Luk 6:20-27

²⁰Ari Yesus ame gwalim ago disaipel gibiyad gibilan, Ne mataw ginaghan haiqta ham ne teq God ago maror aduganib gwahtiqeq anononmo tuqos daqay ham. Nazaq iyan ne tidimniyim osayta ham.

²¹Teq ne mataw gigemnan moqayta ham God teq nagah negid ne tigiyunindaq ham. Nazaq iyan ne tidimniyim osayta ham. Teq ne mataw gaqad osayta ham ne teq tiyuquw daqay ham. Nazaq iyan ne tidimniyim osayta ham.

²²Ne Mat Atatin muzinad inaq luwsa mataw ne ginan gigem meqniysa tigibaymuz daqay ham. Ad in ne gibilawunad gigilehunan tibilaq daqaymo ham. In nazaq ne gitonsa ne ginad dimniyan ham. Ne tidimniyim osayta ham.

²³Mataw nazaq ne gitonsa ne gigem dimniysa ginad dimun dikan iyan ham. Na ezaqgo ne gigo naw ayahmo Heven-ib ne gibaq tunim usaqta ham. Mataw ne gimeqin tonayta na gisesan in nazaqmo God ago nantut gimeqin ton yaqaymo ham.

²⁴Ari ne mataw ginaghan kabemmo usaqta ham ne timeqniyim osayta ham. Nagah ne gigem emid dimniydaqta na ne muranmo tuwaqay ham. Abeb teq ne God abenab naw araq dimunta a ta hi waq daqay ham.

²⁵Teq ne mataw muran didaq neqad gigem aseseqmo iyayta ham ne timeqniyim osayta ham. Abeb teq ne gigemnan tumoq daqay ham. Teq ne mataw muran yuquwayta ham ne timeqniyim osayta ham. Abeb ne gaq wazad atoranmo tigaq daqay ham.

²⁶Teq mataw og kabta bunmo in ne ginan dimunta haqsa ne gihol waziy ham. In nazaq ne gibin iluwsa ne timeqniyim osayta ham. Kwaziqmo mataw na gisesan gibaqbaqniz in nantut katiyta na nazaqmo ginan dimunta haq yaqaytamo ham.

²⁷Haqad Yesus bilam, Ne mataw ya iqez huritayta na ya ne kazaq gibilenaiq ham. Ne gibabun ginan ginad bilaqan ham. Ad mataw gigem meqinta negsa ne gilowan toniy ham.