Mboe 119:126-153

¹²⁶O Yooba, iŋgi tomtom timbel zooroŋana pa sua ta nu kam piam. Tana maŋga mi kam mbulu sa pizin!

¹²⁷Gol ta iŋgeeze kat, ina koroŋ zaanaŋana mi wal boozomen lelen pa. Tamen nio na, leleŋ pa tutu ku ma ilip pa gol.

¹²⁸Tana sua boozomen ta nu ur, ta ikamam peeze pio pa pai tio. Mi aŋurur koi pa zaala boozomen ta iyaryaaru yo be aŋpizil ndemeŋ pu.

¹²⁹Tutu ta ur pa wal ku, ina ndabokŋana kat. Tana motoŋ iŋgalŋgal mi aŋtoto.

¹³⁰Sua ku, sombe tipeeze, to iur mat pizin tomtom. Mi zin wal tau len ŋgar biibi som na, sua ku iwe zaala pizin be tikam len ŋgar ambaiŋana.

¹³¹Nio leleŋ pa tutu ku ilip, kembei tomtom ta miri i pa ka yok.

¹³²Mar lae tio, mi muŋai yo mi kampe yo. Pa ina mbulu ta kamam pa zin mbesooŋo ku tau tiurur lelen pu mi tipakurkur zom.

¹³³Pazal yo pa sua ku. Naso aŋpa pai tio ma ambai men. Kokena mbulu sananŋana sa ikam peeze pio.

¹³⁴Zin wal ta tiseseeze motoŋ mi tikamam be tikoto yo na, tatke yo la naman. Naso aŋto sua boozomen ta nu ur na.

¹³⁵O Yooba, nio mbesooŋo ku. Swe itum ramaki kampeŋana ku pio, mi ur mat pio. Mi paute yo pa tutu ku ta tibeede pataaŋa kek na.

¹³⁶Nio aŋbel tiŋiizi ma motoŋ luluunu izzu. Pa sua ta nu kam piam na, tomtom tito som.

¹³⁷Yooba, nu ndeeŋeŋom. Mi tutu ku ta kembena. Indeŋdeeŋe men.

¹³⁸Tutu boozomen ta nu ur pa wal ku, ina indeŋdeeŋe men. Mi tutu tana imbol ma imbotmbot. Itortooro som. Tana aŋro aŋpase pa mi aŋurla kat.

¹³⁹Nio leleŋ pa sua ku ilip mi aŋkamam kaisiigi pa. Tamen koŋ koi bizin na, tikam ŋgar pa sua ku risa som. Tabe tikam ma leleŋ ibayou kat.

¹⁴⁰Niam amre kek. Sua ku, ina ŋonoono men. Tana irao amdemeere mi ampase pa kat. Mi nio ta mbesooŋo ku na, leleŋ pa ilip.

¹⁴¹Ŋonoono, nio tomtom sorokŋoŋ mi tomtom tirepilpiili yo. Tamen sua boozomen ta nu ur na, motoŋ mbeleele som.

¹⁴²Mbulu ku ndeeŋeŋana ko imbotmbot ma alok. Mi sua ta nu kam piam, ina ŋonoono men. Tana irao aŋdemeere mi aŋpase pa kat.

¹⁴³Iŋgi pataŋana boozomen isalakaala yo, mi leleŋ ipata kat. Tamen tutu ku, ta ikam ma leleŋ ambai kat.

¹⁴⁴Tutu ta nu ur pa wal ku, ina indeŋdeeŋe men, mi imbotmbot ta kembei ma alok. Uulu yo be aŋkam kat ŋgar pa. Naso aŋbot ambai.

¹⁴⁵O Yooba, nio leleŋ imap ma aŋtaŋroro u. Leŋ suŋŋana tio mi uulu yo. Mi nio ko motoŋ iŋgalŋgal be aŋto tutu ku ta tibeede pataaŋa kek na.

¹⁴⁶Iŋgi tiŋiizi tio ima ku. Tatke yo pa pataŋana tio ti. Mi nio ko motoŋ iŋgalŋgal zaala ta nu ur pa wal ku na, mi aŋtoto ka tutu.

¹⁴⁷Zoŋ ise zen, mi aŋmaŋga mi aŋtaŋroro u be uulu yo. Pa nio aŋpase pa sua ku mbukŋana, mi aŋzza be iur ŋonoono.

¹⁴⁸Mi mbeŋ tomini na, aŋpamatmaata mi aŋkamam ŋgar pa sua ku.

¹⁴⁹O Yooba, nu toto sua ku mbukŋana mi urur lelem pa wal ku. Tana leŋ suŋŋana tio ti. To tutu ku ndeeŋeŋana, mi uulu yo ma aŋbot ambai mini.

¹⁵⁰Iŋgi wal sananŋan timar tigarau yo be tipasaana yo. Mbulu kizin ipa ndel kat pa sua ta nu kam piam na.

¹⁵¹Tamen Yooba, nu mbotmbot kolouŋana pio. Mi tutu ku ta boozomen, ina ŋonoono men. Tana irao aŋdemeere mi aŋpase pa kat.

¹⁵²Zaala ta nu ur pa wal ku na, muŋgu kat nio aŋkilaala ka tutu ta kembei: Ina nu ur be imbotmbot ma alok.

¹⁵³Yooba, re yo pa pataŋana tio taiŋgi, mi tatke yo pa. Pa sua ta nu kam piam na, motoŋ mbeleele som.