12Parei, niom leleyom be kombot ambai su toono ma molo raama leleyom ambai men?
13Na komboro kat kwoyom. Kokena sua sananŋana sa, som pakaamŋana sa ipet pa kwoyom.
14Mi kipizil ndemeyom pa mbulu sananŋana, mi kakam mbulu ambaiŋana men. Kakam kinkiini pa mbulu luumuŋana. Kuru zaala be niomŋan tomtom ta boozomen kaparlup yom ma kombot ambai.
15Wal ndeeŋeŋan na, Yooba mataana pizin. Mi ni ileŋleŋ tiŋiizi kizin.
16Tamen wal sananŋan na, ni iurur koi pizin mi ipiŋgisŋgis mataana pizin. Mi ko ipambiriizi zin ma timap kat. Kaimer tomtom ko matan iŋgal zin mini som.
17Sombe wal ndeeŋeŋan titaŋroro Yooba be iuulu zin, na ni ko ileŋ zin, mi itatke zin pa pataŋana kizin ta boozomen.
18Zin wal ta tikototo zitun mi tiyamaana zitun kembei tirao som na, Yooba imbotmbot kolouŋana pizin. Mi wal ta so lelen ipata, na ni iuluulu zin ma lelen ambai mini.
19Pataŋana boozomen ko indeeŋe tomtom ndeeŋeŋana. Tamen Yooba ko itatke i pa pataŋana kini ta munŋaana men.
20Mi ko mataana pini ma irao tiroono tasa ipol som.
21Mbulu sananŋana kizin wal zorzooroŋan ko ipun zitun ma timetmeete. Mi wal ta so tiur koi pizin wal ndeeŋeŋan, nako tikam kadoono sananŋana ma ipokot mbulu kizin.