Livitikasi 8:1-12

¹Zama koe Mosese se Zihova,

²“Mu turaṉa la nia pa sasadana sa Ipi Hopena pa kenuqu Rau se Eroni meke sari na tuna koreo; paleki sari na poko hiama na oela vina madi, meke sa bulumakao kokoreo pude na vina vukivukihi tana sinea, karua sipi kokoreo meke sa huneke bereti sapu loke isitina;

³mamu tioko varigara nia vasina sa doduru butubutu Izireli.”

⁴Tavetia Mosese sapu zama nia e Zihova koasa, meke sipu varigara sa butubutu,

⁵si zama koarini si asa, “Kaqu tavetia rau kamahire gua sapu ele tozi nau e Zihova.”

⁶Turaṉa lani e Mosese pa kenudia sari Eroni meke sari na tuna koreo meke huvei sa.

⁷Va sage nia na poko keoro doduru meke keke poko gele sa se Eroni meke dokoho pule nia pule keke poko dokoho, meke keke poko tana hiama sapu ta pitie vinasari meke pusi nia pa kopetena.

⁸Va sage nia sa sa poko raqaraqa, meke vekoi sa sari karua tiṉitoṉa hitekedi sapu ta pozae Urimi meke Tumimi pa korapana sa.

⁹Va sage nia sa sa toropae batu tana hiama pa batuna meke pa kenuna si pusi nia sa sa vina gilagila qolo madina, gua puta tugo sapu tozi nia e Zihova koasa.

¹⁰Beto asa si vagia Mosese sa oela vina madi, meke la va madia sa Ipi Hopena meke sari doduru tiṉitoṉa pu ele koa pa korapana; meke pa siraṉa gua asa si va madi sa koe Zihova sari doduru.

¹¹Vagi sa sari kaiqa oela meke siburu lani sa ka zuapa totoso koasa hope vina vukivukihi, meke sari na tiṉitoṉa tavetaveteana meke koasa besini boronizi nomana meke sa hubina sa hope ka zuapa totoso. Pa siraṉa gua asa si va madi lani sa koe Zihova si arini.

¹²Kaiqa oela si zoroponi sa pa batuna e Eroni meke va madia sa si asa.