Lucas 9:3-41

³Ne nzhab Jesús lo re zha: ―Neeka thib kwaa gwet goo leettsa yo goo net, neeka aga, neeka bols goo kuu yo re chaan goo, neeka pan, neeka temi; ne neeka gwet goo chop net xab goo.

⁴Ne loka yuu ta tsin goo, tya kwet goo asta leettsa roo goo yeza.

⁵Ne loka yez ta kayaat zha goo, broo goo yeza ne btsib goo yuyaaz kuu mke nii goo, tak kona nak thib seny kuu loo lo re tawlaz zha lee re zhaʼa went nak zha, tak mkayaat zha goo.

⁶Tsa mroo re zha ne ngwa zha re yez ne re ranch, mndaa zha kwent Diiz Chul ne mtegwe zha re mbyiz.

⁷Ne lee rey Herodes zha kuu nabee dita yezlyu Galilea mbin reta kuu mtsow Jesús; ne neeka net rey Herodes naa kwan tsow rey xgab, tak chop tson men mbez lee Juan mroban, ne lee Juan ntsow re kona.

⁸Ne lee tedib net zha mbez lee Jesús nak Lí kuu ngok profet ndala, ne lee tedib net zha mbez lee Jesús nak thib re profet kuu ngoo ndala, mroban.

⁹Per lee rey Herodes nzhab: ―Si na mnabee mga zha yek Juan. Mbay ne, ¿cho nak zha kuu nzhon na ndaa zha kwent chaan tsa? Kona nlaaz rey Herodes wii Jesús.

¹⁰Ne leettsa mretab re kuu ngeteed lo Jesús, tsa nzhab zha re kuu mtsow zha lo Jesús. Tsa mndeno Jesús beeta re zha, ne ngwa re zha thib ta yubiz, gaxta yez Betsaida tsa kwin anta re zha.

¹¹Per leettsa myeen re men lee Jesús nda neta, tsa mndeke re zha dits Jesús, ne mkayaa Jesús re zha ne mndaa Jesús kwent chaan ta nabee Diox lo re zha, ne mtegwe Jesús re mbyiz.

¹²Per leettsa ndetsiy yezlyu, tsa mbig re tsiibchop zha kuu ngeteed lo Jesús ne nzhab zha lo Jesús: ―Taal re men ree bi, tsa ya zha neyy zha ne yakwaan zha kuu wu zha, re ranch kuu nzi gaxta nzhee; tak yent kwan nak nzhee wu zha.

¹³Tsa nzhab Jesús lo re zha: ―Taa goo kuu wu zha. Tsa lee re zha mkab, ne nzhab: ―Beeta gaay pan ne chop mbel nap nee, chu nlaaza yati nee kuu wu reta men ree.

¹⁴Ne tya nzi teeka gaay mil mbyi. Tsa nzhab Jesús lo re zha kuu ngeteed lo Jesús: ―Guz goo lo re men, tsa yetob chop galbtsiiga zha.

¹⁵Ne tata mtsow re zha, tsa ngwatob re men.

¹⁶Tsa mzhen Jesús re gaay pan ne rop mbel, ne mwii Jesús lobee ne mndaa Jesús texkix lo Diox, tsa tsow Diox gak naroobe, ne mtsow rol Jesús re pan ne mndaa Jesús pan lo re zha kuu ngeteed lo Jesús, tsa kiid zhay lo re men.

¹⁷Reta men ndow asta plotha mze leettsoo re men; ne bee mtse re zha tsiibchop chekwit pan kuu mrozhoob.

¹⁸Thib wiz thita Jesús ndo ngetediz lo Diox, ne lee re zha kuu ngeteed lo Jesús nzi gaxta lo Jesús, tsa mnaabdiz Jesús lo re zha, ne nzhab Jesús: ―¿Cho nakʼn ni re men?

¹⁹Lee re zha mkab ne nzhab: ―Thib net zha mbez lee lu nak Juan kuu mtsowleyy, tedib net zha mbez lee lu nak Lí, ne lee tedib net zha mbez lee lu nak thib re profet kuu ngoo ndala, kuu mroban nal.

²⁰―Lee re goo, ¿cho nakʼn ndak goo? Tsa lee Pey mkab, ne nzhab lo Jesús: ―Lu nak Crist Kuu Mtaal Diox Nabee.

²¹Per lee Jesús mnabee lo re zha, tsa yent cho lo gab zha kona.

²²Tsa nzhab Jesús lo re zha: ―Lee na nak Zha Kuu Mtaal Diox Ngok Men, ndoblo riidʼn kwathoz yalti. Ne kayaat re zha golʼn, neeka re ngwleyy kuu nataak, ne neeka re maestr kuu nloo xkiiz Diox. Ne kuth zha na, per leettsa tsaal tson wiz lee na roban.

²³Ne noga nzhab Jesús lo re zha: ―Loka cho goo nlaaz teke ditsʼn, ndoblo laa goo reta kuu nap goo, ne reta kuu nzo yek goo tsow goo, ne ndoblo thib ko goo yek goo gath goo, tak nyelaaz goo na.

²⁴Os lee thib zha gath tak ndeke zha ditsʼn, tetsow zha gan yalnaban kuu thitanax. Per os lee zha nzeb zha gath zha tak ndeke zha ditsʼn, tsowt zha gan yalnaban kuu thitanax yibaa.

²⁵¿Per kwan tsow zha gan tegal reta kwaa yezlyu ree keno zha, ne tsowt zha gan yalnaban kuu thitanax yibaa?

²⁶Ne loka zha kuu nthoy nen ne xkizʼn, noga na Kuu Mzin Ngok Men, tethoyʼn nen zhaʼa, leettsa bretabʼn lo yezlyu ree tedib welt kon xni thoz chaan da, ne kon xni thoz chaan Xutʼn ne kon re mandad da kuu nayon.

²⁷Wlipaa na nin lo goo, lee chopta goo kuu nzi nzhee nal gatht goo, asta wii goo naa xomod nabee Diox kon yalnabee chaan Diox.

²⁸Ne leettsa ndaʼa teeka xon wiz nzhab Jesús kona, tsa mkendab Jesús yek thib yii par tediz Jesús lo Diox. Ne mndeno Jesús Pey, Santiag ne Juan.

²⁹Ne leettsa ngetediz Jesús lo Diox, mzee mod na Jesús, kwathoz naguz mloo xab Jesús, ne kwathoz mla xniy.

³⁰Ne mloo chop mbyi kuu ngetediz lo Jesús. Rop zhaʼa nak Moisés ne Lí.

³¹Ne ngoo re yon zha xid thib xni thoz, ne mndediz re zha kwent chaan yalguth chaan Jesús, kuu rid Jesús yez Jerusalén.

³²Ne lee Pey, Santiag ne Juan ngwatin re zha mkaal, per mdatta zha, tsa mwii zha xni thoz chaan Jesús ne lo rop zha kuu mndo lo Jesús.

³³Per leettsa lee rop mbyiʼa ndya, tsa lee Pey nzhab lo Jesús: ―Maestr, ¡wen nzi nee nzhee! Nal taa nee tson ramad, thibe gak chaana, tedibe gak chaan Moisés ne tedibe gak chaan Lí. Per neeka net Pey naa kwan nzhab Pey.

³⁴Leettsa lee Pey bee ngenika lee thib xkow mla mtow re zha, ne kwathoz mzeb re zha ngoo zha xid xkowa.

³⁵Ne xid xkowa mroo thib bos kuu nzhab: ―Zha ree nak xgann na kuu mlin. Bin goo re kuu ne zha.

³⁶Bluz or ngwalo mni bosa, tsa mwii re zha thita Jesús ndo. Ne re wiza yent cho lo nzhab re zha kuu mwii zha.

³⁷Ne lee tedib wiz, leettsa ndyaad re zha ngwa zha yek yii, tsa kwathoz men ngwa lo Jesús.

³⁸Tsa lee thib mbyi kuu nzo xid re mena, nex nzhab: ―Maestr, blat leettsooʼa neʼa xgann na, tak thibka zha lon.

³⁹Ne nden thib mbi fyer zha, ne ntsow mbi mbetsyath zha, ne ntsow mbi nlen zha yizguthye, ne ntsow mbi ndroo btsiin roo zha. Kwathoz nakap ntsowno mbi zha ne nlaazt mbi laa mbi zha.

⁴⁰Ne nzhapa na lo re zha kuu ngeteed loʼa, tsa koo zha mbi fyer leettsoo xgann na, per ngogt gatsow zhay.

⁴¹Lee Jesús mkab ne nzhab: ―¡Men nad, kuu nyelaazt Diox! ¿Plal tyemp ndoblo ton lo goo ne xek leettsoon nen goo? Deno xganna nzhee.