Luk 12:19-38

¹⁹Guzenaimai, gonug eneu, ‘Ulis, iz ee asiu mui, gonun, iz e ee wai asiu mui zaimai, siksikai dai. Iz salau koli koli i mai, gaul dai, ee ze mui sag za za dai.’

²⁰Uwait nug du go aureun, ‘Na dabeleu tamacag du. Ulis umaum na noumemena, e esab unum inug umau?’

²¹Du in go esab asiu gotulai macaneu, go igul go guzenamau, go Uwait nugau ameg ebu tamacag du damau.”

²²Guzenaimai, Yesus nug gonugau tapaimaraneu dudu awareun, “Ag agal enimag en dabeleimai, ‘Ig ein ee zaimai, dab?’ ‘Ig ein tibur galau tugabun?’ guzenai i dabilan. Doropag go banou pet, ee banou tam. Agal enimag banou pet, tibur galau go banou tam.

²⁴Ag meg inain piaran. Go ee ug i banemen, go ee gotulaimai, betei zaueim i gotulai macanemen. Go Uwait nugtal ee marena, zanem. Agen go meg inain zilarai daremen.

²⁵Du in ag ula ebu gonugau dabeleu asiu mui e em ebu ziwas huia dabun iboin? Go guzenabun iborain tam pet.

²⁶Ag igul ginampet guzenabun iborain tam gonun, ag einen igul banou guzenabun dabilemen?

²⁷Ag gaian a sisil uligan. Go salau i macanemen, tibur galau mui agtal i patai macanemen. Bo, iz ag petak pet awarem, getal gumaraneun du Solomon go gonugau tibur galau naliupetpet pataneun, go tibur galau a sisil zilaurab tam pet.

²⁸Gaul gig gaian go Uwait nug tibur galau maraneun. Go gig ulis damau, go tuaba ab nug unum elamau. Go gig gaul dacanemen go Uwait nug tibur galau maraneun. Agal oiagab petak eun go ginampet! Ag go abe macan, Uwait nug ag mui gumaraneu.

²⁹Guzenaimai, ag oiagab eg i umau, ag dabeleu asiu ee zabun i on.

³⁰Uwait nugau ze i duanem dudu go em e ebuan esab wabun dabilanemen. Igual memenig go abiu esab salau mui, gonun, gonug ag maramau.

³¹Ag Uwait nugau uzan siabun amegai dabilan, gonug kolital go esab unum ag maramau.”

³²Yesus nug kolital eneun, “Ag uminian, gelear igual memenig Uwait nug go esab usalai meun dareu duailel agal gumaraneu du banou go dabeleimai, enan, go nug esab maramau.

³³Agal esab unum dudu ipal maraimai, aiwag oimai, aiwag go dudu esab tamacag maran. Ag agal oiagab suban damau, ag ece Mesgai wagan asiu gotulabun dabilan. Go ebu ece tub i itanamamen. Einen, go ebu zob du tub nug zob wabun iborain tam pet. Umum tub i zamau, ece go i eg wamau.

³⁴Guzenaimai, ein uzan nait ece gotulai macanem ebu nait ounab mui go uzan dareu.”

³⁵Yesus nug koli awareun, “Ag ein igul zumau suban gumei dacan. Ag iweiu maiban, al usaiban, abu pei dan.

³⁶Du tub go gonugau wau dual zuabun ina, gonugau salau du nug gumei daneu sul guzenan. Gonugau du banou zoimai im korukoruina, gonugau salau dudu agen agal du banou pigai betei im oitai muranem.

³⁷Du banou gue gonugau salau dudu uligaraimai, banou siksikamau. Einen, go ninab tam. Iz petak pet awarem, gonugau tibur galau awau oi duei maimai, duailel hubabun awaraimai, ee maramau.

³⁸Go dudu go agal du banou uligaimai, siksikamam, go umaum zumau mui go siksikamamen.