Luk 24:20-42

²⁰Mewö maliga neŋgö jike nup galömnini aka galömkölköl aziurupninan i waŋgita premiögö böröŋe algetka kömumapkö jim teköi maripomnöŋ qeget kömuyök.

²¹Yaŋön Israel könagesönini kösönöhök pösata sohopnini memapköra al mamböta jörömqöröm aka malinmö, Yei! i mönö qeget kömuyök. Yuai mi asuhuiga mala koringa merak sömaŋi karöbut lök akza.

²²“Mi qahö dop köliga merak neŋgöreŋök ambi tosatŋan keunöŋ kuŋguba welipköm neŋgiget maljin. Yeŋön söŋan amandiŋe qaksirinöŋ anda,

²³qamötŋi qahö miwikŋaiba liliŋgöba kewö jize, “Nini Suep garata yahötkö jemeleŋ imut ehinga yetkön ‘Jisösnöŋ guliba malja,’” jiyohotka mötzin.

²⁴Keu mi möta azi nembuk maljei, yeŋgöreŋök tosatŋan qaksirinöŋ anda ambi yeŋön keu jizei, miaŋgö dop ahöiga ekze. Löm gwamönŋi ekzemö, nanŋi qahö ekze.”

²⁵Keu mi möta kewö jii mörohot, “Yei! Iŋini kezapqetok yeŋön keu jigeri, mi pakpak mönö wuanöŋgöra ölanbölan aka ajojohoba gawönjeje mala qahö möt narize?

²⁶Amötqeqe Toŋi Kraistnöŋ sihimbölö mewöŋi mötagun nanŋi asakmararaŋ uruŋe öŋgöma. Miaŋgö dop ohoget ahöza me qahö?”

²⁷Mewö jii mörohotka Moses aka kezapqetok ambazip pakpak yeŋön keu jigeri, miaŋgöreŋök könahiba nanŋaŋgöra keuŋi pakpak ohoget ahözawi, miaŋgö könaŋi jim asarim etkiyök.

²⁸Jim asarim etkiba anda miri anbitkö jiba anohori, mi dopdowiba miaŋgöreŋ toroqeba anmamgö mörök.

²⁹Mewö mörökmö, yetkön kapaŋ köl waŋgiba kewö jiyohot, “Miri mare aiga wehön jeŋan lök gemamgö akza. Miaŋgöra ölöp netpuk tata ahöman.” Mewö jiyohotka yetpuk mire öŋgöba tatket.

³⁰Tata yetpuk nene nembingö aka beret memba kötuetköba mindipköba etkimamgö aiga yuai kewö asuhuyök:

³¹Miaŋgöreŋök jeŋiran tohoiga ek kutuyohotka atatop (jiatatoŋ) köliga kunbuk qahö ehot.

³²Mewö aiga nanŋirök kewö eraum mörohot, “Köna namŋe Buŋa Kimbigö keu jiba könaŋi jim asarim netkizawi, nalö miaŋgöreŋök mönö urunire könöp jezawaŋgö dop mötzit.”

³³Mewö jiba miaŋgöreŋök wahöta Jerusalem sitinöŋ liliŋgöba aŋgota gwarekurupŋi 11 aka alaurup yembuk tokoba tatkeri, mi miwikŋaim eŋgiyohot.

³⁴Miwikŋaim eŋgiyohotka kewö jiget mörohot, “Kembunöŋ mönö ölŋa wahöta Saimongöreŋ asuhum waŋgiza.”

³⁵Mewö jigetka nanŋirak könanöŋ yuai asuhuyök aka beret mindipköyöhi, nalö miaŋgöreŋ uruŋiri tohoiga möt kutuyohot, miaŋgö kösohotŋi mem eŋgiyohot. Mewö.

³⁶Gwarekurupŋi yeŋön keu mi eraum möta tatketka miaŋgöreŋök Jisösnöŋ nanŋak sutŋine asuhuba kinda kewö jiyök, “Alaurupni, luainöŋ embuk ahöma!”

³⁷Mewö jiiga keŋgötporiŋ aka jönömŋini undui “Öme imura ekzin,” mewö mötmöriget.

³⁸Mewö mötmörigetmö, kewö jii mötket, “Iŋini denöwögöra auruba mötmöt mewöŋi uruŋine ahuza?

³⁹Ni nanak ki maljal. Mi nanŋinak köna böröni uba eka mötme. Öme imut mi bususihitŋini qahö. Ni bususihitnambuk kinbi nekze. Mönö nömisiriba nek kömume.”

⁴⁰Mewö jiba köna böröŋi kondel eŋgiyök.

⁴¹Kondel eŋgiyökmö, mi sösöŋgaiŋinaŋgöra töndup qahö möt nariba welipköba tatketka kewö qesiba jiyök, “Neneŋamŋini kun ki tatza me qahö?”

⁴²Mewö jiiga söra jejeŋi miaŋgö kitipŋi kun waŋgiget.