Luku 9:26-40

²⁶Hali ma꞉nda꞉ epima꞉ I̱ pa꞉ta꞉ make yaka waloa꞉ pimanu pa꞉ta꞉ make yaala꞉ma꞉ homea꞉ka꞉na꞉ta꞉ kota꞉ mo Wanda꞉halina꞉ Eiyeke make Ateke make yako piki enisolo tonu make iki paeyaona꞉ pa̱a̱ pa꞉la꞉eki ame̱le̱ a꞉paata꞉ mo Wanda꞉halina꞉ Eiyekema꞉ mo hande hali pa꞉ta꞉ make yaala꞉ma꞉ homaalieke.

²⁷I̱ma꞉ iki pa꞉ta꞉ ota꞉ pi alome. Do haleme mandane wanda꞉halita꞉ ambi na homeke hamena꞉ Koda꞉na꞉ Kilu Tombuao Hala꞉eki ota꞉ handilimikie leekeme.

²⁸Yesuma꞉ dupiki pi laa pula homekemanu paeyeketa꞉ yeni puluekema꞉ pote ma꞉nda꞉ pa꞉ta꞉ peekeme. Ipikana꞉ma꞉ta꞉ Pida Dioni Dia꞉mesi hatuku opa꞉liaemekeme.

²⁹Yesuma꞉ yeni pitolo pitina꞉ta꞉ ipika꞉ leke popeleketa꞉ ta꞉ta꞉ ma꞉nda꞉ pikieki hao make ipika꞉ pambaeyeke aka꞉ta꞉ ota꞉ hake wotu pea baeyeke ekima꞉ leke yale yale piki nono piekeme.

³⁰Kutupa koto kone hali yaapota꞉ Yesu ame̱le̱ hata꞉ pi lemekeme. Mo hali yaapota꞉ Mosesi pita꞉ Elaidia yaapo yeekeme.

³¹Ipilikita꞉ Koda꞉na꞉ pa̱a̱na꞉ a꞉pa hata꞉ Yesu ame̱le̱ ipiki teke pa꞉ta꞉ Koda꞉ma꞉ pina꞉e hone ula꞉ tupa꞉ Diutuseleme da pa꞉ta꞉ homolo pieke ekina꞉ pi hotiolo haemekeme.

³²Pida pita꞉ mo hali yaapo peata꞉ u yoka꞉lupa pemekepate tiaota꞉ Yesuna꞉ pa̱a̱ pikieki make mo Yesu ame̱le̱ haepeke hali yaapo handemekeme.

³³Koto ekina꞉ta꞉ hali yaapota꞉ Yesu mina꞉pa꞉lao poluekema꞉ pulu haena꞉ laata꞉ Pidama꞉ Yesu pa꞉ta꞉ alota꞉ Tekehalio. Niki do pa꞉ta꞉ haloma꞉ ekita꞉ ota꞉ epeke epomekeme. Topu da tepo a꞉eyamono lae. Ma꞉nda꞉ naka꞉eki. Ma꞉nda꞉ Mosesina꞉eki. Ma꞉nda꞉ Elaidiana꞉eki pea a꞉eyamono lae leekeme. Pidama꞉ leeke pi manuta꞉ hone wotu na wiki hata꞉ leekeme.

³⁴Pidama꞉ dupiki pi alo haena꞉ta꞉ koa a꞉pa ipika꞉ su̱a̱ma꞉ta꞉ iki mea tumbaeyekeme. Tumbaeyeke handaata꞉ mo disaipolo haliweki tepoma꞉ paala꞉ma꞉ homemekeme.

³⁵Mo koa tukiki pa꞉ta꞉ pi ho̱la̱꞉makema꞉ la꞉niaaso hata꞉ alota꞉ Do ya wekita꞉ I̱ma꞉ kiki ma̱leke lulu wekima꞉ pa꞉la꞉me. Ipika꞉ pi opua꞉pe laa la꞉niaeyekeme.

³⁶Koto pi ho̱la̱꞉make laa paeyeke naneta꞉ Yesu homeke hapelia hayekeeki handemekeme. Mo hali tepoma꞉ mo handemeke ekimanu wanda꞉hali ma꞉nda꞉ pa꞉ta꞉ na la haleke ika꞉ homeke hone wimikime.

³⁷Da ma꞉nda꞉ kelepeeketa꞉ Yesuta꞉ mo hali tepo ame̱le̱ mo pote mina꞉pa꞉lao hola꞉pa꞉niaemekepate wanda꞉hali aneke hapuma꞉ Yesu a꞉pa manda꞉hande pimikime.

³⁸Mo wanda꞉hali anka꞉lopuna꞉ a꞉pa hayeke hali ma꞉nda꞉ma꞉ Yesu pa꞉ta꞉ wi anekema꞉ alo alota꞉ Disao. I̱ma꞉ neke pa꞉ta꞉ honke aloma꞉ yaka weki a꞉pa handa꞉e. Ipikita꞉ yaka ota꞉ homeke wekie.

³⁹Kutupa ipikita꞉ mo hoke temokoma꞉ mina꞉tiki pita꞉la꞉ natena꞉ta꞉ e̱ wi tieke la꞉tiki pu hala꞉me. Kutupa mo hoke temokoma꞉ mo weki mea lu keao kake pa꞉ta꞉ dako hankoloma꞉ lu hala꞉me. Kutupa mo hoke temokoma꞉ yombu moneatiki pu hata꞉ a̱i̱ na mina꞉pa꞉lalieke.

⁴⁰Koto ekina꞉ta꞉ I̱ma꞉ naka꞉ disaipolo haliwekima꞉ tolu lina꞉yeke honke loa꞉pate mo haliwekima꞉ ana꞉ na pia꞉me leekeme.