Lifitikos 25:44-51

⁴⁴Nge are oua mochen kamö mwän me fefin pwe oupwe nöüniir amanau, oua tongeni möniir seni ekewe mwü mi nom ünükümi.

⁴⁵Oua pwal tongeni kamö nöümi chon angang me lein ekewe chon ekis mi wasöla remi, chokewe mi uputiu lon fanüemi. Ikkei ir oua tongeni nöüniir amanau.

⁴⁶Iwe, oua tongeni eäniir amwirinimä ngeni nöümi kewe mwän pwe repwe nöüniir amanau tori ar mäla. Ikkei ir oua tongeni nöüniir amanau, nge pwimi kewe chon Israel ousap nemeniir fän pöchökül.

⁴⁷Are eman chon ekis ika eman wasöla mi nom reöm a pisekisekila, nge pwiüm we chon Israel a wöüngauala pwe a amömöla püsin inisin ngeni ewe chon ekis ika ngeni eman eterekesin ewe chon ekis,

⁴⁸eman epwe tongeni mönisefäli mürin an amömöla püsin inisin. Iwe, eman me lein pwin kana a tongeni mönisefäli.

⁴⁹Pwal pwin saman ika nöün pwin saman ika eman märärin seni an famili a tongeni mönisefäli. Nge are a pisekiseksefälila, a pwal tongeni püsin mönisefäli inisin.

⁵⁰Iwe, repwe pwüngüpwüngfengen i me ätewe mi möni o alea seni ewe ier a amömöla püsin inisin ngeni tori ewe ierin supili. Iwe, liwinin an epwe ngasala epwe aükük ngeni iteiten ekewe ier. Nge ränin an nonom ren ätewe mi nöüni amanau repwe usun chök ränin eman chon angang mi mö.

⁵¹Are mi chüen wor chomong ier tori ewe ierin supili, ewe mi ngasala epwe mönätiu och kinikin mi watte me lon ewe moni, ewe eman mi nöüni amanau a püngütiu fän itan.