Lukas 21:4-30

⁴Pun ir meinisin ra püngülong somwen wöür, nge neminei, seni an wöüngau a püngülong meinisin mine a wor ren, a fangala meinisin mine a manau seni.”

⁵Iwe, ekoch me lein ekewe chon kaiö ra kapas usun ewe imwenfel, usun lingöchün ren ekewe fau mi mürina, pwal ren ekewe lifang aramas ra eäni asor ngeni Kot. Nge Jesus a apasa,

⁶“Iei oua küna ekei mettoch meinisin. Nge epwe war ewe fansoun, lupwen esap fokun wor eföü fau epwe chüen nom lon lenian. Meinisin ekei fau repwe toropasetiu.”

⁷Iwe, ekewe chon kaiö ra aisini Jesus, “Sense, inet ekei mettoch ka fos usun repwe fis? Meni asisil epwe pwärätä pwe a tori ewe fansoun an epwe fis ekei mettoch?”

⁸Jesus a üreniir, “Oupwe mamasa, pwe esap wor eman epwe atupukemi. Chomong aramas repwe feito fän itei o apasa, ‘Ngang ewe Kraist,’ pwal ‘Ewe fansoun an epwe war a arap.’ Ousap tapwela mürir.

⁹Ousap fokun niuokus lupwen oupwe rongorong pworausen maun me fitikoko. Ekei mettoch repwe akomwen fis, nge esap tori mwo fansoun sopolan.”

¹⁰Mürin a pwal üreniir, “Ekewe fanü repwe fiufengen, ekewe mwü repwe maunfengen.

¹¹Epwe wor watten chechen fanü, pwal lengita me mätter ekis meinisin. Epwe pwal wor asisil mi watte o eniweniw seni fän läng.

¹²Nge me mwen ekewe mettoch meinisin repwe fisitä, repwe turufikemi o ariaföüükemi, repwe etekinikemiila pwe oupwe kapwüng lon ekewe imwen felikis o atolongakemi lon imwen fötek. Repwe pwal emwenikemiila mwen ekewe king me kepina pokiten itei.

¹³Ei fansoun epwe eu fansoun mi fich ngenikemi ämi oupwe apworausa ewe Pworaus Allim.

¹⁴Iei mine oupwe anomu lon lelukemi pwe ousap öüreki me mwan mine oupwe apasa,

¹⁵pun üpwe fang ngenikemi ekewe kapas me tipachem, pwe esap wor eman chon oputakemi epwe tongeni ü ngenikemi ika öpölüakemi.

¹⁶Sememi mwo me inemi, pwimi, aramasemi me chiechiemi nge repwe afangamäkemi, nge ekoch leimi repwe ninnila.

¹⁷Aramas meinisin repwe oputakemi pokitei.

¹⁸Nge esap wor emet meten möküremi epwe turula.

¹⁹Ren ämi likitü oupwe püsin amanauakemi.

²⁰“Iwe, lupwen oupwe küna pwe sounfiu ra pwelifeili Jerusalem, mürin oupwe silei pwe a arapoto fansoun an epwe tala.

²¹Mürin chokewe mi nom lon Jutea repwe sütä won ekewe chuk. Chokewe mi nom lon ewe telinimw repwe towu seni, nge chokewe mi nom lemäl resap tolong lon ewe telinimw.

²²Pun iei ekewe ränin apwüng, nge epwe popuetä meinisin mine a mak lon ekewe Toropwe mi Pin.

²³Riaföün ekewe fefin mi pwopwo me ekewe inelap mi oupwu nöür lon ekewe rän, pun epwe wor riaföü mi lapalap lon ei fanü o än Kot song epwe tori ekei aramas.

²⁴Ekoch repwe ninnila ren ketilas, nge pwal ekoch repwe oola lon ekewe fanü meinisin. Iwe, ekewe chon lükün Israel repwe purätiu Jerusalem tori fansoun än chon lükün Israel nemenem a wes.

²⁵“Iwe, epwe wor ekoch lapalap epwe fis ngeni akkar, maram me fü kana. Nge won fanüfan chomong fanü repwe nom lon watten riaföü, repwe niuokus ren ngüngün matau me püngüpüngün no.

²⁶Aramas repwe masarochola ren ar niuokus, lupwen ra witiwiti mine epwe fis won fanüfan, pun ekewe manamanen läng repwe mwöküt seni lenier.

²⁷Lon ena fansoun repwe küna Nöün Aramas, epwe feito won kuchu fän manaman me ling mi lapalap.

²⁸Lupwen ekei mettoch repwe popuetä le fis, ämi oupwe ütä o awenatä möküremi, pun ämi küna manau a arapoto.”

²⁹Iwe, mürin Jesus a apworausa ngeniir eu pworausen awewe: “Oupwe nenengeni ewe irä fiik me ekewe irä meinisin.

³⁰Lupwen oua küna pwe chör ra pwüküwu, oua silei pwe a arap fansoun räs.