋ zin, mi itatke zin pa pataŋana kizin ta boozomen.

¹⁸Zin wal ta tikototo zitun mi tiyamaana zitun kembei tirao som na, Yooba imbotmbot kolouŋana pizin. Mi wal ta so lelen ipata, na ni iuluulu zin ma lelen ambai mini.