Lifitikos 8:3-28

³Mürin kopwe pwal amwichafengeni ekewe aramas meinisin ikenan.”

⁴Iwe, Moses a föri usun mine ewe Samol mi Lapalap a allük ngeni o amwichafengeni ekewe aramas meinisin.

⁵Iwe, Moses a üreni ekewe aramas, “Iei usun mine ewe Samol mi Lapalap a allük ngeniei pwe üpwe föri.”

⁶Mürin, Moses a emwenato Aaron me nöün kewe mwän o atütüür.

⁷A aüföüfa ngeni Aaron ewe söch o peliti ngeni ewe pelit, a pwal aüföüfa ngeni ewe owokot me ewe üf itan efot o ri ngeni ririn ewe efot mi türmürina.

⁸Iwe, a pachetä won ewe chechen leupw o uwalong ewe Urim me ewe Tumim lon .

⁹A pwal aimweimwa ngeni Aaron ewe akkaw o rietä won eten mesan ewe kolt mi chöpöp, ewe mwärämwär mi pin, usun ewe Samol mi Lapalap a allük ngeni.

¹⁰Mürin, Moses a angei ewe löön epit o epiti ngeni ewe imw mangaku ia aramas ra churi Kot ie, me meinisin mine a nom lon, a pwal apiniir.

¹¹Iwe, a angei ekis seni ewe löön epit o äsupu fän fisu ngeni ewe rongen asor, a epiti ewe rongen asor me pisekin meinisin pwal ewe lenien töttöl me motongan, pwe repwe pin.

¹²A pwal ninätiu ekis seni ewe löön epit won möküren Aaron o epiti pwe epwe pin.

¹³Mürin, Moses a emwenato nöün Aaron kewe mwän, a aüföüfa ngeniir ekewe söch o peliti ngeniir ekewe pelit, a pwal aimweimwa ngeniir ekewe akkaw, usun ewe Samol mi Lapalap a allük ngeni.

¹⁴Mürin, Moses a emwenato ewe ätemwänin kow fän iten asoren tipis, nge Aaron me nöün kewe mwän ra isetä pöür won möküran.

¹⁵Iwe, Moses a niela ewe mönün asor, a angei ekis chan o aea pöün le tofi ewe cha ngeni mächän ewe rongen asor me fofoch, pwe epwe alimöchü ewe rongen asor. Nge lusun ewe cha a ninätiu lepopun ewe rongen asor o apini, pwe epwe föri asoren amusamusen limengauen ewe rongen asor.

¹⁶Mürin, Moses a angei kirisin pisekin lon inisin ewe mönün asor me mwärekeon ammünün, pwal ekewe ruoföü föün lon fiti kirisir, o kenirela won ewe rongen asor.

¹⁷Nge silin ewe ätemwänin kow me fitukan pwal taran a kenirela lükün ewe ia ra nonom ie, usun ewe Samol mi Lapalap a allük ngeni.

¹⁸Mürin, Moses a emwenato ewe ätemwänin sip fän iten asoren kek. Nge Aaron me nöün kewe mwän ra isetä pöür won möküran.

¹⁹Iwe, Moses a niela ewe ätemwänin sip o uti chan ngeni pwelin ünükün ewe rongen asor.

²⁰Mürin a kinikisietiu fituken ewe ätemwänin sip o kenala möküran me ekewe kinikin pwal kirisin.

²¹Iwe, a talü ekewe pisekin lon inisin me pechen ngeni koluk o kenala unusen ewe ätemwänin sip won ewe rongen asor pwe eu asoren kek ngeni ewe Samol mi Lapalap a efich pwoon. Iei usun ewe Samol mi Lapalap a allük ngeni Moses.

²²Mürin, Moses a pwal emwenato ewe aruomanün ätemwänin sip fän iten afeiöchün ekewe souasor. Nge Aaron me nöün kewe mwän ra isetä pöür won möküran.

²³Iwe, Moses a niela ewe ätemwänin sip, a angei ekis chan o tofi ngeni emin fän pelifichin selingen Aaron, pwal ngeni aütülapen pelifichin pöün me pechen.

²⁴Mürin, Moses a pwal emwenato nöün Aaron kewe mwän. Iwe, a tofi ekis ewe cha ngeni emin fän pelifichin selinger pwal ngeni aütülapen pelifichin pöür me pecher. Nge lusun ewe cha a uti ngeni pwelin ünükün ewe rongen asor.

²⁵Iwe, a angei kirisin ewe mönün asor, kirisin mechan me kirisin won pisekin lon inisin meinisin, mwärekeon ammünün pwal ekewe ruoföü föün lon fiti kirisir me pelifichin pechen.

²⁶A pwal angei eföü pilawa seni lon chükün ewe pilawa esap wor iis lon mi nom fän mesen ewe Samol mi Lapalap, pwal eföü pilawa mi nofitfengen me apüra, me echö nokop, o iseniir won kirisin ewe mönün asor pwal won pelifichin pechen.

²⁷Iwe, ekei mettoch meinisin Moses a isenalong lepöün Aaron me nöün kewe mwän, nge ir ra assawerela fän mesen ewe Samol mi Lapalap pwe eu asoren assaw.

²⁸Mürin, Moses a angei ekei mettoch seni lepöür o kenirela won ewe rongen asor fiti ewe asoren kek pwe eu asoren afeiöch ewe Samol mi Lapalap a efich pwoon.