1Lodꞌo Sara madhe, umur na 127 (ca ngasu dua nguru pidhu) tèu le. Lodꞌo na madhe èèna, Abraham si pea ètu rae Kiryat-Arba (nuka Hebron), ètu rai Kanaꞌan. Ka Abraham beke aa tangi dhèu èmu na dènge dꞌara pèdꞌa.
3Hèia Abraham kèdꞌi laꞌe paraga dènge dhèu-dhèu Het. Ka na peka dènge si, aku nèngu na,
4“Jaꞌa ne, dhèu tao mai ètu talora miu se. Jaꞌa dhu dènge boe rai ca kasibꞌi sa, sèna ka padhane dhèu èmu jaꞌa. De ladhe miu sue jaꞌa, jaꞌa hèli kore rai miu dꞌai ca kasibꞌi sa, ho tao era padhane ne.”
5Hèia ra dhaa, aku rèngu na,
6“Sèmi neꞌe, ama! Nèbhu nare sange neꞌe, jiꞌi se tadhe le ama, dhu sama sèmi ca dhèu, dhèu heka dhu jiꞌi pakabꞌua. De sadꞌi ama dꞌèi rai mia dhu beꞌa, dhu pamèci dènge dadꞌèi ama. Jiꞌi se dhoka ngoꞌo di; dhèu èci sa dhu magee boe.”
7Hèia Abraham pacudꞌu iisi ho hia hormat mi lamatua rai, dhèu Het sèra.
8Ka na padhai lii, peka na, “Ladhe miu sèmi lii jaꞌa na, jaꞌa manèngi ho peka dènge ana mone Sohar, dhu ngara na Efron.
9Peka dènge ne, ladhe na dꞌèi, na pahia dènge jaꞌa loe na, Makpela, dhu ètu karasa oka na. Na manèngi ca ngaa èèna ka, jaꞌa tihe. Jaꞌa neo tihe pamaꞌète kabꞌua na, ètu madha miu aaꞌi-aaꞌi mi, sèna ka rai èèna jꞌajꞌi unu jaꞌa. Jaꞌa neo tao era èèna, jꞌajꞌi mi roꞌa dhèu madhe jiꞌi.”
10Lodꞌo èèna, Efron madhèdi ètu era èèna kahèi, dènge dhèu-dhèu Het sèra. Ka na tadèngi kahèi lii padhai lii Abraham deo na. Hèia na kèdꞌi titu, ka na bꞌala Abraham ètu madha dhèu heka aaꞌi-aaꞌi ra ètu sèra, aku nèngu na,
11“Baku sèmi èèna, ama! Sèmi neꞌe ka laa! Oka dènge loe Makpela èèna, jaꞌa hia iia ama. Sèna ka mu padhane dhèu èmu èu mi èèna. Jaꞌa pangèdꞌu rai èèna mi ama, ètu madha dhèu-dhèu jaꞌa se. Sèna ka rèngu aaꞌi-aaꞌi ra jꞌajꞌi sakasii!”
12Ka Abraham pacudꞌu kètu hari mi dhèu Het se.
13Hèia na peka dènge Efron, aku nèngu na, “Sèmi èèna oo, beꞌa kahèi. Te ngaa miu nanene lii jaꞌa, la ma. Jaꞌa neo hèli pamaꞌète rai na, sèna ka jꞌajꞌi era padhane dhèu-dhèu jaꞌa.”
14Hèia, aku Efron na, “Rai èèna, kabꞌua na, dhoka èpa ngasu doi pudhi di. Guna ngaa èdhi dua ti padhue kabꞌua rai ciki ooꞌe èèna, dhu sasoa na aadꞌo. De lamu ka, ho mèti dhèu madhe na, sèna ka padhane ne ètu nèi.”
16Ka Abraham dꞌèi kahèi dènge kabꞌua na sange èèna, madhutu sèmi lii Efron. Hèia ètu madha dhèu ae-ae sèra, na ige nare doi pudhi èpa ngasu, tihe kabꞌua rai èèna mi Efron.
17De dènge jꞌara sèmi èèna, Abraham abhu dènge rai ne nèti Efron, jꞌajꞌi mi unu na. Rai na nuka ètu Makpela, padètu dènge Mamre (nuka Hebron). Na hèli pamaꞌète rai ne dènge oka na, dènge loe na, aa dènge ajꞌu aaꞌi-aaꞌi ra. Dhèu-dhèu heka nèti suku Het, aaꞌi-aaꞌi ra ka dhu jꞌajꞌi sakasii, peka na, rai èèna dènge isi aaꞌi-aaꞌi jꞌajꞌi le unu Abraham. Èle èèna ka, Abraham laꞌe padhane Sara ètu dꞌara loe èèna, ètu rai Kanaꞌan.
20Dènge sèmi èèna, dhu uru èèna oka dènge loe na unu dhèu Het, limuri ne jꞌajꞌi le rai unu Abraham. Ka na tao jꞌajꞌi mi era udhu rui ra.
