LUUKA 11:1-48

¹Dhali a’di diki’d mo mmo’tho mo e moŋkamu/ mo dhali ki a’di daḵki ’tho mo tani jan ṯal ’deŋ kamu/ ’peni imanciḵ a’di gwo o a’di gwo mo ki: Tap̱a, ṯori aman gwo mo ma, mmo’tho mo me’da Yohaan mmoṯorkina a’di imanciḵ a’di gwo gwo mo.

²Dhali a’di ki o uni gwo mo ki: Ki um mini ’tho mo tani oyi gwo cikise/ mo ma: Ababa, dhalki gway pini a’di ḵogu mo ma. Dhalki bampam pini a’di yayi’d mo.

³C̱i am tonṯem bam jin ta ji gi isa yempa/ mo ma.

⁴Dhali dhal am amure/ miinthus bam ’pen mo ma, haali/ am ki is bam dhalkina ’kwani ’baar ’pen ka ’deṯe/ ’deṯe/ mo, uni gun ’kon ma mure/ miinthus bam m’ba/ mo. Dhali dhalku/ ki sus am mo e mo jin palu mo.

⁵Dhali a’di ki o uni gwo mo ki: Jana ’peni um jin ta’d ka mugu mo jin midi ya i a’di mombwam/e mo dhali o a’di gwo mo ki: Amuguwa, c̱i aha/ maaŋḵuthu’di kwara mo ma

⁶haala mugum pem p̱u’dki’d mo ’peni bway jin yayina a’di mo dhali aha/ dara ki to mmokar a’di mbwambor mo.

⁷Dhali a’di midi thoḵ gwo mo ’peni gu’b ki: Dhalku/ ki ṯocaa/ ’kus mo. Acampur di’d ki mu’th mo shwane/ dhali uc̱im pem uni ’kona ci nyaḵki aha/ mo be. Aha/ mola cu mis mo dhali c̱iki /e toŋ kamu/ mo be.

⁸Aha/ ṯora um gwo mo, ba a’di midi diki cu mis mo dhali c̱i a’di toŋ kamu/ mo haali/ a’di ta’da mugum piti mo, hili gom mmodina a’di ki ’the is mo tani a’di midi cu mis mo dhali c̱i a’di to yin jin mina a’di mii ta mo be.

⁹Dhali aha/ ṯora um gwo mo ki: Doṯi to mo ma, dhali a’di minu c̱i um mo. Simmi mii e mo ma dhali um mini gam a’di mo. Nagkani acampur ap̱o/ ki me’d mo ma, dhali a’di minu ḵa’dki um mo be.

¹⁰Haala ris ’kwani ’baar mo ka ’deṯe/ ’deṯe/ gun doṯki to mo tani bu’thki to mo dhali a’di jin simmki to e mo tani gamki a’di mo dhali a’di jin nagkanki’da campura p̱o/ ki me’d mo tani a’di minu ḵa’dki a’di mo be.

¹¹Ababa jana di’di bwam um mo, waḵki/ ya/ ki doṯ a’di gwo gom wa’c mo, dhali a’di midi dhal wa’c e i is mo dhali c̱i a’di tasha/ mo ’taa?

¹²walla waḵki/ a’di doṯki a’di mo goma oma ŋwa mo tani mina a’di c̱i a’di a’daḵ mo ’taa?

¹³Waḵki/ um kun ta thus kan mo mish mmoc̱i tom ’boron ki me’d mo ki uc̱im bum mo tani bakata ’te/ imin ma Baba gi momis mo c̱i Shi/in Dheleladhelel mo ki uni gwansan kun doṯki a’di mo?

¹⁴Dhali a’di di’d mmo/ura ruma ’cesh ka pije/ mo ’peni wathi/ jin mol ’twa/ wal mo. Dhali ka ruma ’cesh yaki’d ka pije/ ’peni wathi/ jin mol ’twa/ wal mo tani a’di mishki gwo o mo dhali ’kwani merkin mo be.

¹⁵Dhali ’kwanin tiya o gwo mo ki: A’di urki’da ruma ’cesh ka pije/ ki gway ma Baalsebuul jin ta tap̱a ma ruma ’cesh mo.

¹⁶Ka yiha/ ’kwanin tiya si’da/ palki a’di mo mmodoṯkina uni jamas mii ’peni momis mo.

¹⁷Hili a’di mishki gwo jin kulumkina uni eya dum buni mo dhali o uni gwo mo ki: Aris bampa/ kun ḵwa/kunu bwa e is buni mo tani uni shi/kin mo dhali gu’b a’di biṯki’da p̱o/ gu’ba kamu/ mo.

¹⁸Dhali waḵka Seṯaan si’da/ ḵwa/i bwa mo ap̱o/ is piti mo tani ki bampam piti midi dosh kata mo? Haali/ um o gwo mo ki aha/ urkina ruma ’cesh ka pije/ ki gway ma Baalsebuul mo.

¹⁹Dhali waḵki/ aha/ ura ruma ’cesh ka pije/ ki gway ma Baalsebuul mo tani iya/m bum ur uni ka pije/ katinta mo? Wakan uni mini ta imandwall gwo gom um mo be.

²⁰Hili waḵki/ a’di ki me’d ma Arumgimis mo jin urkika/ aruma ’cesh ka pije/ mo tani yan’ko’d Bampa/ ma Arumgimis midi p̱u’du/ ap̱o/ um mo be.

²¹Ki wathi/ jin ’bitha’bi’th mo hi’thki’da goŋgoro/ e is piti ’baar mo mmodi mo mmoji gu’b pitiŋ gana/ mo tani tom piti kun tana a’di mo tani dhunu ki mo ma ḵu’th is mo be.

²²Hili waḵki/ jan ’deŋ kamu/ jin ’bitha’bi’th mo mmobol a’di e mo gam a’di ’kup̱ mo dhali p̱i a’di e mo tani a’di ki budha goŋgorom piti jin gama a’di gwo is mo tani a’di midi ḵwa/ tom piti jin budhu bwa mo be.

²³A’di jin diki c̱a’b nyaḵki aha/ mo tani a’di di’d ap̱o/ aha/ mo dhali a’di jin diki nyaḵ is tul ki aha/ mo tani a’di ta a’di jin ḵwa/i bwa mo.

²⁴Ka rum thus kun nyo/on iikin ka pije/ ’peni wathi/ mo tani a’di yaki’d ki tur mo e mo jin dar gi yi’de/ mo mmoŋap mo mo mmosi/is mo. Dhali a’di diki gam moŋkamu/ mo tani a’di o gwo mo ki: Aha/ mina doḵ e gu’b pem ka nyaŋ’ko’d mo ’peni mo jin yayika/ mo ’peni cine/ mo.

²⁵Dhali ki a’di p̱u’dki’d mo tani a’di gamki a’di ki a’di dhi’thkunu mo dhali to thosonkunu ki ’bore/ mo be.

²⁶Yan’ko’d a’di ki ya mo dhali susa rum pesun tiya mo kun shi/ashi/ mo kun bol a’di ki is pitiŋ gana/ e mo dhali uni cic̱kin mo dhali ’ko imun mo. Dhali mondiŋ ’ko’d gi wathi/ yan mo tani a’di warki’d ki shi/ mo mmobol jin ṯwa/a/ e mo be.

²⁷Ki a’di oki gwo yansan mo tani a’boma kamu/ ’peni bwam ma waambuhany ’kwani mo tani a’di eḵki cuuwa/ mo dhali o gwo mo ki: Mom’bor mii gom bwa gi a’di jin dhothi /e mo dhali ako yan jin p̱ikina /e mo be.

²⁸Hili a’di ki o gwo mo ki: Mmodhal gwo yansan e i is mo mmo/o gwo mo ki: Mom’bor mii gom uni gwansan kun ciḵki Gwo ma Arumgimis mo dhali mmodhu uni mo be.

²⁹Ka waambuhany ’kwani marki is mo tani a’di ṯelki gwo ’pen mo mmo/o gwo mo ki: ’Kwani ma nyaḵum yil gwansan mo tana nyaḵum yil kun ta thus ki thus mo. Uni ŋap̱ki jamas mii mo, hili jamas miiŋ kamu/ yisa minu c̱i gom uni yisa hili isi ciki/ jamas mii ma Yuunaan mo be.

³⁰Haali/ me’da Yuunaan warki’d ki jamas mii gom ’kwani gi Pa Ninawa mo tani wakan mina Ya/ gi ’Kwani ita goma nyaḵum yil gi ’kwani gwansan mo be.

³¹A’bom jin ta’da maliḵ ’peni ’ko’d gwar ma biny cam mo tani a’di midi cuyi mis mo dhali dwall gwo mo nyaḵki ’kwani ma nyaḵum yil gwansan mo, dhali waḵ uni mo, haala yim a’di pu’dki’d mo ’peni ’pemen gi mony’cesh mo mmociḵ yuḵ ma Sulemaan mo, dhali hili mo mo ma, jan ṯal ’deŋ kamu/ jin eḵa/ eḵ jin bolki’da Sulemaan e mo tani a’di di’d mmahan mo be.

³²’Kwani gi Pa Ninawa mini cu mis mo e gwon dwall mo nyaḵki ’kwani ma nyaḵum yil gwansan mo dhali waḵ uni mo, haali/ uni ri’ckina du is mo ’peni gwo jin c̱in ma Yuunaan uni mo, dhali hili mo mo ma, jan ’deŋ kamu/ jin eḵa/ eḵ mo mmobola Yuunaan e mo tani a’di di’d mmahan mo be.

³³Wathiŋ kamu/ yisa di’da ki a’di c̱i’thki’da lamba/ mo dhali kar a’di e jis jin c̱wanyu mo e bwaŋ gu’b mo walla mmokar a’di mo e bwaŋ’kwariny toŋ’kul bwa mo hili a’di ki dhal a’di mo mmodi eya p̱o/ ṯirkina/ mo ki uni gwansan kun cic̱ki gu’b mo tani mini mish moŋkush mo be.

³⁴Em bum a’di ta’da lamba/ gom buŋgwar is bum mo be. Waḵki/ em bum ṯal ’de/ mo tani buŋgwar is bumi ’baar mo ’tu’du/ mo ki moŋkush mo be. Hili waḵki/ a’di diki ṯal ’de/ mo tani buŋgwar is bum ’tu’dkunu mo ki mondhurumi’d mo be.

³⁵Wakan miiyi ki ’bore/ mo ma, gom moŋkush jin di’d e /e mo jin mina a’di diki dhurum mo mo.

³⁶Yan’ko’d waḵki/ buŋgwar is bum ’tu’du/ mo ki moŋkush mo tani mmodar gi mondhurumi’d e ’bana kamu/ mo tani a’di ’baar ka ’bimpil mo midi ’twaḵ mo mo me’da bi ma lamba/ jin c̱i um moŋkush mo be.

³⁷Ki a’di di’d mmo/o gwo mo tani Wathim P̱arisi doṯki a’di mo mmoshwa to nyaḵki a’di mo. Wakan a’di yaki’d nyaḵki a’di mo dhali c̱a’bki’da tharabeesa mmoshwa to mo.

³⁸Dhali Wathim P̱arisi merki’d kagahara mo mmop̱ar a’di e mo mmodina a’di ki ’thur me’d ki yi’de/ nṯwa/a/ ki tonṯe/ gi montee mo.

³⁹Dhali Tap̱a o a’di gwo mo ki: Shwane/ um ’Kwani P̱arisiyiin, um lamki ’ko’d gwar ma ḵubbaaya mo dhala sahan mo tani dhali hili e bwaman mo tani um ’tu’dkunu mo ki mondil to mo dhali ki mii kun ’coḵa’coḵ mo.

⁴⁰Um p̱us gwahan. Dina a’di jin uḵki ’ko’d gwar ki uḵ bwaman mo si’da/ ’taa?

⁴¹Hili c̱iyi to jin minu c̱i ki me’d mo gom ’kwani kun hatha’ko’d mo, to gwansan kun ’koni cine/ mo dhali hili mo mo ma, aris to ’baar mo ta kun dhelelkin mo gom um mo be.

⁴²Hili wayyi e um ’Kwani P̱arisiyiin, haali/ um c̱ina nana/ ki to jin c̱inu Arumgimis mo dhali jip̱in to jin wana e ka guremu/ mo dhali aris jip̱i/ kun ḵuyi mo ki ḵuy mo dhali um ki ta p̱iny is mo e momii miiŋḵar/e mo dhali mo/en ma Arumgimis mo. To gwansan ḵa ba/ mina umi mii thim mo ba/ dhali mmo’koki ta p̱iny is gom miin tiyan tiya mo.

⁴³Wayyi e um ’Kwani P̱arisiyiin haali/ um eni moŋ’kom ’borga/ mo e gu’b gi montul is mo dhali um eni monthe me’d e mo ma suug mo.

⁴⁴Wayyi e um haali/ um wana e ki moŋ’kup̱aje kun ’konuki mish mo dhali ’kwani ki ii i’kup̱i uni mo mmo’kona uni ki mish uni mo be.

⁴⁵Amanmisha jo’d gwoŋḵana kamu/ ’de/ thoḵ a’di gwo mo ki: Amanṯor Gwo, e gwo yan jin ona /e mo tani /e ki waḵ am si’da/ mo be.

⁴⁶Dhali a’di ki o gwo mo ki: Wayyi e um kun ta imanmisha jo’d gwoŋḵan mo si’da/ haali/ um ki dhu ’kwani to kun diṯa mii ki diṯ mo mmoḵal mo tani dhali um ki is bum ’koki ta tondiṯi’d is ki me’d mo ki ari me’d buma ṯal ’deŋ kamu/ mo be.

⁴⁷Wayyi e um mo haali/ um nyaŋki moŋ’kup̱aje gi imanc̱i gwo ma Arumgimis kadhamo/ mo, uni gun ’koshkina ibabam bum mo be.

⁴⁸Wakan um ta iman/o gwo ap̱o/ mo dhali gam gwo me’d mo gom mii gi ibabam bum mo haali/ uni ’koshki uni jwa mo dhali um nyaŋki moŋ’kup̱ajem buni mo be.