Marko 6:16-31

¹⁶Pa orong Herot Antipas la uptam miriro papot tiesiap, ga tiesong gare ro: “Iriro migana irie Ioanes. Tinan la ties tung, ga menamua ga uvara, pa titot la inar teuara ga inim.”

¹⁷Muano uriro ties ang Herot la are ro: Herot la urano kuala ang papa ang a Filip. Bonim o uriro magabun Herotias. Herot la tiesong ume, ga muio Herotias ai, ga magiliong.

¹⁸Pa aulo Ioanes Herot gare ro, “Olaginung kuala ang papa nuang, tale kan mumuru.” Are ratmat ga tale naong ume ties ang Ioanes ga masagaong Herot teip ga mela umaiat a Ioanes ga avismeng a sen ga maiabua na luguan o arubu.

¹⁹Pa Herotias la kiram dalap o me Ioanes ga namo inamung ga aving, pa tale kan puoieng.

²⁰Memani, Herot la urau aime Ioanes. La ait, Ioanes irie migana ila muri ga puvuvui na irap a Morowa. Are ratmat ga ume maset uale Herot abuo. Tara la ume upto ties ang Ioanes a Morowa, ume agat papot na dalap a. Pa mitara naong meba aptang ties ang.

²¹Pa tubiat oiop Herotias alang meba menamung Ioanes ga aving. Uriro alang la betieng gare ro, Herot la orangaong parak ula kakanu na tara la iaria naga ang. Ga ualam parakiap maun inamaniap mila kakanim la mime aagamelie iro ubi ang gavaman, ga inamaniap mila kakanim o danunumiap ga inamaniap la kakanim bop ma na provins Galili. Urie, okosarong parak ula kakanu, maiong miriro inamaniap meba parakmeng ga temeba ga irie.

²²Tie man parakmeng pa kulamut ula magabun poi ieng Herotias la muio ga man ivina. Pa Herot ga inamaniap la parakmemg ga irie, la nameng maset me uriro nuvinap. Are ratmat ga oulo orong uriro kulamut ula kubebun gare ro, “Eba talang man paga la nanung aime. Tonalavat, ga eba talang noun.”

²³Pa okosarong Herot ties migat ula ngangas ieng gare ro, “Migat tatuan, man paga la tomariknung a, eba talang noun. Ga leba tonalava meba ogoratang inamon tung lie narain napupien ga talang noba nap noun, tie eba akosartang.”

²⁴Tiesong Herot gare ro, tie ila kulamut omarikieng naga ieng, igama, “Eba aralava a man paga leba tarang?” Pa igama nagaieng. “Tiesnang meba narang bugam a Ioanes o unuavariap.”

²⁵Tiesieng gare tiro, ga kakalait teiara kulamut ga ila ai orong ga igama, “Narung titot it le narang bugam a Ioanes o unuavariap ga nabung na koi ga nalang toun.”

²⁶Tiesieng gare tiro, ga mitara giginam dalap a orong. Pa agatong me uriro ties migat ula ngangas ieng urie la okosarong na irap a Morowa, ga miriro inamaniap mila kakanim la mepto ra.

²⁷Tie, kakalait aulo orong non migana o danunumiap, ga ugama, “Nala narang bugam a Ioanes ga munang.” Urie, ula migana o danunumiap na kabin o arubu ga ogiripong kakong a Ioanes.

²⁸Ga uabu bugam a na koi ga uara ga muo un ga ualo un kubebun. Ga iaro uriro magabun bugam ga ila ialo un naga ieng.

²⁹Pa lop am Ioanes o usingnualap la mepto uriro ties ga mumaio maiavia tongan ga mela maiabua tapma na lu a tadas.

³⁰Urie, miriro lop o usingnualap am Iesu tinan la masagaong ga mela tapmat na papot pialap, la inar terigimeng ga nebolameng ga Iesu. Ga amelo mar mirie ubiap la makosarmeng, ga mirier tiesiap la mamelo inamaniap ga magaulap ma.

³¹Pa papot ma teip ga magaulap la mela ga mumaio, pa Iesu ga lop o usingnualap la tale memaning tara meba parakmeng. Are ratmat ga maulo Iesu lop o usingnualap gare ro, “Tie, bubuot le bula na noba nap la karuk a migana ba, ga agabulie kirat.”