Lifitikos 18:1-28

¹Iwe, ewe Samol mi Lapalap a kapas ngeni Moses,

²“Kopwe üreni ekewe aramasen Israel: Ngang ewe Samol mi Lapalap ämi we Kot.

³Ousap föri sokun föför ekewe chon Isip ra föri lon ewe leni ia oua piin nonom ie me mwan. Ousap pwal föri sokun föför ekewe aramas ra föri lon ewe fanü Kanaan ewe ia üpwe emwenikemiila ie. Ousap apirü ar föför.

⁴Oupwe aleasochis ngeni ai kewe allük o apwönüetä ai kewe pwüüng. Ngang ewe Samol mi Lapalap ämi we Kot.

⁵Iei mine oupwe fokun apwönüetä ai kewe allük me pwüüng, pun are eman aramas epwe aleasochisiir, epwe manau. Ngang ewe Samol mi Lapalap.

⁶Iwe, esap wor eman me leimi epwe oror ngeni püsin aramasan ren an epwe lisowu ngeni. Ngang ewe Samol mi Lapalap.

⁷Kosap turunufasei semom ren om lisowu ngeni inom. Pokiten neminewe inelapom, kosap fokun lisowu ngeni.

⁸Kosap lisowu ngeni pwülüen semom, pun ka turunufasei semom ren.

⁹Kosap lisowu ngeni fefinom, ese lifilifil ika neminewe nöün semom ika nöün inom mi uputiu lon leniom ika ekis.

¹⁰Kosap lisowu ngeni nöün noum mwän föpwül ika nöün noum fefin föpwül, pun ka püsin turunufaseek ren.

¹¹Kosap pwal lisowu ngeni nöün pwülüen semom föpwül, pun nöün semom, nge pwal i fefinom.

¹²Kosap lisowu ngeni fefinen semom, pun i fituken semom.

¹³Kosap lisowu ngeni pwin inom, pun i fituken inom,

¹⁴kosap pwal turunufasei pwin semom ren om oror ngeni pwülüan pwe kopwe lisowu ngeni, pokiten neminewe pwal i inom.

¹⁵Kosap fokun lisowu ngeni pwülüen noum mwän.

¹⁶Kosap lisowu ngeni pwülüen pwiüm, pun ka turunufasei pwiüm ren.

¹⁷Iwe, kosap pwülüenifengeni eman fefin me nöün föpwül, kosap pwal lisowu ngeni nöün nöün neminewe mwän föpwül ika nöün nöün fefin föpwül, pun ir fitukfengen. Ei sokun föför a fokun ngau.

¹⁸Kosap pwal angei pwin pwülüom pwe kopwe eäni aruu, lupwen pwülüom a chüen manau.

¹⁹Iwe, kosap oror ngeni eman fefin pwe kopwe lisowu ngeni, lupwen neminewe a limengau ren an samaun fefin.

²⁰Kosap pwal lisowu ngeni pwülüen chon arum, pun ei sokun föför kopwe püsin limengau ren.

²¹Iwe, kosap eäni asor eman noum ngeni ewe kot itan Molok. Ren ei ka turunufasei itei, pun ngang ewe Samol mi Lapalap om we Kot.

²²Kosap lisowu ngeni eman mwän usun om lisowu ngeni eman fefin, pun ei sokun föför a anioput.

²³Kosap pwal lisowu ngeni eman man, pun ei sokun föför kopwe püsin limengau ren. Iwe, eman fefin esap pwal mwüt ngeni inisin eman man pwe epwe lisowu ngeni, pun ei sokun föför a fokun ngau o ässäw.

²⁴Iwe, ousap püsin alimengauakemi ren ekei sokun föför. Pun aramasen ekewe mwü üpwe asürela me mwemi ra alimengaueer ren ekei föför.

²⁵Pwal ewe fanü a limengau ren. Iei mine üpwe apwüngü ewe fanü, pwe epwe musäsinawu ekewe aramas mi nonom won.

²⁶Nge ämi oupwe apwönüetä ai kewe allük me pwüüng, pwe ousap föri och seni ekei föför mi anioput, sap eman leimi ika eman chon ekis mi nom remi.

²⁷Pun ekewe aramas mi nom mwemi lon ewe fanü ra föri ekei sokun föför mi anioput meinisin. Iei mine ewe fanü a limengau ren.

²⁸Iwe, are oua alimengaua ewe fanü, epwe pwal musäsinikemiiwu, usun a musäsinawu aramasen ekewe mwü mi akomw le nom lon ewe fanü.