Lifitikos 7:8-12

⁸Iwe, ewe souasor mi föri än ekewe aramas asoren kek epwe eäni silin ewe mönün asoren kek.

⁹Iteiten asoren mongö mi um pwal meinisin mine a kuk lon nape ika furain lon furaipan epwe fän iten ewe souasor mi föri ewe angangen asor.

¹⁰Nge ekewe asoren mongö resap mwot, ese lifilifil ika mi nofit ngeni apüra ika resap nofit, repwe fän iten nöün Aaron kewe mwän meinisin, epwe inetöchfengen lefiler.

¹¹Iwe, iei allükün ekewe asoren kinamwe aramas ra eäni ngeni ewe Samol mi Lapalap:

¹²Are eman a eäni ewe asoren kinamwe pwe asoren kilisou, epwe uwato an mönün asor o achu ngeni pilawa esap wor iis lon mi nofit ngeni apüra, pwal sokun pilawa usun nokop esap wor iis lon mi toto ngeni apüra, pwal pilawa mi mürina o nofitöch ngeni apüra.