Luke 2:6-49

⁶ma nap’an ni ka yow bay u lan yu Bethlehem, me taw nga nap’an ni nge gargelnag fak.

⁷Me gargelnag e bin som’on i fak ni pumo’on, me bachiy e mad ngak nge tay ngalan ba dabiy ko gamanman — ya dariy e gin ni yad ra par riy u tafen e milekag.

⁸Ma immoy bogi girdi’ ni yad ma gafaliy e gamanman ko re gi nam nem nra pired u daken e ted nneap’, ngu’ur matnagiyed e gamanman rorad.

⁹Me m’ug ba engel rok Somol ngorad, me gal ram’en Somol nga dakenrad. Me yib e tamdag ngorad nrib gel,

¹⁰machane me ga’ar fare engel ngorad, “Dab mu tamdaggad! Ya ku gub ni nggog e thin ni bfel’ ngomed, ni ir e bayi pi’ e felfelan’ ni ba ga’ ngeb ngak urngin e girdi’.

¹¹Re rran n’ey u lan e binaw rok David e kan gargeleg e Tabyul romed — ni Kristus ni ir e Somol!

¹²Ba’aray e ren’en ni ir e bayi micheg ngomed: bay mpir’eged bochi tin ni kabran ni kan bachiy e mad ngak kan tay ngalan ba dabiy ko gamanman.”

¹³Kachingiyal’ nem me yib i m’ug e engel nu tharmiy ni pire’ ni pire’ u to’oben fa binem e engel, ni yad be yin’ tangin Got ni yad be yog e sorok ngak ni be lungurad,

¹⁴“Ke sorok Got ni bay ko thal nth’abi tolang e tharmiy! Ma nge yib e gapas nga fayleng ngak e pi’in yad bfel’ u wan’ Got!”

¹⁵Ma fa’ani pagrad fapi engel ngar sulod nga tharmiy, me yog fa pi’in yad ma gafaliy e gamanman u fithik’rad ni lungurad, “Ngdarod nga Bethlehem ngad guyed fare n’en nike yog Somol ngodad.”

¹⁶Ma aram miyad yan ni yad ba gur mranod miyad pir’eg Maria nge Josef, miyad guy fachi tin ni kabran ni kan tay ngalan e dabiy ko gamanman.

¹⁷Ma fa’ani guy fa pi’in yad ma gafaliy e gamanman fachi tin, miyad yog e n’en keyog fare engel ngorad ni murung’agen e chi tin nem.

¹⁸Ma urngin e girdi’ ni rung’ag e re bugithin nem e ra gin gad ko n’en nike yog fa pi’in yad ma gafaliy e gamanman.

¹⁹Ma urngin e pi thin nem ni tay Maria nga laniyan’ ngi i tafinaynag nib gel.

²⁰Me sul fa pi’in yad ma gafaliy e gamanman, ni yad be tang ni aram e yad be pining e sorok ngak Got u urngin e tin ni kar rung’aged nge tin ni kar guyed; ya rogon ni yog fare engel ngorad e aram rogon nra pir’eged.

²¹Me reb e wik nga tomuren, ni aram e ngiyal’ ni ngan maad’adnag fachi tin min tunguy fithingan ni Jesus, ni aram fare ngachal ni tunguy fare engel ngak u m’on ko ngiyal’ ndawor ni parnag riy.

²²Fa’ani taw nga nap’an ni aram e nge ngongliy Josef nge Maria e tin keyog e Motochiyel rok Moses ni ngu’un rin’ mi ni bangbengnag Maria ni aram e ke arow ni yalen ni yima rin’. Ma aram miyow fek fare tin i yan nga Jerusalem ni aram e kan fek i yib nga p’eowchen Somol.

²³Ba’aray rogon ni kan yoloy u lan e motochiyel rok Somol ni ga’ar, “Urngin e bin som’on i fakay ni pumo’on ma ngan pi’ nga pa’ Somol.”

²⁴Ma ku ranow ngar pi’ew ba maligach ni bod rogon nike yog e motochiyel rok Somol nike ga’ar, “L’agruw i dove ara l’agruw i pifak e bulogol e ngan pi’ ni maligach.”

²⁵Ma aram e immoy be’ nib mo’on ni be par u lan yu Jerusalem ni Simeon fithingan; ni ir be’ ni bfel’ ni bay madgun Got u wan’, ni be sonnag yu Israel ni ngan chuwegrad ko gafgow ni yibe tay ngorad. Ma bay fare Kan Nthothup rok,

²⁶nike micheg fare Kan Nthothup nga laniyan’ ni dabi yim’ me guy fare Messiah ni yog Somol ni bayi pi’.

²⁷Me yan Simeon ngalan e Tempel, ni Kan ni Thothup e pow’iy. Ma fa’ani fek e gallibthir rok Jesus fare tin ni Jesus i yib ngalan e Tempel ni ngar rin’ew e tin keyog e Motochiyel ni fan ngak,

²⁸me dibey Simeon fachi tir me pining e magaer ngak Got ni bochan e chi tir nem, me ga’ar:

²⁹“Somol, chiney e kam rin’ e tin ni mog ni bay mu rin’, ere mpageg i gag e tapigpig rom nggu wan ko binem e tamilang u fithik’ e gapas.

³⁰Ya kug guy nga owcheg e en ni kam pi’ ni ir e nge thapeg e girdi’ ngom,

³¹ni ir e kam ngongliy rogon u p’eowchen urngin e nam,

³²ni ir e tamilang ni nge dag e kanawo’ rom ngak e pi’in gathi yad piyu Israel, me gilnag buguwan e girdi’ rom ni piyu Israel.”

³³Me gin e chitamngin nge chitiningin fare tin ko pi thin nem nike yog Simeon ni murung’agen e re tir nem.

³⁴Me yibiliyrow Simeon ngak Got me ga’ar ngak Maria, ni chitiningin fachi tir, “Re tir ney e Got e ke duwgiliy ni ir e bo’or e girdi’ nu Israel ni nge mul ni bochan, ma bo’or e nge thap ngak Got; me ir e bayi mang ba pow ni yib rok Got ni bo’or e girdi’ ni bayi non nib togopluw ngay,

³⁵ma aram me dag e leam rorad nib mith ngan nang. Ma taganan’ ni bod feni m’uth ba saydon e bayi kirebnag lanin’um.”

³⁶Ma immoy be’ ni bpin ni ir reb e profet ni Anna fithingan, ni bitir rok Fanuel, ni girdi’en e ganong rok Asher. Ni be’ ni bpin nike pilibthir ma kemus ni medlip e duw ni un ko mabgol,

³⁷me yim’ e pumo’on rok me par ni go ir nge gaman meruk i ragag nge aningeg e duw yangren. Nder pag e Tempel, ni rran nge neap’ ni be liyor ngak Got, ma be pag e abich ma be meybil.

³⁸Ka re ngiyal’ i n’em me taw e re pin ney me pining e magaer ngak Got, me weliy murung’agen fare tin ngak urngin e girdi’ ni yad be sonnag Got ni nge chuweg yu Jerusalem u pa’ e to’ogor rok.

³⁹Fa’anra mu’gow i rin’ urngin e tin keyog e motochiyel rok Somol ni ngan rin’, miyow sul ko binaw rorow nga Nazareth ni bay u lan yu Galile.

⁴⁰Me ilal fare tir nge gel; ma rib gonop, ma ke par Got ni be ayuweg.

⁴¹Gubin e duw ma i yan e gallibthir rok Jesus nga Jerusalem ni fan ko madnom ni Paluk’af.

⁴²Ma nap’an nike gaman e ragag nge l’agruw e duw yangren Jesus, miyad yan ko re madnom nem ni bod urngin e duw.

⁴³Ma fa’ani m’ay e pi rran ni ba’aram ni yima madnom riy, miyad tabab ko milekag ni ngar sulod nga taferad, machane me par fachi cha’ i Jesus u Jerusalem. Ma de nang e gallibthir rok ni aram e n’en nike rin’;

⁴⁴ya yow be finey ni bay u fithik’ e pi girdi’ ni ba’aram ni yad be yan, ere reb e rran nra milekaggad, ma aram mu ur changar nigew u fithik’ e girdi’ rorow nge pi tafager rorow.

⁴⁵Ma dar pir’egew u fithik’rad, ma aram miyow sul nga Jerusalem ni yow be changarnag.

⁴⁶Ma chirofen ni gaman e dalip ngay miyow pir’eg u lan e Tempel, ni kar pired e pi tamchib nu Israel nga but’, be motoyil ngorad ma be fithrad.

⁴⁷Ma urngin e girdi’ ni ur motoyilgad ngak e ra gin gad nga feni llowan’ ko thin ni ur fithed ngak ngi i fulweg.

⁴⁸Ma gallibthir rok e fa’anra guyew miyow gin ngak, me ga’ar e chitiningin ngak, “Fakag, mang ni kam rin’ e biney e pa’ ngomow? Gamow be gayem e chitamam ni kar gu rusgow.”

⁴⁹Me fulweg ngorow ni ga’ar, “Mang ni ngam gayew gag? Da mu nangew nthingar gub gu par nga naun rok e Chitamag?”