Mboe 132:12-18

¹²Mi sombe lutum bizin matan iŋgalŋgal sua tio mbukŋana mi titoto kat ka tutu, tona lutun bizin tomini kadoono ko tikam murim, mi timbutultul su murim peeze kana, mi iseeŋge iseeŋge ma ila. Tutu tana, nio ituŋ ko aŋpaute zin pa.”

¹³Yooba iroogo kar Sion, mi ikam ma iwe lene kek. Lele tana, ta ni leleene be imbotmbot pa.

¹⁴Tana iso ta kembei: “Lele ti ko iwe muriŋ be aŋbotmbot pa ma alok. Nio leleŋ be muriŋ peeze kana imbotmbot lele ta ti.”

¹⁵Nio ko aŋpombol zin Sion kan, mi aŋkampe zin ma tirao kat pa koroŋ ta boozomen. Tana zin wal ki Sion ta petel zin ma timbot ŋoobo na, nio ko aŋputu zin ma kopon bok.

¹⁶Mi zin patoronŋana kan ki Sion na, nio ko aŋpombolmbol zin pa uraata kizin, mi zin ko tizzwe zaala tabe aŋkamke zin tomtom pa i. Mi zin wal ki Sion ta tiurur lelen pio mi titoto mbulu tio na, kalŋan ko izalla mi tiyotyooto raama menmeen zin.

¹⁷Popoŋana ki Dabit ta iwe king mi imbotmbot Sion na, nio ko aŋkam i ma zaana mi mburaana iwe biibi. King ta ituŋ aŋroogi mi aŋuri pa uraata na, nio ko aŋpombolmbol peeze kini, mi iseeŋge iseeŋge ma ila. Peeze kini ko kembei lam ta iyaryaara totomen.

¹⁸Mi nio ko aŋkoto ka koi bizin ma timbotmbot raama kan miaŋ. Mi mogar ta imbotmbot sala king uteene, nako imilmil ma iŋgeeze kat.