Luk 6:20-27

²⁰Ude täŋ irirä Jesutä iwaräntäkiye yabäŋpäŋ ŋode yäwetkuk; In ätu jopi jäwäri it täkaŋ uwä säkgämän itkaŋ. Anututä ini tabäŋ täwat täyak.

²¹Täŋpäkaŋ in apiŋo ketem burenita tek täkaŋ uwä säkgämän itkaŋ. Kämiwä Anututä ini tepmäŋ towiwän api naŋ tokŋeneŋ. Ba in apiŋo konäm butewaki terak it täkaŋ uwä säkgämän itkaŋ. Kämiwä nadäŋ bäräpjin kudup paoräkaŋ bänepjin pidäm tawäpäŋ mägayäk api täneŋ.

²²Äma Bureni-inikta yäŋpäŋ ämatä inta kokwawak taŋi pähap nadäŋpäŋ api täwat kireneŋ. Ba taniŋ täwetpäŋ äma waki yäŋ api täwetneŋ. Ude täŋ tamäwä säkgämän itkamäŋ yäŋ kaŋ nadäwut.

²³Ude täŋ taminayäŋ täkaŋ-ken uken bänep täga nadäŋpäŋ oretoret pähap kaŋ täŋput. Imata, gwäki kunum gänaŋ it tamitak u taŋi pähap. In nadäkaŋ? Bian äbekjiye orajiyetä profet biani biani unita udegän täŋ yämik täŋkuŋonik yäk.

²⁴Täŋpäkaŋ, in äma moneŋ tuŋum ikek uwä umuntäkot! Irit säkgämän uku itkaŋ ubayäŋ.

²⁵Ba in apiŋo naŋ tokŋek täk täkaŋ uwä umuntäkot! Kämiwä nakta api teneŋ. Ba in apiŋo bänep täga terak it täkaŋ in umuntäkot! Kämiwä konäm butewaki terak api itneŋ.

²⁶Ba in ämawebetä intäŋo wäpjin biŋam yäpmäŋ akuŋpäŋ äma täga yäŋ täwet täkaŋ uwä umuntäkot! Bian äbekiye oraniyetä profet jop manman yäwanita udegän täŋ yämik täŋkuŋonik yäk.

²⁷Jesutä man ude yäwetpäŋ äneŋi kubä ŋode yäŋkuk. Man täwera nadäŋ itkaŋ ŋo, in ŋode täwera nadäwut; Äma iwan täŋ tamik täkaŋ unita bänep iron täŋ yämineŋ. Täŋpäŋ äma inta kokwawak nadäŋ tamik täkaŋ unita not täŋ yämineŋ.