Madiu 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Yasuhanda ibunaga talima piaga biaruhondo bi laabo halu lalu, Horo uruni harangi Ngode Datagaliwabehanda Handame Ho Kagoria ogobi wulebira. Wandari pira berenego tigua lamu hale yalu agali wali dabu bule ibiyago lola hole pene.

²Wandari duria miniwi biralu duria mende mini nawiore berene.

³Wandari mini nawi biarume lamu hale yuwa delagane olibe lininaga weli huniane mbira nayiore pene.

⁴Miniwi biaru ti hale lamu iranehabi behabi weli ogoni berelowa to̱lo yalu pene.

⁵Pu biruwa agali wali dabu biaga biago abale naibiyagola wandari biaru ti umu layagola palia hondo hai hene.

⁶Mbi hanuni hayagola mbiralime hongo howa ga̱ lalu, Ai agali wali dabu biaga biago ibiragonigo lola hole ibidaba, lene.

⁷Ani layagola wandari pira palia hondo hayaru abale heyuwa tinaga lamu hale biago bayuwa hungu bilo mo tiga bini.

⁸Ani bialu howa wandari duria mini nawi biarume duria miniwi biaruhondo lalu, Inanaga lamu hale hundirago tígua weli maru ina yobu ngidaba, lene.

⁹Ani layagola duria miniwi biarume ladai bialu lalu, Tí ngialu inane halu bulene nakarulapedago tirugu anda puwa taya bu pudaba, lene.

¹⁰Ani laya handala wandari mini nawi biarume tirugu andaha weli mo pene. Ti peaha agali wali dabu biaga biago ibini. Ibiyagola wandari duria manda manda bu birayaru ti agali biago heba tomo nole anda pialu panga paya tagi hene.

¹¹Mahaore wandari duria mende biaru ibini. Tigua ibuwa lalu, Anduane-o ina anda eberamago panga dugua, lene.

¹²Ani layagola agali wali dabu biaga biagome ladai bialu lalu, I̱ tí manda nabidogo panga naduguleore bero, laya, lene.

¹³Ani lowa Yasuhanda lamaro bialu, Tígua ogongiore ibulebiralo manda nabiore kamigo bayuwa mamage holene nga, lene.

¹⁴Yasuhanda la dege bialu lalu, Horo uruni harangi Ngode Datagaliwabehanda Handame Ho Kagoria ogobi wulebira. Agali mbirame ibu dindi taraha ibaga bialu pole lowa ibunaga biabe bia haga biaru olalu, Ibidaba, lowa, I̱naga mbirale bibahende ngoru hondo ha halimu, lene.

¹⁵Ibugua ti hangu hanguhondo biabe bulene mugube headagua mbiragohondo muni daosini duria (5,000) mialu mendegohondo muni daosini kira (2,000) mialu tebonegohondo muni daosini mbira (1,000) mialu bini. Ani bialu ibuni dindi mbiraha ibaga bialu pene.

¹⁶Piyagola biabe bia haga muni daosini duria (5,000) yayagome abale mo yalu puwa muni biagome biabe bialu daosini duria (5,000) mende mo tago hene.

¹⁷Ogonidagua dege biabe bia haga mende muni daosini kira (2,000) yalu piyagomebi daosini kira mende mo tago hene.

¹⁸Biabe bia haga muni daosini mbira (1,000) mo yayagome ibu anduane biagonaga muni yayago mo yalu puwa dindiha uli wawa hora hene.

¹⁹Ani bu hemiria maniore tinaga anduane biago dai buwa ti haru biruwa lalu, Muni tíhondo ngirugonaga lo manda bimi̱ya, lene.

²⁰Ani layagola biabe bia haga muni daosini duria (5,000) yayago ibugua muni daosini duria (5,000) mende mo yalu ibuwa mialu howa lalu, Anduane-o í̠na muni daosini duria (5,000) ngirigo i̱na daosini duria (5,000) mende mo tago ho yidogoni handa, lene.

²¹Ani lalu miyagola ibunaga anduane biagome ladai bialu lalu, Í̠ biabe bia haga bayale mini bilinahe kegoni. Ai í̠na emene biago yuwa baya hangu bialu haridago timbunibi hondo habelo helaro. I̱naga turu holene ngagoria iya haru mandagi turu ho habiya íbu, lene.

²²Ani layagola biabe bia haga muni daosini kira (2,000) mo yalu piyagome ibuwa lalu, Anduane-o í̠na muni daosini kira (2,000) ngirigo i̱na daosini kira (2,000) mende mo tago ho yidogoni handa, lene.

²³Ani layagola anduane biagome lalu, Í̠ biabe bia haga mini bilinahe bayale kegoni. Ai í̠na emene biago yuwa baya hangu bialu haridago timbunibi hondo habelo helaro. I̱naga turu holene ngagoria iya haru mandagi turu ho habiya íbu, lene.

²⁴Ani layagola biabe bia haga muni daosini mbira (1,000) mo yalu piyagomebi ibuwa lalu, Anduane-o í̠ agali tandagabi kegoni manda bido. Tomo í̠na hengene ndogo do nariligobi tomo egene í̠na polene ndogo mo mogo biriligobi kegoni.

²⁵Í̠ ogonibi kego i̱ gi howa í̠naga muni biago mo yalu puwa uli wawa dindiha hora haru. Í̠naga muni biago o yidogo de handa, lene.

²⁶Ani layagola ibunaga anduane biagome lalu, Í̠ agali ko mangaheda. Í̠na manda birigola howa i̱na hengene ndogo do naruligobi i̱na egene polene ndogo mo mogo biruligobi henene manda biribe.

²⁷Ani manda biriyagua nde í̠na i̱naga muni biago muni wiaga mbeniha wu howa i̱ dai berogola mo tago howa ngule wirine agi biyane henebe.

²⁸Anigo muni daosini mbira (1,000) ogoni ibu yidagoni mo yu dai bialu agali muni daosini pira (10,000) yu kagohondo midaba.

²⁹Ogoninaga mbiralime mbirale mbira yu kayagua ibuhondo mia tago halu dewaore yu holebira. Mbiralime mbirale emene mbira yu howa nayi kolo kayagua emeneorebi yidago yamulebira.

³⁰Biabe bia haga ogonibigo ibu galone nabulene kago arumaha minu ba tagi halimu. Ogoniha howa ibu dugu bialu ibuni ne gingirulo hayaga bialu holebira, lalu lene.

³¹Ani lowa Yasuhanda laabo halu lalu, Agali Hole Ibiyago ibu Handame Haga Kini howa dahuliyali bibahende karu heba mandagi ibirangi ibu handame haga biragane dagiani birulebira.

³²Ani bedaria wali agali dindi bibahendeoreha howa ibu wanakuihayagi mo mogo bu helolebira. Ani bu kagola nogo sibi haru haganeme nogo sibi memela daba ki hagadagua ibugua wali agali uruni mo daba ki ho helolebira.

³³Daba ki howa wali agali mini tigabi karu ibunaga gi tigahayagi helalu mini tigabi ndo karu ibunaga gi lehayagi helolebira.

³⁴Ani helowa Handame Haga Kini biagome wali agali ibunaga gi tigahayagi karuhondo lalu, I̱ Abahanda mo turu howa helenedago ibidaba, lolebira. Dindi bibahende wabiyangi howa Ngode Datagaliwabehanda handame ho kagoha tí halimulo mo manda manda bu wini ngagoria hole ibidaba, lolebira.

³⁵I̱ hina garibi lo hewagola tígua i̱ hina ngirimi. I̱ iba noa ho hewagola tígua i̱ iba hambu ngirimi. I̱ mbiraha howa íbu hewagola tí andaga palimi̱ya íbu larimi.

³⁶I̱ aga nabi tibabe hewagola tígua i̱ aga mo bia harimi. I̱ warago bo wiwagola tígua i̱ ira to birimi. I̱ garabaya hewagola tígua i̱ nenege ibirimi, lalu lolebira.

³⁷Ani laragola wali agali mini tigabiwi karume ogodagua ladai bulebira, Anduane Homogo-o iname í̠ hina garibi lo heria hina ngialu iba noa ho heria angi hambu ngialu birimabe.

³⁸Í̠ dindi mbiraha howa íbu heria hondowa ina andaga palimi̱ya ma lalu tibabe heria angi aga mo bia halu birimabe.

³⁹Iname í̠ warago bo wiriabi garabaya heriabi nenege angi ibirimabe, lolebira.

⁴⁰Ani laragola Handame Haga Kini biagome ladai bialu lalu, I̱na tíhondo heneneore larogoni. Tígua birimiangi bialu howa i̱ hamene emene ko yagibanoruhondo birimigo i̱hondo birimigoni, lolebira.

⁴¹Ani lowa ibugua ibunaga gi lehayagi karuhondo lalu, I̱ kogoria nahe pudaba. Tí Ngode Datagaliwabe mo yo handaga karunaga pani nolene ngagoria harimidago ira hundia nabiaga dalude daabo ho ngagoria hole pudaba. Ogoriani dama Heyolabebi ibunaga dahuliyalirubi helo Ngode Datagaliwabehanda manda manda bu wini ngagoria hole pudaba, lolebira.

⁴²I̱ hina garibilo hewagola tígua i̱ hina nangirimi. Iba noa ho hewagola i̱ iba nahambu ngirimi.

⁴³I̱ dindi mbiraha howa íbu hewagola i̱ tí andaga palimi̱ya íbu nalarimi. I̱ tibabe hewaria tígua i̱ aga mo bia naharimi. I̱ warago bo wiwagolabi garabaya hewagolabi tígua i̱ nahondo ibirimi, lolebira.

⁴⁴Ani laragola tigua ladai bialu lalu, Anduane Homogo-o iname í̠ hina garibi lo heriabi iba noa ho heriabi dindi mbiraha howa íbu heriabi aga nabi tibabe heriabi warago bo wiriabi garabaya heriabi iname í̠ angi hondowa biamogo nabirimayabe, lolebira.

⁴⁵Ani ladai biragola Handame Haga Kini biagome ladai bialu lalu, I̱na tihondo heneneore larogoni. Tígua mbirali emene yagibanoru biamogo bulene hame naleore harimigo i̱hondo birimi, lolebira.

⁴⁶Anigo uruni pani naabo holene ngagoria helo pelolebira. Mini tigabiwi karu ti haabobo holene ngagoria polebira, lalu Yasuhanda hene.