Lukas 23:5-43

⁵Pali ri hinituhana, ri ta maea, “Ra bakovi iea i laho viliha na tabeke ne Iudea, i vakarike a hatene huriki, ri rata tuhare, i vakatubu o Galili, i valai liu koea.”

⁶Na tahuna e Pilato i longoa a ngava iea, i nana ria ne Isu a bakovi o Galili, o i uka.

⁷Ri vakalongoa ne Isu a bakovi o Galili, lakea i rudua e Isu ge masia e Herod, a vuhuna e Herod i matakari a tabeke ne Galili. Na tahuna iea e Herod i made vonga o Ierusalem.

⁸Na tahuna e Herod i masia e Isu, i vivi hateka, a vuhuna i longoa pali a nuverei ne Isu, i pasimata ni masia, ge rata a nivakasiri.

⁹Lakea e Herod i nanea e Isu na ninana i kupo, pali e Isu i uka ma i kolia tara ngava.

¹⁰E huriki a prister dagi, a mari na vinara ra ri pepesi vonga, ri ta hinituhana ni padi virihi tavulea na ngava.

¹¹E Herod turana e huriki a nugumaheto ri padikede loboa e Isu, muri ri vakarodoa na varakia na hariki, ri rudu mulea ne Pilato.

¹²Muga e Pilato e Herod ru vagima. Pali na parava iea ru vamule mai.

¹³Muri e Pilato i gale palupu e huriki a prister dagi, a matakari, e huriki a bakovi a ngatavine.

¹⁴Lakea i taki ria i ta maea, “Ra bakovi iea, mu turari vilia nau, mu takia ta i tami e huriki. Pali iau a nanea na matane mua lobo, i uka ma a matai ranga naro hale ge manga a hini mu taki.

¹⁵E Herod tara i uka ma i masia vona tara naro hale, lakea i rudu mule vilia ne hita. Mu longo! Ra bakovi iea i uka ma i ratea tara maki ge hale ge mate vona.

¹⁶Pali ngane ga lagu kunanea, muri ga tonoa ge vano.”

¹⁷Pali e huriki lobo ri gale dagi ri ta maea, “Ge mate a bakovi iea! E Barabas a viri ge pagitala!” Ri ta maea, a vuhuna na pida lobo na Habu na Nipagepolo e Pilato bara i bole talea na bavi a bakovi tara, ge vano.

¹⁹E Barabas ni ru dili na bavi, a vuhuna i vakatubu a vaubinga turana e huriki a Rom, i rabalaki a viri.

²⁰E Pilato i taki tabu e huriki vona e Isu ge pagitala.

²¹Pali ri gale dagi tabu ri ta maea, “O paditatea na kai tavalavala! O paditatea na kai tavalavala!”

²²Balaka tolu ngane i taki ria nahea ge mate, i ta maea, “I navai ge mate? A ra naro hale i ratea? Iau i uka ma masia vona tara maki ge hale ge ratea ge mate vona. Pali ngane ga lagu kunanea, muri ge vano.”

²³Pali ri gale hinituhana vona e Isu ni gi paditata malaviriri. Ri gale dagi hateka,

²⁴lakea e Pilato i longo mai ria.

²⁵I vakapagetalea e Barabas ra ni ru dili na bavi na hini i vaubi i rabalaki a viri, pali i ramai a ningaru ne ria, i rudua e Isu ni gi rabalaki.

²⁶Na tahuna e huriki a nugumaheto ri turari lokovongea e Isu, ri masia e Simon, a bakovi o Sirene, i valai basi ge dili na tanga. Lakea ri vakukua ge kalohoa a kai tavalavala ne Isu, ge laho muri vona.

²⁷E huriki ala kupo hateka ri laho muri ne Isu. E huriki a ngatavine ranga, ri dua muri vona.

²⁸Pali e Isu i matagege, i taki ria, i ta maea, “Mua o huriki a ngatavine o Ierusalem, naha ni taringi iau. Mu taringi mule mua, mu taringi e tune mua,

²⁹a vuhuna a parava popote ge valai e huriki ri gi ta maea, ‘Ri gi vivi e huriki a ngatavine ri lame, i uka ma ri vakaruru a koma.’

³⁰Muri e huriki bara ri taki a maka lolo a kupona ge kavitagu ria.

³¹E huriki ri rata mavonga na kai gareka, bara ri rata hale hatekea a kai munae.”

³²A bakovi hale ala rua ranga ni turari turane Isu ni gi rabalaki.

³³Na tahuna ri bele na tanga ni gale e Tuha-Gigi, e huriki a nugumaheto ri paditatea e Isu vonga na kai tavalavala. A bakovi hale ala rua, rua ranga ni paditata na kai tavalavala. I tavore na kanena tara, i tavore na maurina tara.

³⁴Muri e Isu i ta maea, “Tata, o puga a naro hale ne ria, a vuhuna i uka ma ri lohoka vona a maki ri rata.” E huriki a nugumaheto ri rehi vona tara rihiva. A viri bara i mulangi bara i bole a varakia ne Isu.

³⁵E huriki a bakovi a ngatavine ri pesi, ri matanono. E huriki a matakari ri padikedea e Isu, ri ta maea, “I korimule e huriki ranga. Pali ge ia e Kristo, a Viri a Vure i Vulakia, ge korimulea.”

³⁶E huriki a nugumaheto, ria ranga ri padikedea, ri valai ne Isu, ri habi vona a vain vagole ge ninu.

³⁷Lakea ri ta maea, “Ge ioe a hariki ne huriki a Iuda o korimule ioe.”

³⁸Ni here polo meli na kai tavalavala a ngava nga: “Ra Viri Iea A Hariki Ne Huriki A Iuda.”

³⁹A bakovi hale tara i tavore na kai tavalavala i ta hale ne Isu, i ta maea, “Ge ioe e Kristo, o vakakori ioe, muri o kori maria.”

⁴⁰Pali a bakovi hale tara i tahatea, i ta maea, “I navai o uka ma o mangenge na Vure? Ioe tara o bole a nimadihi manga ia.

⁴¹Pali tarua ni vakamadihi na naro hale tu rata. Pali ra bakovi iea i uka ma i ratea tara naro hale.”

⁴²Muri i takia e Isu, i ta maea, “Isu, na tahuna o lakea na harikianga vomu, o luhoi iau.”

⁴³E Isu i koli i ta maea, “A taki muholi ioe, mona bara o made turagu na paradiso.”