Mboe 135:7-17

⁷Ni ta ikamam ma miiri tieene indoundou ma izze pa lele uunu. Mi iŋgoŋgo yaŋ, mi ikamam ma lolo iwenweene zin koroŋ. Mi ikakaaga kataama pa ruumu kini ta miiri imbotmbot lela na, be iyooto mi iloondo ma irao toono.

⁸Muŋgu, ni ikasgeege zin pikin muŋgamuŋga mi mbili muŋgamuŋga kizin Aikuptu ma timap lup.

⁹Mi ikam mos mi uraata bibip isu Aikuptu, bekena iseeze king kizin ziŋan mbesooŋo kini ta boozomen matan.

¹⁰Ni ta ikasgeege zin karkari boozomen, mi ipun zin king mburanŋan ma timetmeete.

¹¹Ipun Sihon ta king kizin Amor na, Og ta king ki Basan na, mi king ta boozomen ki toono Kanaan.

¹²Mi ikam toono kizin pa wal kini Israel ma iwe len be timbotmbot pa, mi iseeŋge iseeŋge ma ila.

¹³O Yooba, zom biibi ko imbotmbot ma alok! Tomtom ko tipepeebe len kelŋan, mi matan iŋgalŋgal uraata ku mi tizzoyaryaara urum, mi iseeŋge iseeŋge ma ila.

¹⁴Pa Yooba imendernder pa wal kini mi iurur kadoono pa kan koi bizin. Mi leleene izanzaana pa zin mbesooŋo kini.

¹⁵Zin merere kizin karkari na, tomtom tiurpewe zin pa silba mi gol. Merere ta kembei na, tomtom naman muriini men.

¹⁶Zin kwon mi matan. Tamen tirao be tiso sua som, mi tire lele som.

¹⁷Zin talŋan. Mi tirao be tileŋ sua som. Mi miiri sa iwedet pa kwon som. Paso zin matan yaryaaraŋan som.