1Ma kab kadbul me puruy’nag e pi tolang ko prist nge pi’in pi’ilal rok piyu Israel e n’en ni ir e nge togopluw ngak Jesus nge yag nli’ ngem’.
2Miyad yin’ e chen ngak miyad fek ngar pi’ed ngak Pilate, ni ir e am.
3Fa’ani guy Judas, ni ir e yagnag Jesus, ni kan duwgiliy ni ngan li’ Jesus ngem’ me ri kolngan’ me fulweg fa guyey yang i salpiy ni silber ngak e pi tolang ko prist nge pi’in pi’ilal,
4ni be ga’ar, “Kug denen, ya kug yagnag be’ nib mo’on ndariy ban’en nike kirebnag ni ngan li’ ngem’!” Miyad fulweg ngak ni lungurad, “Dariy rogon e tin ngomad, ya gur e bay rogon ngom!”
5Me yin’ Judas fapi salpiy ni wasey nga but’ u lan e Tempel me pagrad; ma aram me yan nge yan i og nga opol.
6Me feng e pi tolang ko prist fapi salpiy me lungurad, “Re salpiy ney e salpiy ni puluwon e racha’ ma ba togopluw ko Motochiyel rodad ni ngan tay nga fithik’ e salpiy ni yibe kunuy u Tempel.”
7Ma nap’an ni ta’reb lungurad riy miyad pi’ fare salpiy ngar chuw’iyed bangi binaw ntafen be’ nma ma’ th’ib ni ngu’un k’eyag girdi’en yugu boch e nam riy.
8Aram fan ni kan tunguy fithingan e gi binaw nem nike lunguy “Binuwan e racha’” ke mada’ ko bin daba’ e rran.
9Ma aram meb i m’ug nib riyul’ e tin ni yog profet Jeremiah ni ga’ar, “Kar feked fa guyey yang i salpiy ni wasey ni silber ni aram urngin e salpiy ni ta’reban’ e girdi’ nu Israel ngay ni ngan pi’ ni puluwon,
10miyad pi’ ngar chuw’iyed bangi binaw ngay ntafen be’ nma ma’ th’ib, ni bod rogon ni yog Somol ngog.”
11Me sak’iy Jesus u p’eowchen fare am, me fith fare am Jesus ni ga’ar, “Mog, i gur fare pilung rok piyu Israel fa danga’?” Me fulweg Jesus ni ga’ar, “Errogon ni kamog.”
12Machane de yog ban’en nib togopluw ko tin keyog e pi tolang ko prist nge pi’in pi’ilal nib togopluw ngak.
13Ma aram me ga’ar Pilate ngak, “Mog, damur rung’ag urngin e pin’en ni yad be yog nib togopluw ngom?”
14Machane me par Jesus nde fulweg ta’ab bug fapi thin, ma aram me par fare am ni kari balyangan’.
15Gubin yay ni yira madnomnag e re madnom nem ni Paluk’af mma pag e re am nem reb e kalbus nike wenignag e girdi’ ni yo’or ni ngan pag.
16Ma ngiyal’nem e bay reb e kalbus ni be’ ni go’ yima nang murung’agen, ni Jesus Barabbas fithingan.
17Ere fa’ani mu’ulung fapi girdi’ ni yo’or, me fithrad Pilate ni ga’ar, “Mini’ ko gali cha’ney e gimed ba’adag ni nggu pag, i Jesus Barabbas fe Jesus ni kan pining Kristus ngak?”
18Ya kari nang ni kar pi’ed Jesus ngak ni bochan e ke awan’rad ngak.
19Ma nap’an nike par Pilate nga tagil’ u lan fare senggil ni tafen e pufthin, me pi’ e bpin rok e thin nge yib ngak ni ga’ar, “Mpag e re mo’on nir ndawori bucheg ban’en, ndariy ban’en ni ngam rin’ ngak, ya fowngan e ri gu gafgow u malik’ay ni bochan.”
20Me towasor e pi tolang ko prist nge pi’in pi’ilal ngak fapi girdi’ ni aram urngirad ni ngar weniggad ngak Pilate nge mang Barabbas e pag me mang Jesus e nli’ ngem’.
21Me fithrad fare am ni ga’ar, “Mini’ ko gali cha’ney e gimed ba’adag ni nggu pag?” Miyad fulweg ni lungurad, “I Barabbas!”
22Me fithrad Pilate ni ga’ar, “Ere mang e nggu rin’ ngak Jesus ni kan pining Kristus ngak?” Miyad fulweg ni yad gubin ni lungurad, “Mu richibiy ko kuruth!”
23Machane me fith Pilate ni ga’ar, “Be mang oloboch e ke ngongliy nrib kireb?” Ma aram miyad tabab i tolulnag nike musmus ga’ngin lamrad ni be lungurad, “Mu richibiy ko kuruth!”
24Ma fa’ani guy Pilate ndakuriy fan ni ngki fithrad ya richey min cham, me fek e ran nge lukuy pa’ ngay u p’eowchen fapi girdi’ ni aram urngirad me ga’ar, “Yam’ ni nge tay e re mo’on ney e dariy bochu’uw murung’agen ngog! Ya gimed e kam dugliyed!”
25Me fulweg fapi girdi’ ni aram urngirad ni lungurad, “Gechig ni bay yib ni bochan e yam’ ni nge tay e bay yib nga dakenmad nge nga daken pifakmad!”
26Me pag Pilate Barabbas; me pi’ Jesus ngan toy nge mu’ me pi’ ni ngan richibiy ko kuruth.
27Me fek e salthaw rok Pilate Jesus ngalan e naun ko am, me mu’ulung fa raba’ i salthaw ngak.
28Miyad luf e mad rok miyad yin’ reb e mad nga daken nib n’uw nib row ra’en.
29Ma aram miyad fek yu pa’ i ban’en ni bay rachangalen ngar te’eliyaw niged ngay, miyad tay ba ley i rouy ngalan e ba’ ni mat’aw i pa’; miyad ragbug u p’eowchen ngu’ur moninggad ngak, me lungurad, “Nge n’uw nap’an ni par e pilung rok piyu Israel!”
30Miyad thuw nga daken, miyad fek fare ley i rouy ngar toyed nga lolugen.
31Ma nap’an nra mu’gad i moningnag, miyad luf fare mad nib n’uw u daken miyad yin’ e mad rok nga daken, miyad fek i yan ni ngranod rrichibiyed ko kuruth.
32Ma nap’an ni yad be yan nga wuru’ e binaw miyad mada’nag be’ nib mo’on ni be’ u Cyrene ni Simon fithingan, miyad gelnag e thin ngak nge fek e kuruth rok Jesus.
33Marbad ngabangi n’en nike lunguy yu Golgotha, ni fan e re bugithin nem e fa gin’en ni “Tagil’ e Lo’.”
34Miyad pi’ e wayin ngak u rom, ni kan athkuy e flay ngay nib mooy. Machane fa’ani ri’ ma de unum.
35Miyad richibiy ko fare kuruth miyad f’oth e mad rok rorad, ni yad be girngiy e pow ni nge duwgiliy e bin nge fanay bagayad.
36Ma fa’anra mu’gad miyad par u rom nga but’ ngu’ur matanagiyed.
37Miyad tay bangi ban’en ni kan yoloy nga daken e kuruth rok u daken lolugen ngalang ni bay e thin riy ni kanog ni ir e ba togopluw ngak ni ga’ar, “Ireray Jesus, ni fare pilung rok piyu Israel.”
38Miyad richibiy l’agruw i moro’ro’ ntacham nga l’agruw i kuruth, ni bagayow nga ba’ ni mat’aw rok Jesus ma bagayow nga ba’ ni gilay’ rok.
39Ma pi’in yad be yib ngu’u ranod ko gin’em e ur chichingeged lolugrad mu urogned e thin nib kireb ngak Jesus ni be lungurad,
40“I gur faram e mfiney ni ngam buthug e Tempel ngam toy u lan dalip e rran nge m’ay! Fa’anra Fak Got gur, me ere mu guy rogon nge siy ku mum’! Ma ga luw nga but’ ko re kuruth nir!”
41Ma ku aram rogon e moning ni tay e pi tolang ko prist nge pi tamchib ko Motochiyel nge pi’in pi’ilal ngak ni be lungurad,
42“Ke ayuweg e pogofan rok boch e girdi’, ma dabiyag ni nge ayuweg e birok’ e pogofan! Gathi ir fare pilung nu Israel? Fa’anra luw ko re kuruth nem nga but’ e chiney, mra michan’dad ngak!
43Ya ba pagan’ ngak Got ma be yog ni ir Fak Got. Ere mu son gad ngad guyed ko ra yib Got i ayuweg e chiney fa!”
44Me mus ngak fa gali moro’ro’ ntacham ni fa’an nni unegrow ngak ngan kuruth nagrad ni ku aram rogon e thin nib kireb nrognew ngak.
45Ma nap’an ni misiw’ me neap’ u daken fare nam ni polo’, me par ni aram rogon ndalip e awa.
46Ma gonap’an e ke dalip e kolok me non Jesus nri ba ga’ laman ni be ga’ar, “ Eli, Eli, lema sabachthani?” ni fan e pi thin ney e be ga’ar, “Got rog, Got rog, mangfan ni kam n’igeg?”
47Ma boch fapi girdi’ ni yad be sak’iy u rom e rrung’aged laman me lungurad, “Be pining Elijah!”
48Ka chingiyal’ nem me mil bagayad nge yan i fek bangi worrum nge lthag nga fithik’ e wayin nib sobut’ puluwon me tay nga taban ba ley i rouy, me pi’ ngak ni be guy rogon ni nge unum.
49Machane me ga’ar fapi cha’ ni yad, “Mu son gad ngad guyed ko ra yib Elijah ni nge ayuweg fa!”
50Miki non Jesus bayay ni ba ga’ laman, me aw e fan rok.
51Ma aram e fa gi mad ni kan tining ngalang u Tempel e mogchoth u lang nga but’, nge par nike l’agruw yang. Me rur e but’, me pil e war,
52me mab malangen e yam’, ma bo’or e girdi’ rok Got ni karm’ad nra fosgad ko yam’.
53Miyad chuw u lan e low rorad; ma nga tomuren nike fos Jesus ko yam’ miyad yan ngalan fare Binaw nib Thothup, ni aram e gin ni guyrad e girdi’ riy ni pire’.
54Ma en nib tolang ko salthaw nge salthaw ni yad bay rok ni yad be matanagiy Jesus e ra guyed e re durru’ nem nge urngin ban’en ni cheag ngay nge m’ug, miyad rus me lungurad, “Riyul’ ni ir Fak Got!”
55Ma immoy bogi ppin ni pire’, ni yad be changar u orel ngaram nra uned ngak Jesus u Galile ngu’ur ayuweged.
56Mu fithik’rad e immoy Maria Magdalene riy, nge Maria ni chitiningin James nge Josef, nge chitiningin fa gali pagel ni fak Zebede.
57Fa’ani neap’ me taw be’ nib mo’on u Arimathea nib pire’ ban’en rok, ni Josef fithingan, ni ku ir reb pi gachalpen Jesus.
58Me yan i ning downgin Jesus ngak Pilate. Me yog Pilate ni ngan pi’ downgin Jesus ngak Josef.
59Ma aram me fek Josef Jesus, nge bichibichiy bangi mad nib wechwech ngak ni kab be’ech,
60me yan i tay ngalan e birok’ e low ndawori n’uw nap’an ni ker nga fithik’ e war u taban e rech. Me lulubiy baraba’ i malang ni ba ga’ nge ning nga langan fare low me yan.
61Ma ke par Maria Magdalene nge yugu reb e Maria u rom nga but’ ni yow be sap ko fare low ko yam’.
62Me reb e rran riy ni aram e rofen ni yib nga tomuren e lal fen e maruwel, me yan e pi tolang ko prist nge pi Farise ngak Pilate
63me lungurad, “Keb ngan’mad nnap’an ni kabfos fare talifith l’ugun me ga’ar, ‘Ra gaman dalip e rran mi ni fasegeg ko yam’.’
64Ere mog nga ni yan ni matnagiy e low rok nge yan i mada’ ko chirofen ni nge man e dalip e rran ngay, nge dabiyag ni yan pi gachalpen ra iringed ma rogned ko girdi’ ni kan faseg ko yam’. Ya bug ney e thin nde riyul’ e kab gel e kireb riy ko fa bug nem ni yog ko som’on.”
65Me ga’ar Pilate ngorad, “Mfeked girdi’en e matnag; ngam marod mmatnagiyed e re low nem ni bfel’ rogon.”
66Mranod ra ted e hang ko fare gaf i malang ni kan ning ko fare low, ni aram e dariy be’ ni nge bing, miyad tay girdi’en e matnag ni nge matnagiy.
