Lifitikos 24:3-22

³Iwe, Aaron epwe tümwünüfochei ekewe lamp fän mesen ewe Samol mi Lapalap, pwe repwe tin seni lekuniol tori lesosor lükün ewe cheech mi refiela ewe pworofel lon ewe leni mi unusen pin. Ei epwe eu allük fän itan me mwirimwirin kana seni eu täppin aramas tori eu täppin.

⁴Aaron epwe tümwünüfochei ekewe lamp mi nom won ewe lenien atittin a för seni kolt mi mürina pwe repwe tin fochofoch me fän mesen ewe Samol mi Lapalap.

⁵“Iwe, kopwe angei rüe me rüanü paun pilawa mi amas o mürina pwe kopwe umuni engol me ruoföü pilawa seni.

⁶Kopwe atetteliir lon ruu tettel won ewe chepel mi för seni kolt mi mürina a nom fän mesen ewe Samol mi Lapalap, akawonoföü repwe nom won eu tettel.

⁷Kopwe pwal iseis ren eu me eu tettel apach mi pwokus o mürina, pwe eu kinikinin ewe asoren mongö akasiwilin ewe pilawa, pwe epwe eu asor epwe kek ngeni ewe Samol mi Lapalap.

⁸Iteiten ränin sapat Aaron epwe atettelöchü ewe pilawa fän mesen ewe Samol mi Lapalap. Ekei pilawa ekewe aramasen Israel repwe wisen awora iteiten fansoun.

⁹Iwe, ekewe pilawa enen Aaron me nöün kewe mwän, repwe mongö lon eu leni mi pin. Pun ewe pilawa eu kinikin mi unusen pin seni ekewe asor ngeni ewe Samol mi Lapalap fän iten ekewe souasor.”

¹⁰Iwe, a wor eman mwän nöün eman fin Israel, nge saman eman re Isip. Ätei a feila lein chon Israel o anini ngeni eman wesewesen re Israel me lon ewe leni ia ra nonom ie.

¹¹Nge lon ar anini nöün ewe fin Israel we mwän a turunufasei iten ewe Samol mi Lapalap le ottek. Iei mine ra emwenato ren Moses. (Iwe, iten inan we Selomit nöün Tepri fefin seni ewe ainangen Tan.)

¹²Iwe, ra kalapusei tori repwe silei letipen ewe Samol mi Lapalap fän itan.

¹³Mürin, ewe Samol mi Lapalap a üreni Moses,

¹⁴“Kopwe emwenawu ätewe mi ottek lükün ewe leni ia oua nonom ie. Nge meinisin mi rong an fos repwe iseis pöür won möküran, pwe asisilen ar atipisi. Mürin ekewe chon Israel meinisin repwe monei ngeni fau.

¹⁵Kopwe üreni ekewe aramasen Israel: Iö a otteki Kot epwe angei liwinin an tipis.

¹⁶Nge iö a turunufasei iten ewe Samol mi Lapalap epwe ninnila. Ekewe chon Israel meinisin repwe monei ngeni fau. Eman mi turunufasei ewe it mi pin epwe ninnila, ese lifilifil ika i eman chon ekis mi nom leimi ika eman chon wilipos.

¹⁷Iwe, eman mi niela eman aramas epwe ninnila.

¹⁸Nge eman mi niela nöün eman man, epwe akasiwili ewe man, pun manau akasiwilin manau.

¹⁹Iwe, are eman aramas a afeiengaua chon arun pwe a ter, epwe pwal fis ngeni usun mine a föri.

²⁰Are eman a kupi chün eman, epwe pwal kupukup chün, are eman a afeiengaua mesen eman, mesan epwe pwal feiengau, nge are eman a tülü ngiin eman, ngiin epwe pwal tütül. Usun eman a afeiengaua eman aramas pwe a ter, iei usun epwe pwal fis ngeni.

²¹Eman mi niela nöün eman man epwe akasiwili ewe man, nge eman mi niela eman aramas epwe ninnila.

²²Iwe, epwe wor eu chök allük fän iten chon ekis mi nom leimi me chon wilipos, pun ngang ewe Samol mi Lapalap ämi we Kot.”