Luka 1:33-75

³³Iakobo boganayao ia abo tanuagadi eai i lau e nige nosina; ena basileia hinage taba nige ena abalautom.”

³⁴Maria abo i ribalau aneru arinai i ene, “Wau wa abo edoha egu abiabina, eau nige monegu?”

³⁵Aneru arinana abo i heuio i ribalau ia arinai i ene, “Earua Tabuna abo i dobima, Saesaedaoina ena gigibori abo i helogulogum: arinai hinage meta ginauri tabuna wa abo u labasi esana abo se ribaei Eaubada Natuna.

³⁶Am bogaoyao‐sinena Elisabeta i sinesinebadao, hinage ie boga abo i haisu tau, ia i agari wa ena nawalai harigigi‐esega se lauo.

³⁷Paana ede Eaubada nige ginauri esau ie deha, abo i ginauri.”

³⁸Maria abo i ene, “Eau ina, Guiau ena heaheari sinena; u ribaei wa besi abo i tubu arigu eai.” Aneru ia abo i laugabaei.

³⁹Nei asubenana ne Maria i torohai, i lau heuheula oea tupidi eai, eanua esau Iudea eai,

⁴⁰i awasae Sakaria ena numa eai Elisabeta i aitoiei.

⁴¹Elisabeta Maria ena lautoi i ataiei, natuna bogana eai i lamposi; Elizabeta Earua Tabuna i monau

⁴²i ribalau arinana lailai i ene, “Sisine aridi eai oabom se hedebasaem, bogam aniona i sae ariri!

⁴³Egu lolo saha egu Guiau sinana i laoma arigu eai ta?

⁴⁴U aitoiegu wa, arinam beagu eai ea ataiei, kaimou bogagu eai ie kode eo i lamposi.

⁴⁵Sunusunuma sinena abo i nuawoiwoina, meta ginauridi Guiau ia i heriba wa, abo hinage se hemamohoiedi.”

⁴⁶Maria abo i ene, “Guiau nuagu eai ea hedebasae.

⁴⁷Eo earuagu ie kode Eaubada, Tauhemaurigu arinai.

⁴⁸Ena heaheari sine epoeposisina i nuaamnaei: ina ta i lau e isina gamagamagari abo se riba loloegu.

⁴⁹Paana ede taugigibori ginauri saesaedi i hetubudio arigu eai, esana tabuna ede.

⁵⁰Ia matausina taumatausi abo i nuatoatoadi i lau e hari isi, hari isi.

⁵¹Ia nimana eai ena adidiri i hemasarahayao; tauribaribahetausaeuioidi edi nuatu gaibu arinai i hetatagorigoridio.

⁵²Tatao saesaedi edi abababawa eai i heguridio: tatao epoeposisidi i hedebasaedio.

⁵³Tauguriguriam ginauri lolodi eai bogadi i hesesedio: taumonamonaune i hetamariuioidi ma nima ahaahadi.

⁵⁴Ena heaheari Isaraela i saguiyao, ena nuatoatoa i henuaisini.

⁵⁵Doha i ribaeyao wa tamadayao aridi eai, Aberahama arinai, eo tumanayao aridi eai i lau e nige nosina.”

⁵⁶Maria nuana nawalai haiona Elisabeta arinai ie mia, abo i uio ena numa eai.

⁵⁷Elisabeta ena huia labalaba abo ie lage; natuna tau i labasi.

⁵⁸Helena taumia eo ena dodogayao Guiau ena nuatoatoa lailai wasana se ataieyao; maedi se kodegogoesega.

⁵⁹Asubena hehaligigi‐haionana eai se laoma merumeru wa bena se heperitome; esana se torelaei Sakaria, tamana esana se helaudamai.

⁶⁰Ia sinana arinana i heuio i ene, “Nige’e; ia esana abo Ioane.”

⁶¹Se ribalau ia arinai si ene, “Am bogao nige esau esana doha meta.”

⁶²Se nimanimaoi tamana arinai, si ene, “U ene gama ta esana?”

⁶³Abauriuri i aiboda, abo ie uri, i ene, “Ia esana ede Ioane.” Gamagaridi se nooei.

⁶⁴Ma esega abo ia awana i dabari, eo memenana i moimoiu, abo i ribariba eo Eaubada i aihelahui.

⁶⁵Heledi taumia gamagamagaridi matausi i abiunuidi: teina riba gamagaridi ta wasadi se helai i lau Iudea oea tupidi eanuadi se hetaiiridi.

⁶⁶Wau riba tauataiena gamagaridi isi se nuatuwatai, si ene, “Teina gama ta abo i hemala saha! Guiau nimana ia potana eai.”

⁶⁷Tamana Sakaria Earua Tabuna i monau, i riba peroveta, i ene.

⁶⁸“Guiau Isaraela edi Eaubada se aihelahui; Paana ena tataoyao i aitaumanaidi, eo i lebohaidi.

⁶⁹Mauri donana esau i lauisini enada ena heaheari Davida bogana eai.

⁷⁰Doha ena peroveta tabuna awadi eai i ribaei, tanoubu huia hetubuna eai wa i laoma e huia ta:

⁷¹ada waiunu nimadi eai abo se hemaurida, eo isi gamagaridi se ouyalayalaeda nimadi eai hinage;

⁷²nuatoatoa se ribahesunumayao tamadayao aridi eai abo se hetubu, eo ribahesunuma tabuna abo ta nuatui.

⁷³Aigora i aigorayao tamada Aberahama arinai,

⁷⁴enada abo i leama, ita ada waiunu nimadi eai abo se abihemaurida ia bena ta heaeaiei taba nige ta matausi.

⁷⁵Ia matana eai ma hetabuda, eo ma laulaududuraida; eda mauri asubenadi gamagaridi eai.