Lifitikos 6:16-26

¹⁶Nge lusun ewe asoren mongö Aaron me nöün kewe mwän repwe mongö. Iwe, repwe mongö ewe asoren mongö esap wor iis lon me lon eu leni mi pin lon ewe leni lükün ewe imw mangaku ia aramas ra churi Kot ie.

¹⁷Iwe, resap tongeni umuni ewe pilawa fiti iis. Ewe Samol mi Lapalap a ngeniir pwe inetir seni ewe asoren mongö. Iei eu asor mi unusen pin usun chök ewe asoren tipis me ewe asoren pupungau.

¹⁸Iteiten mwän me lein ekewe mwirimwirin Aaron repwe mongö seni. Iei inetir seni ewe asor ngeni ewe Samol mi Lapalap, seni eu täppin aramas tori eu täppin. Esap fokun wor eman lükür epwe atapa ekewe asor, pun iö a atapa epwe feiengau ren pinin.

¹⁹Iwe, ewe Samol mi Lapalap a ngeni Moses ekei allük

²⁰fän iten afeiöchün eman souasor i mwirimwirin Aaron: Lon ewe rän, lupwen eman leir a kepit, epwe eäni asor ngeni ewe Samol mi Lapalap ruu paun pilawa mi amas o mürina usun chök ükükün ewe asoren mongö ra eäni iteiten rän. Esop seni ewe asor epwe eäni asor lesosor, nge esop lekuniol.

²¹Iwe, epwe nokopuni fiti apüra lon eu furaipan, epwe aipwötü o kinikisietiu usun eu asoren mongö. Mürin epwe eäni asor pwe epwe eu asor ewe Samol mi Lapalap a efich pwoon.

²²Ewe souasor mi kepit me lein nöün Aaron kewe mwän pwe epwe siwili Aaron, epwe eäni ei asor ngeni ewe Samol mi Lapalap fansoun meinisin. Iwe, unusen ei asor epwe kek.

²³Iteiten än eman souasor asoren mongö epwe kek meinisin. Esap wor eman epwe tongeni mongö seni.

²⁴Iwe, ewe Samol mi Lapalap a pwal kapas ngeni Moses,

²⁵pwe epwe ngeni Aaron me nöün kewe mwän ekei allükün asoren tipis: Lon ewe leni ia ra niela ie ewe mönün asoren kek repwe pwal niela ie ewe mönün asoren tipis fän mesen ewe Samol mi Lapalap. Ei asor a unusen pin.

²⁶Ewe souasor mi föri ei angangen asoren tipis epwe pwal mongö seni ewe asor lon ewe leni mi pin lükün ewe imw mangaku ia aramas ra churi Kot ie.