Lukas 9:3-61

³I taki ria, i ta maea, “Naha ni bolea tara maki na tahuna mu havai. Naha ni bole a kodo. Naha ni bole a hole. Naha ni bole a maki ni kani. Naha ni bole a moni. Naha ni bole a varakia ge rua.

⁴E rei a tanga mu dili vona, mu made na ruma ge taku kunana.

⁵E rei a tanga i uka ma i tagui mua, mu kurudu pasi a habulo na vahane mua, mu ha taroa, bara i vakasiri ria ri tahoka a ngava.”

⁶Lakea e huriki a apostolo ne Isu ri vano, ri laho lae na maka tanga, ri vara na Velenga Kamumu, ri vakamahuri e huriki ri giloa.

⁷E Herod, a hariki, i longo a maka maki i rata e Isu. I luhoi lege lae a vuhuna e huriki ranga ri takia e Isu ta ia e Ioanes i mahuri mule na nimate.

⁸E huriki ranga ri takia e Isu ta ia e Elaisa i bele tabu. E huriki ranga tabu ri takia e Isu ta ia a propet hosi tara i mahuri mule.

⁹Pali e Herod i ta maea, “Iau a palakudua hosi a lohone Ioanes. Pali e rei ra viri iea a longoa i rata a maka maki nga?” Lakea i ngaru ni masia e Isu.

¹⁰Na tahuna e huriki a apostolo ne Isu ri hamule pali, ri vakalongo e Isu vona a maka maki ri rata. Muri e Isu i tuli ria, ri vano, ri lakea na tanga dagi tara ni gale e Betsaida.

¹¹Pali e huriki ri longoa a hini e Isu i lakea vona, lakea ri muri mai ia. Na tahuna ri bele, e Isu i tagui ria, i vara ria na harikianga na Vure, i vakatavaga e huriki ri giloa.

¹²Na malunga liu, e huriki a apostolo vona ala ravulu a polona i rua ri takia e Isu, ri ta maea, “A hini si made vona i ngeki. O taki e huriki ri gi vano, ri gi lakea na maka tanga tabukoi, ri gi matakana a maki ni kani, a murina ni mahita.”

¹³Pali e Isu i koli, i ta maea, “Mu vakani ria.” Pali ri ta maea, “Mi tahoka kunana a bret i lima, a manu i rua. Ioe bara o ngaru mi gi habi a maki ne ria ri gi kani, bara si kona taro a maki bara i kara ria.”

¹⁴E huriki a bakovi ri made vonga ri ala rangale lima (5,000). Lakea e Isu i taki e huriki a murimuri vona, i ta maea, “Mu vakamade kabuna ria ravulu lima, ravulu lima.”

¹⁵Lakea ri rata manga a hini e Isu i taki, ri vakamade kabuna ria.

¹⁶Muri e Isu i bole rike a bret i lima, a manu i rua. I mata rike na hunu, i kavurikea a Vure. Muri i keve a bret, i putu a manu, i habi ne huriki a murimuri vona ri gi veru.

¹⁷E huriki lobo ri kani, ri maru. Muri ri tahoni na kulopi i ravulu a polona i rua a kalavana maki ni kani.

¹⁸Na parava tara e Isu i vasileki kikeri. E huriki a murimuri vona ri valai, lakea e Isu i nana ria i ta maea, “Re huriki, ri luhoi iau, ge iau e rei?”

¹⁹Ri koli ri ta maea, “E huriki ranga ri taki ioe, ta ioe e Ioanes, a mari ni vahilolo. Pali e huriki ranga ri taki ioe, ta ioe e Elaisa. Pali e huriki ranga ri taki ioe, ta ioe a propet hosi tara i mahuri mule tabu.”

²⁰Lakea e Isu i nana ria, “Pali mua, mu luhoi iau, ge iau e rei?” Lakea e Petrus i koli i ta maea, “Ioe e Kristo. A Vure i rudu ioe o valai.”

²¹Lakea e Isu i taki tora ria, nahea ri gi vakalongoa tara viri, i ta maea,

²²“A Tuna Bakovi bara i bole a nimadihi i kupo. E huriki a gare, a prister dagi, a mari na vinara bara ri marikoi vona, ri rabalakia. Muri na parava i tolu bara i pesi rike mule na matenga.”

²³Muri i taki ria lobo, i ta maea, “E rei a viri i ngaru ni muri nau, ge lohopile a ningaru vona, ge kalohoa na parava vakaroro a kai tavalavala vona, ge ramai iau.

²⁴E huriki ri hataro iau, ne vona ni korimule a kuline ria, bara ri velu. Pali e huriki ri mate a vuhuna ri ramai iau, bara ri bole a nimahuri vakaroro.

²⁵Ge ra a viri i tahoka a mahala lobo na malala, pali ge velu ia?

²⁶E rei a viri i maruhu nau, i maruhu na ngava nau, iau, a Tuna Bakovi, bara maruhu vona na tahuna a valai na bagetuanga nau, a bagetuanga ne Tata, a bagetua ne huriki a agelo kamumu.

²⁷A taki muholi mua, i ranga ne mua, ra mu pepesi koea, i uka ma mu gu mate ma, bara mu matai a harikianga na Vure.”

²⁸Na parava i polotolu muri ne Isu i taki ra ngava nga, i tuli e Petrus, e Ioanes, e Iakop, to sike na lolo ge vasileki.

²⁹Na tahuna e Isu i vasileki, a matana i mapulo, i mata tebi. A varakia vona i parahidi manga a vila i maravila.

³⁰A bakovi ala rua, e Moses e Elaisa, ru bele vakaturutu turana bagetuanga na hunu, ru ta turana e Isu. To vata vona e Isu ge mate o Ierusalem.

³²E Petrus turana e vikirua to mahita mate, pali na tahuna to hadongo, to masia a nipara ne Isu turana bakovi nga ru pepesi turana.

³³Na tahuna e Moses e Elisa ta ru gu pe purua e Isu, lakea e Petrus i takia e Isu i ta maea, “Bakovi Dagi, i kamumu hateka mete valai. Mete ge hae a kape ge tolu: ne vomu tara, ne Moses tara, ne Elaisa tara.” E Petrus i ta tavulavula kunana.

³⁴Na tahuna e Petrus i ta ta, a havu i puru i kavitagu tou, lakea to mangenge.

³⁵A lohona viri tara i gale tala na bubu, i ta maea, “Ia e Tugu, a vulakia pali. Mu longo mai a ngavana.”

³⁶Na tahuna i ta lobo pali, to masia e Isu kikeri i pepesi vonga. Muri e Petrus, e Ioanes, e Iakop i uka ma to vakalongo lae vona a maki to matai. To mangulukari kunana.

³⁷Na parava muri ri raga puru na lolo. Na tahuna ri puru pali na lolo, ri matai e huriki ala kupo ri davea e Isu.

³⁸A bakovi tara i pesi turane ria i gale tala, i ta maea, “Mari ni tovo, a ngaru ioe go koria e tugu a bakovi, a madiva.

³⁹Na parava ranga, a hanitu i dili vona, i ratea i haloho vakaturutu, i tangi torutoru, i bubu vona a vere a ngavana. Muri, na tahuna e tugu i malulu liu a tuhana, a hanitu bara i ha taroa.

⁴⁰A nana tora pali e huriki a murimuri vomu ta ri gi korimulea, pali ri keri.”

⁴¹Lakea e Isu i ta maea, “Mua o huriki na tahuna mona, i uka ma mu luhoi torea a Vure. A narone mua i hale hateka. Ge navai? Ga hatenono mavonga ni dava mua, mu gu luhoi tora iau?” Muri i takia a bakovi iea, i ta maea, “O tuli vilia e tumu.”

⁴²Na tahuna a koma i laho valai ne Isu, a hanitu i voro purua na malala, i ratea i tangi torutoru. Lakea e Isu i tahatea a hanitu, i korimulea a riau, muri i habi mulea ne tamana.

⁴³E huriki lobo ri ngapa vona a nitora dagi na Vure. Na tahuna e huriki ri vata lae vona a maki e Isu i ratea, lakea i taki e huriki a murimuri vona i ta maea,

⁴⁴“Mu longo kamumu a maki ga taki mua vona. A Tuna Bakovi i tabukoi bara ni habi na limane huriki a bakovi.”

⁴⁵Pali e huriki a murimuri i uka ma ri longokilalea a pelegona ngavana, a vuhuna ni ruhulolo ne ria. Ri mangenge ni nanea ge taki talea ne ria a pelegona.

⁴⁶Ngane e huriki a murimuri ri vaka­tubu ni vahehe lae ne rei ne ria i dagi hateka.

⁴⁷E Isu i lohoka vona a niluhoi ne ria, i tulia a koma tara, i vakapesia tabukoi vona.

⁴⁸Muri i taki ria, i ta maea, “E rei a viri i taguia a koma kiroko maea na ragu, i tagui iau. E rei a viri i tagui iau, i taguia ra viri i rudu iau a valai. E rei a viri a bakovi tavula ne mua lobo, ia kunana a viri bara i muga ne mua.”

⁴⁹E Ioanes i ta rike i ta maea, “Bakovi Dagi, mi masia tara bakovi i lili tala a hanitu na ramu, lakea mi tahatea, a vuhuna i uka ma ia a tara ne hita.”

⁵⁰E Isu i koli i ta maea, “Naha ni ta pupukari vona. E huriki i uka ma ri tepu mua, ria a turane mua.”

⁵¹I tabukoi ngane e Isu ge sike na hunu, lakea i luhoi tora ni vakatubu ni havai lakea o Ierusalem.

⁵²I rudu muga a vinuru vona ri gi lakea na tanga tara na tabeke ne Samaria, ri gi pelekado a dalana, ge made popote vonga.

⁵³Pali e huriki vonga i uka ma ri garinga mai ia, a vuhuna i laho lakea o Ierusalem.

⁵⁴Na tahuna e Iakop e Ioanes ru masia a naro ne ria, ru takia e Isu, ru ta maea, “Bakovi Dagi, miri gi rudu raha ria, ge puru valai na hunu a kanono, ge gutuparina e huriki nga.”

⁵⁵Pali e Isu i tahate rua.

⁵⁶Muri ri laho polopolo lokovonga, ri made na tanga tara.

⁵⁷Na tahuna ri laho na dala, a bakovi tara i takia e Isu, i ta maea, “I vai a hini go lakea vona, ga muri mai ioe kunana.”

⁵⁸Lakea e Isu i koli i ta maea, “A kaugara i tahoka a dupina i mahita vona. A kadirovo i tahoka a nuna i mahita vona. Pali a Tuna Bakovi i uka ruma ge mahita vona.”

⁵⁹E Isu i taki tabua tara bakovi i ta maea, “O muri nau.” Pali a bakovi iea i koli, i ta maea, “Bakovi Dagi, ga vano taro ga tanua e tata.”

⁶⁰Lakea e Isu i takia, i ta maea, “E huriki ri made na uvo ri manga e huriki a viri ri mate pali. O taparaki ria ri gi tanu e huriki a viri ne ria. Pali ioe, o vano o vakalongo e huriki na harikianga na Vure.”

⁶¹A bakovi tara i valai tabu ne Isu i ta maea, “Bakovi Dagi, iau a ngaru ni muri vomu. Pali ga vano taro ga tarulu puru a kabu nau.”