Luka 23:27-41

²⁷Isege ata moagaeau ehovai timale kebia vigomo keate degomoleau avuho uvulahai ninalahama.

²⁸Kateisege Iesuu abue vudihei namigevei avoe, “Dielusalema keatea, lainaho daho ninalahalive. Isito la ebikaho uvulahai la esetaho uvulahai ninalahave.

²⁹Kosealemo vanie toelau lohoma. Iale vani kemo ataeabuna bae loui kosea, ‘Keate oleuoleu ese tobute maleholiale keau duave. Isi ese gite houeveholiale keau duave.’

³⁰Vani kateimalela ataeabuna loui kosea, ‘Tana baluga isi eseve dobai no bamuevege no haluvisi.’

³¹Dau idi isahete ke nahate. Isege laeau idi gilite ke nahate. Iale abu vaveve toela koseale daemo valiege vaveve toela baluga seleve abuna laemo vai.”

³²Kateai louge tuvalie ataeau Iesu melavei dibulae ata abuita kebiata holoevei tiale ata havemale matamae velehovolu. Matama ke ivilike Lolokue matama. Matama keve abu Iesu mai idie domo hamai dibulae ata kebiata havelu. Moleu adave inuteveatae. Isege moleu agiteveatae.

³⁴Ige Iesu noinoiai avoe, “Mamai, vaveveabe toela uliha. Abu vaveve ko vamale ko abu hilokaholilu.” Kateai lousege tuvalie ataeau Iesu ogo maliho kasilahai ogove igaegaeai malelu.

³⁵Ige ataeau elehasege Diue kosive keau Iesu hehavoi moleho loui avoe, “Keu ata degomole tedaevenu. Isito Dilavau ke ebagemage keu Keliso holivatebene au ebika tedahoi dobai lohonu.”

³⁶Kateai lousege tuvalie ata kebiata hehavoi tiale e toela mai omilu.

³⁷Isi loui avoe, “A Diue atae kosive holiniege a ebika tedahoi dobai lohonela.”

³⁸Kateai kinave tatamo hoto mole hisaliai avoe, “Kou Diue kosive balugaike ko.”

³⁹Ige abu dibulae ata mai hamale ke moleu hotoe toela loui Iesu belahai avoe, “Seleveta Keliso aniko. A Keliso holiniege a ebika tedahoi nota tedaevenela.”

⁴⁰Kateai louge moleu avuho loui avoe, “Hoto kateale louhalenela. Ana Dilava vabuhavoholinu. Nahiabuna avuluvuta haluvisi.

⁴¹Nahiau vaveve toela vamale ataea. Iale ibinavehoike nahi vatehani ko malelu. Isito malaha keu vaveve toela vaholisito vatehani malenu.”