Luka 8:3-44

³Inbe Yoana yo Kusa rimana i, in itoo Yesu lapau. Ngan Kusa tani in iyei ben tool kuto mai atu a matan kala rumu ke Erot. Inbe Susana iye di garup kapala lapau la titoo Yesu nga. Di garup tina ngan tikap so kidi tapdi pang Yesu iye di galiunu a tilon di ye lapau.

⁴Ngan di tamoto malala mai la tipa ye malala maimai kapala a timan le man tigaua. Motong la Yesu ikatte betanga atu pang di nen,

⁵“Ye kene atu ngan tool ke kapkingi atu in ikap dingding patunu ke kaningi be la igiri kumu ki. Ngan kene yo igiri ye in nga, ngan kapala imol du dada katene. Ngan nen le di tooltool tipa pono, inbe di man yo tiro lang katene ngan tikamata le man tikan.

⁶Inbe dingding patunu kapala ngan imol du ye tana yo ke lopo ki in bongarngar i, le tisup dook mata a tise, bong mooloo tiap inbe timallai a tiwor, yesoo bong tana tani ke lopo ki in bongarngar le taukan ran.

⁷Inbe dingding patunu kapala ngan imol du ooroo kaudangdang lono. Ngan nen le tisup pa ye kaudangdang le ooroo kaudangdang tani in iturai di le tisup dook tiap.

⁸Bong dingding patunu kapala ngan imol du ye tana yo dook mata nga. Ngan nen le tisup dook le dingding tina kaini atu atu ngan titar kanodi alunu welewele ben 100.” Yesu ikatte betanga pang di nen a imot, motong la koonoo nen, “Sei tool be talngana ke longono betanga nga, ngan itar talngana dook a ilongo betanga kiau nga.”

⁹Ngan Yesu di galiunu titoru be iwete nini betanga tani yo ikatte i, in punu pang di.

¹⁰Motong la iwete pang di nen, “Muku ngan dada yo Maro be matan kala di tooltool ki ye i, in iken sollono, bong nookoot nga ya in lon ponana be ipaposi pang a lomim galanga ye dook. Bong di tooltool kapala nga, ngan ole akatte betanga pang di leu. Ngan nanga, ‘Ole tikamata urata ke Maro, bong o ke be tikilala tiap. Inbe ole tilongo betanga ke Maro, bong o ke be lodi galanga ye punu nga tiap.’ ”

¹¹Motong la Yesu iwete nini betanga tani yo ikatte i, in punu pang di nen, “Dingding patunu tina, ngan ben betanga ke Maro.

¹²Inbe dingding patunu yo imol du dada katene nga, ngan ben di tooltool kapala yo tilongo bingi dook mata ke Maro. Bong tool kuto mai kidi so sadi iman tina ngan le ikaua betanga tani yo iken lodi in a igutaki ye di. Ngan tina nen le titara lodi medana pang Maro a be nen ngan ikap di a ipamulu di ye so dook tiap yo be igarung di i, in tiap.

¹³Inbe dingding patunu yo imol du ye tana yo ke lopo ki in bongarngar nga, ngan ben di tooltool kapala yo tilongo betanga ke Maro le tikauu a lodi ponana ye nga. Bong betanga tina ngan tiparama le imede tiap, ngan nen le titara lodi medana ye mai mata tiap lapau. Yeisa be touanga pombe pang ye di ngan tiyege lodi medana yo titaru i, inbe tiwala muridi pang Maro.

¹⁴Inbe dingding patunu yo imol du ooroo kaudangdang lono nga, ngan ben di tooltool kapala yo tilongo bingi dook mata ke Maro. Bong lodi rru be ole titoo too tiap, yesoo lodi modoko mata ye yepongo kidi ke tana i, inbe balingi le so dook mata kapala yo be tikap a lodi ponana ye nga. Ngan nen le di ngan ben dingding patunu yo tisup bong titar kanodi tiap.

¹⁵Bong dingding patunu yo imol du ye tana dook mata nga, ngan ben di tooltool yo lodi ken dook mata be tilongo bingi dook mata ke Maro a titara lodi medana ye. Inbe di ngan tikodo le timede ye lo medana kidi lapau. Ngan nen le di ngan ben dingding patunu yo tisup a tise le titar kanodi alunu kaiye nga.”

¹⁶Motong la Yesu ikatte betanga san mulu nen, “Tool sa ke be ilanga sul ki bong, lo ngan be inona lo bor lono a itarkoo tiap. Inbe ole itaru du kookoowoo ke kenongo parmana, tiap lapau. Bong ole ipawoti lo ete, a be nen ngan di tooltool be tise rumu lono ki ngan tikamata ni ye nunngana.

¹⁷Ngan nanga, so le imot yo di tooltool titarkoo a iken sollono nga, ngan pang dama ni ngan ole Maro ipapos se mallangana. Inbe betanga yo titarkoo le di tooltool ke be tilongo tiap nga, ngan ole ise mallangana le imot lapau a di tooltool lodi galanga ye.

¹⁸Ngan ang ngan kin kakawai yang dook a be nen ngan katar talngamim dook a kalongo betanga kiau. Kumata le sei tool be lon galanga ye betanga ke Maro a itoo nga, ngan ole Maro ipagalanga lono ye betanga ki sa mulu. Bong sei tool yo lon galanga ye betanga ki kasin, bong itoo tiap i, in Maro ole igutak lo galanga kasin yo lon tar be iken ye nga, ngan le iyepe sokorai.”

¹⁹Motong la ye kene tani in Yesu tinana le di taini timan be man tikamata. Bong ngan rumu ipon ye di tooltool malala mai, le tisak be tilo rumu lono.

²⁰Le nga tool atu lo iwete pang Yesu nen, “Ai, tinam le di taim la man tikododo diki nga, ngan lodi be tikamatong.”

²¹Motong la Yesu iraua betanga ki nen, “Di tooltool yo tilongo betanga ke Maro le be titoo nga, ngan di ngan la di tinak le di taik nga.”

²²Ye kene atu in Yesu iwete pang di galiunu tina nen, “Ai, nga ole tala ke ran koonoo kapala.” Le nga tiyiri lo ookoo pono, motong la tikooi a tila.

²³Ngan tikooi me pono go, inbe Yesu iken mata. Bong eng mai imadit tina le tiek ipases a ilo ookoo lono, le kasin leu be ookoo kidi imere.

²⁴Le nga di galiunu tina ngan tipoongoo. Tiyei ne, “Tool mai, tool mai, kumadit! Nga be tallede!” Motong la Yesu imadit tina le iwete katkat pang eng le kokor tina, le taun katen si, inbe ran manini dook mata.

²⁵Motong la Yesu iportak pang ye di galiunu tina, inbe iwete pang di nen, “Ai, ngan lomim medana yo be kataru pau i, in la nangai i?” Bong di galiunu tina titakrai welewele, inbe tatattadai lapau, le di tapdi tiwetewete pang di nen, “Ona tiap! I soo tool nen i a le iwete katkat pang eng le ran ngan le tilongo koonoo nga?”

²⁶Ye kene tani in Yesu iye di galiunu tina ngan tipie ye ookoo kidi a tila le la pombe ye tana mai Gerasa  yo iken ke ran Galili koonoo kapala i.

²⁷Tila pombe, le nga Yesu ipas ke ookoo pono a idi pang tana, ngan tool ke malala mai tani in atu yo so sadi idiwidiwoo i, in ipot le pot itauaraii. Ya in mukot yege ni nga, ngan ipital touo wam sa yo be iyakala tinini ye, ngan tiap. Inbe iyepe ye rumu siap lapau, bong ipas le iyepe agoro lono kidi matenge leu.

²⁸Yeisa be tool tani in ikamata Yesu, motong la itang le mai, inbe imol du igun turunu Yesu kene punu, inbe koonoo le mai. Iyei ne, “Atoo! Yesu, ong i Maro yo iyepe ete ni, in natunu. Nga soo so be kuyeii pau i? Atorong be kin kop masngana pau be!”

²⁹Ngan koonoo le mai nen, yesoo bong Yesu ipasak pang so sadi tani be ikoo ye tool tani in a isi tana. Ngan kanakana ngan di tooltool kapala tiparama a tipau kene le baene ye ooroo medana, inbe tikodo a matadi kala. Bong so sadi idiwidiwoo le gurana mata le ikupkuprai ooroo medana tina, inbe idada a ila iyepe ye ni yo taukan tooltool i.

³⁰Motong la Yesu itoru nen, “Ong i em sei?” Ngan iraua betanga ke Yesu nen, “Au i ek la Budanga i.” Ngan iwete nen, yesoo bong so sadi alunu la tiyepe ye tool tani nga.

³¹Ngan di so sadi tina titor tootoo Yesu a timangmang ye nen, “Atoo, kin kungangam a amdu amyepe ye tana gumono yo taukan launu, in be.”

³²Ngan ga budanga mai tisu a tikanen ye kawal atu yo iken potai pang ye di i, in madini. Motong la di so sadi tina titoro Yesu a timangmang ye be imalum pang di a tila la tidewe a tilo di ga tina ngan lodi. Ngan le Yesu imalum pang di be tila.

³³Le nga di so sadi tina ngan tipas a tiyege tool tani, inbe tidada a tila le la tidewe a tilo di ga tina ngan lodi. Motong di ga tina ngan tidada a tila sakar matana a tipas du ran lono le taun tidadup a timmata.

³⁴Le nga di tooltool tina yo matadi kala di ga nga, ngan tikamata so tani in ye matadi. Motong la tidada a tilo lo tikaua bingi pang di tooltool yo tiyepe ye malala maimai inbe ye malala yo kapala ngan lapau.

³⁵Di tooltool tilongo bingi, le nga tidu be du tikamata so tina yo pombe nga. Ngan tidu pompombe pang ye Yesu nga, ngan tikamata tool tani yo so sadi iyege i, in kuton ikaua urata dook mulu, inbe isousou ye sousoungu a iwurur potai pang ye Yesu kene punu nga. Ngan nen le titattadai.

³⁶Motong di tooltool tina yo tikamata Yesu inganga di so sadi ye tool tani nga, ngan tigasa urata tani yo Yesu iyeii panga le tinini dook mata mulu i, in pang di tooltool tina yo tisi nga.

³⁷Ngan di tooltool le imot ke tana mai Gerasa tilongo gasanga tina le titattadai welewele, le nga tiwete pang Yesu be ikoo ye ni kidi, inbe ila pang ye ni san mulu. Motong la Yesu ipas lo ookoo pono a be imulu a ila.

³⁸Bong tool tani yo so sadi ikoo ye i, in itoro Yesu a imangmang ye be imalum panga a nen ngan iye tila. Bong ngan Yesu imalum panga tiap. Iyei ne,

³⁹“Kumulu a kulo pang ye malala kiong, lo kugasa pang di tooltool ye so dook mata yo Maro iyeii pong i.” Motong la tool tani, in imulu a ilo pang malala mai a lo igasa pang di tooltool ye so tina le imot yo Yesu iyei panga nga.

⁴⁰Motong la Yesu iyege ni tani, inbe iye di galiunu tiyiri ye ookoo kidi a timulu a tila pang ran koonoo kapala. Ngan le di tooltool malala mai yo titar matadi ye a tinamu nga, ngan tikamata le lodi ponana ye yo imulu a ilong pang ye di nga.

⁴¹Inbe tool atu yo ene Yairus i, in ipa a idu. Ngan ya in tool mai atu yo matan kala rumu kidi Yuda ke gaongo i. Le nga idu ikamata Yesu, motong la igun turunu du Yesu kene punu, inbe itoru a imangmang ye be yaru tidi pang rumu ki.

⁴²Ngan imangmang ye nen, yesoo bong Yairus tani in natunu garup ataleu, inbe rai ki sangaul be ru leu, bong matamatenge mai ikauu le be imata. Motong la Yesu ipa a be idi pang ye rumu ke tool tani, ngan le di tooltool malala mai tina ngan titoo lapau le tiparlokoloko.

⁴³Ngan garup atu yo iyolo rara ye rai sangaul be ru i, in iyepe lapau. Bong tool sa be ikamata a iloni, a nen ngan ikarata le tinini dook mata mulu, ngan tiap.

⁴⁴Motong la garup tani in ipa ke Yesu murini le isulmaia baene la itoko sousoungu matolene ke Yesu, in matana. Yeisa be iyei nen, ngan le pattu leu be rara mooloo tani in imot ye le iwodowodo dook mata.