1Yesu nuzu nanya kutii nlira a tunna ncin me; non katwa me da kitime ida dursoghe makeke kutii nlira.
2A kpana aworo nani, na anung din yenju ile imone vat ba? “Idin bellu minu kidegen, na litala lirum duku longo na ima sunu kitene ilong sa ukpiliwu ba.”
3Na aso likup in Zaitun, non katwa me da kitime likot iworo. “Belle nari, ile imone mayitu nishiyari? Iyaghari ma dursu udakfe nin nimalin inyii?
4Yesu kpana aworo nani. “Yenjen umon wa rusuzu minu.
5Bara anit gbardang ma dak nin lissa ning; ima woru 'myari Kristi', tutung ima rusuzu anit gbardang.
6Ima lanzu ubeleng likum nin liru likum; yenjen ayi mine wa fita, bara ilenge imone ma dak gbas a na imaline nsa da ba.
7Bara nmon min ma fitu nivira nin mon min, tigo kitene ntong tigo. Ima su akpon nin hirtizu nmyen niti niti.
8Vat ninlenge imone ma yitu ucizunu nniuwari.
9Tutung ima nin nakpu minu nacara na lenge na ima timinu ineo, imolsu minu. Uyii vat ma nari minu bara blissa ning.
10Anit gbardang ma tirzu inin lessu ati.
11Anan bellu liru nin nuu Kutelle kinu ma fitu gbardang, iba wultunu anit gbardang.
12Bara na likara linanzang bati gbardang usu nanit ma ti camcam.
13Vat ulenge na a tere kibinayi nanya neu udu imalne, amere ma se utucu.
14Ule uliru umang nbelleng kipin tigo Kutelle ima su unin nyii vat unan so kutuf kunba timin timin vat; imaline ma nin dak.
15Nene asa iyene adadu an fiu, alenge na Daniel unan liru nin nuu Kutelle wa bellin, yissin nanya kiti kilau, (na unan bellu niyerte yinnin).
16na alenge na idi in Yahudiya cum udu akup.
17na ame ulenge na kitene kutii kitene nwa tolu adi yiru imonmong nan nya kilare ba.
18ame ulenge na adi kunen na awa kpilin kilari ada yiru ugudun ba.
19Ushe nawani alenge na ima yitu nin naburi, nin nalenge na ima yitunmazunun nono kubi kone!
20Sun nlira na ucum mine waso nin kubi likus sa liri na Sabbat ba.
21Bara uniu ma yitu kang, umusun lenge na isa su unin ba tun ucizunu inyii udak kitimone, ana imakuru isu umusun nnin ba.
22Sasa na ima canu ayiri ane ba, na unit wase utucu ba; bara alenge na ina fere, inani ma canu ayiri ane.
23Asa umong woro minu, yeneng Kristi ule; sa a “Kristi uni” na iwa yinin ba.
24Anan kinuu nKristi nin nanan liru nin nuu Kutelle kinuu ma dak isu imon fiu izikiki gbardang, iwultun anit libau, umunu wang alenge na imal ferui nani.
25Yenen nbellin minu a kubi dutu sa udak
26Bara nani, iwa bellin minu, “yenen, Kristi di nanya kusho,” na iwa nuzu udue ba, iwan woro minu, adi nanya kutii limot, na iwa yinin ba.
27Nafo na umalzinu kiti asa unya kusari kitene udu kadas, nanere wang udak in Saun in Nit ma yitu.
28Kikanga na libi nonku kikanere agbulluk ma pitirnu ku.
29Kimal na leli ayiri nniuwe uwui ma siriu, na upui mani nkanang me ba, iyini ma dissu unuzu kitene kane, akara kitene kani ma zullunu kidowo.
30Udursu kulap ndak in Saun in Nit ma nuzu kanang kitene kani, vat tilem inyii ma su tiyom. Ima yenu Usaun Nnit din cinu nanya nawut kitene kani nin likara a ngogong midya.
31Ama nin tu nono kadura me nin liwui kulangtung kanan, inung manin pitirunghe anit alau me na sari anas vat kiti kirum, unuzu nlo ligang kitene kani udu loli liganghe.
32Sen uyinu nimoimon kiti kuca kupau. Asa ulang in nutuno tifa tipese, yinnon kussik nda susut.
33Nanere wang, asa iyene ile imone, yinnon nworu a daduru, adi susut nin kibulunghe.
34Kidegennere nbellin minu, na ko kuje ma katu ba, se ilenge imone nse ukulu vat.
35Kitene kani nin kadas ma katu, a na uliru ning ma katu ba.
36Ubellen nwui une nin kube na umong yiru ba, umunun inung nono kadura kitene kane, sa Usaunne, Uciffere cas yiru.
37Nafo na ayirin Nuhu wadi, nanere ma yitu udak Nsaun Nnit.
38Nafo aleli ayirin kulu nmyen inye wa dutu sa udak iwa din li iso, ipilla awani a iniza a shono mine nilugma udi duru lire na Nuhu wa piru uzirge,
39na iwa yiru imoimon ba nmyene da kulo uye umila nani, nanere ma yitu udak Nsaun Nnit.
40Ima se anit naba kunen; ima yiru unit urum, i sun urum.
41Awani aba mayitu tiyazun; ima yiru urum, isun urum.
42Nanya nani sun lisosin nca, bara na iyiru liri longo na cikilari mine ma dak ba.
43Yinnon ulele, Cikilari nwa yiru kubi kongo na ukiri din cinu, ama su uca na ama yinnu i puro kilae ipira ba.
44Nanere anung wang imasu uca bara Usaun Nnit ma dak kubi kongo na ima yiru ba.
45Ani ghari kucin kone kujijing, na kuyina cikilari me tighe in yenju ngame, anan niza nani imonli mine nanya kubi dert?
46Unan nmari ari kucin kone, ulenge na cikilari me ma dak ada seghe nsu nani.
47Nbellin minu kidegene cikilari une ma tardughe kitene nvat nimon ilenge na a dimun.
48Andi kucin kunanzang nworo nanya kibinei me. Cikilari nigye ndandauna;
49anin cizin ufo nadon licinme, anin li aso nin nanan so nadadu,
50Cikilari kucin kone ma dak liri longo na kucin kone nceo kibinei ku ba,
51Cikilari me ma kifigye a fogye anin ceo gye urume nan nanan rusuzu nati, kikanga na kuculu mayiti ku nin nyakku nayini.
