Lukas 23:28-41

²⁸Ma Yesus drai taigi den taki: “Uma fu Yerusalem, un no krei fu Mi ede, ma un krei gi unsrefi nanga den pikin fu unu.

²⁹Bika wan ten o kon pe sma o taki: ‘Den uma di no man kisi pikin, nanga den wan di no kisi pikin ete, abi koloku. Èn den uma di noiti gi pikin bobi, abi koloku tu.’

³⁰Dan den sma o bigin taigi den bergi taki: ‘Fadon na un tapu!’ Den o taigi den pikin bergi taki: ‘Kibri unu!’

³¹Bika efu na disi den e du nanga a lala udu, san den sa du nanga a drei udu dan?”

³²Makandra nanga Yesus, den ben tyari tu abani gwe fu go kiri.

³³Di den doro na a presi san den e kari Dede-ede, den spikri Yesus na a kroisi. Den spikri den tu abani na wan kroisi tu: wan na En let'anu sei, èn a trawan na En kruktu-anu sei.

³⁴Dan Yesus taki: “P'pa, gi den pardon, bika den no sabi san den e du.” Dan den hari a lot fu prati En krosi.

³⁵A folku ben tnapu e luku, èn den edeman fu den ben teki En meki spotu. Den taki: “A ben yepi trawan. We, meki A yepi Ensrefi efu En na a Mesias, efu En na a Wan di Gado teki fu du En wani!”

³⁶Den srudati teki En leki spot'popki tu. Den waka kon na En, dan den gi En swa win fu A dringi.

³⁷Dan den taki: “Efu Yu na a Kownu fu den Dyu, yepi Yusrefi!”

³⁸Den ben skrifi poti na En edesei: “Disi na a Kownu fu den Dyu.”

³⁹Wan fu den abani di ben anga na a kroisi, afrontu En taki: “A no Yu na a Mesias? We, yepi Yusrefi, dan Yu yepi unu tu!”

⁴⁰Ma a trawan bari en taki: “Yu no e frede Gado, no? Yu kisi a srefi strafu leki En.

⁴¹A strafu san un kisi fiti unu, bika disi na a paiman fu san un ben du. Ma a Man disi no du no wan ogri.”