LLUKU 11:2-9

²⸤Aku sipe nirimu kinie pilipelie⸥ Yesusini enendo nimbendo: “Ene Pulu Yemo kinie ungu ningindu i siku mele niengi: “Tara, yambomane ‘Nu imbi ola molopa, ye kake teli peangamo moleno.’ ningu molangi. Nu ye nomi kingimu molko yamboma nokoni walemo wendo opili.*

³Kinié kepe pe alieli kepe olio nomolo langime siyo.

⁴Yambomane olio teko kenjilimele kinie siye kolopo ulu te naa telemolo kene olione nu tepo kenjilimolo kinie nuni aku sikula siye kolko olio ulu te naa teyo. Olio ‘Ulu tene kondi topili.’ naa nieni.” ningu aku siku niengi.” nirimu.

⁵Aku nimbelie pe enendo ungu te pea nimbendo: “Nu nunge pulu lemo yambo te paa ipulueli ai burumi molombana pukulie yundu ninindu: “Ano, ga mare siyo.

⁶Ye ponenge te kolea tenga pumbendo nanga ulkena pemba okomo nakolo na ga te naa lemo kene nuni na ga mare si.” nilina kinie

⁷yuni nundu nimbendo: “Nuni na umbuni te aku siku naa si.” nilke. “Ambolangoma kinie ou nambune sipu uru pemulu kene na ola molopo wendo ombo melte nu manda naa simbu, molo.” nilke.

⁸“Nane enendo nimbu sikiru: Yu angena molemomonga ola molopa ga naa silke nakolo nuni yu kimbu kimbu siku mawa telinamonga yu siye kolopa wendo omba ga silke.

⁹“Aku telkamonga ene ⸤nanga lombili andolime⸥ ndo ungu te pea nikirula: ⸤Lapa, Mulu Koleana Molemo Yemo,⸥ melema mawa teko “Si.” niengi. Aku tenge kinie melema sike simbe lingí. ⸤Lapa molemona⸥ melema korangi. Aku tenge kinie melema sike kanoko lingí. Ulke kerepuluna angilku “Sukundu wamili.” niengi. Aku ningí kinie “Sukundu wai.” nimbe nambune tonjimbe.