Livitikasi 10:11-18

¹¹Kaqu va tumatumae ni gamu koari doduru tinoni Izireli sari doduru tinarae saripu ponini gamu Rau koe Mosese.”

¹²Zama la koe Eroni meke koari karua tuna koreo pu koa hola, ari Eleaza meke Itamara se Mosese, “Vagi sari na vinariponi huiti koari na ginani saripu ta vala koe Zihova, mamu kinaia sa bereti sapu lopu ta henie isiti, mamu henaia pa kapana sa hope, sina na hopena hola sa vinariponi hie.

¹³Mamu hena ia koasa vasina hopena; sa kukuruna asa si tamugamu meke sari na tumia koreo, koasa ginani sapu ta vala koe Zihova, gua sapu ele tozia e Zihova koa rau.

¹⁴Ba gamu meke sari na mia tatamana si boka henai sari na masa raqaraqa meke sa pudapuda nene kali mataona, sapu ta vala pude na ṉati vinariponi, meke na ṉati vina hia koe Zihova, pude tadi na hiama. Kaqu henai gamu si arini koa keke vasina viana tava madina. Sari na vinariponi arini si ta vatu koa gamu meke koari na mia koburu pude tamugamu sapu mae guana koasa vina vukivukihi binaere tadi na tinoni Izireli.

¹⁵Kaqu paleke mae nia rini sa nene kali mataona meke sa masa raqaraqa pa totoso sapu ta vala sa deana pude va uququa, guana vinariponi ginani la koe Zihova. Hire sari na mia ginani meke tadi na mia koburu ninae rane, gua puta tugo sapu tozia e Zihova.”

¹⁶Nanasa nia Mosese sa vina vukivukihi qoti tana sinea asa, meke tozi nia rini, sapu ele tava uqu beto si asa. Bugoroni sa sari Eleaza meke Itamara koasa ginugua asa meke nanasi sa si arini,

¹⁷“Na vegua ke lopu hena ia gamu sa vina vukivukihi tana sinea koa keke vasina hopena? Hopena hola si asa, meke ele poni nia e Zihova koa gamu si asa, pude taleosae sa sinea tanisa butubutu.

¹⁸Sina lopu paleke nuquru mae nia gamu sa ehara pa korapana sa Ipi Hopena, ba kaqu hena ia gamu sa vina vukivukihi asa pa keke vasina hopena, gua puta tugo sapu tozia rau.”