Lifitikos 15:1-21

¹Iwe, ewe Samol mi Lapalap a ngeni Moses me Aaron ekei allük

²fän iten ekewe aramasen Israel: Are och chönü a towu seni ewe kükün inis seni eman mwän, ewe chönü a limengau,

³ese lifilifil ika ewe chönü a chüen pu seni ika a ükütiu, a chök limengau.

⁴Iteiten kieki ätewe mi pu seni och chönü a kon lon epwe limengau. Pwal mettoch meinisin mine ätewe a mot won repwe limengau.

⁵Iwe, eman mi atapa kien ätewe epwe sopuni üfan o tütü, nge epwe limengau tori lekuniol.

⁶Nge iö a mot won och mettoch ätewe mi pu seni och chönü a fen mot won, epwe sopuni üfan o tütü, nge epwe limengau tori lekuniol.

⁷Nge iö a atapa inisin ätewe mi pu seni och chönü epwe sopuni üfan o tütü, nge epwe limengau tori lekuniol.

⁸Iwe, are ätewe mi pu seni och chönü a atufätä won eman mi limöch, ätewe mi limöch epwe sopuni üfan o tütü, nge epwe limengau tori lekuniol.

⁹Nge iteiten sokun lenien mot aramas ra aea le mot won man epwe limengau, are ätewe mi pu seni och chönü a mot won.

¹⁰Iö a atapa och mettoch ätewe mi pu seni och chönü a chouni, epwe limengau tori lekuniol. Nge iö a eki ei sokun mettoch epwe sopuni üfan o tütü, nge epwe limengau tori lekuniol.

¹¹Iwe, are ätewe mi pu seni och chönü epwe atapa eman, nge esap mwo rupuri pöün lon koluk, ätewe a atapa epwe sopuni üfan o tütü, nge epwe limengau tori lekuniol.

¹²Nge are ätewe mi pu seni och chönü epwe atapa eu sepi mi för seni pwül, ewe sepi epwe ömmök. Nge ika ewe sepi a för seni mwüch, epwe chök töttöl lon koluk.

¹³Lupwen ewe chönü a ükütiu le pu, ewe mwän epwe püsin aawit lon ükükün fisu rän fän iten an limelim. Mürin epwe sopuni üfan o tütü lon koluk mi mürina pwe epwe limöch.

¹⁴Iwe, lon awaluen rän epwe angei ruoman lisom ika ruoman apansüsün lisom, epwe feito fän mesen ewe Samol mi Lapalap leasamalapen ewe imw mangaku ia aramas ra churi Kot ie, o ngeni ewe souasor ekewe lisom.

¹⁵Nge ewe souasor epwe eäniir asor, eman fän iten asoren tipis, nge ewe eman fän iten asoren kek. Ren ei ewe souasor epwe föri asoren amusamusen tipis fän mesen ewe Samol mi Lapalap fän iten ätewe mi pu seni och chönü.

¹⁶Iwe, are ewe chan mwän a towu seni eman mwän, epwe atütü unusen inisin, nge epwe limengau tori lekuniol.

¹⁷Nge iteiten üf me iteiten mettoch mi för seni silin man a tup lon ewe chan mwän, repwe sop, repwe pwal limengau tori lekuniol.

¹⁸Are eman mwän a kon ren eman fefin o ewe chan mwän a towu, ir me ruoman repwe tütü, nge repwe limengau tori lekuniol.

¹⁹Iwe, are eman fefin a samaun fefin, neminewe epwe nom lon an limengau lon ükükün fisu rän. Nge iö a atapa ewe fefin epwe limengau tori lekuniol.

²⁰Mettoch meinisin neminewe a kon lon ika mot won lupwen an samaun fefin repwe limengau.

²¹Iö a atapa kien neminewe epwe sopuni üfan o tütü, nge epwe limengau tori lekuniol.