Levi 8:10-20

¹⁰Muri e Moses i bolea a nibiri, i gamai a Mailo na Vure turana a maka maki i tabuli pololilo vona, ge ne vona e BAKOVI DAGI kunana.

¹¹I bole tabua a nibiri i voro tamali langa na dede balaka polorua, i gamai a maka mahala ri tabuli vona, a tavila na hilova turana a dede kiroko vona. A maka maki nga ne vona e BAKOVI DAGI kunana.

¹²I bolea a nibiri i guru langea na gine Aron, i gamaia, ge vona e BAKOVI DAGI kunana.

¹³Muri e Moses i tuli e huriki e tune Aron ri valai, i vakarodo ria na nirodo, i vakarea ria na palabele, i vakatama ria na tama, i ramaia a ngava e BAKOVI DAGI i vakukua vona.

¹⁴Muri e Moses i bolea a bulmakau a toga, ge a nihabi na naro hale. Lakea e Aron turana e tuna mai ri ru langa a limane ria na gina.

¹⁵Muri e Moses i rabalakia a bulmakau, i lutu a kukulimana na darana, i ravu na maka tupina dede na nihabi gutu-vuro. Na naro iea kunana i gamaia a dede i matapado na matana Vure. Muri i bole paru a darana i tababana, i guru na taruna dede, i gamaia, i kavitagua.

¹⁶Lakea e Moses i bole a vina pololilo na mahalana, a kinake i kavitagu a hate, a vuanalipi i rua turana vina, i gutu-vuro na dede.

¹⁷Pali i bole ranga balena bulmakau turana a kulina, a bobona, a tahena, i gutu-vuro polovavo na mada, i ramai a ngava e BAKOVI DAGI i vakuku e Moses vona.

¹⁸Muri e Moses i bolea tara sipsip a toga ge a nihabi gutu-vuro. Lakea e Aron turane huriki e tuna ri ru langa a limane ria na gina.

¹⁹Muri e Moses i rabalakia, i bole a darana, i voro tamali langa na tabekena dede i va.

²⁰I pala kesikesia a sipsip, i gutu a gina, a vina, a balena.