Levi 6:8-30

⁸E BAKOVI DAGI i takia e Moses,

⁹“O vakuku e Aron turane huriki e tuna na vinara na nihabi gutu-vuro. Ra nihabi iea ri gi gutu na dede, a kanono ge nono mavonga na rodo malaku, ge harena na hatelanga.

¹⁰Muri a prister ge rodo a nirodo ola ola, a poho ni rata na kala kamumu, ge lakea na dede ge bole a habulo i vona a havu na nihabi gutu-vuro, ge ru tabukoi na dede.

¹¹Muri ge kali tala a nirodo ola ola vona ge rodo a nirodo ola ola ranga, ge bole tala na mada a havu na kanono, ge ru na tabeke i matapado.

¹²A kanono na dede ni gi rata ge nono vakaroro, nahea ge mate. Na hatelanga lobo a prister ge tunu rikea a kanono, ge bole a maka sipsip a bulmakau na nihabi gutu-vuro ge gutu. A maka vina sipsip a bulmakau na nihabi na nivalemu ranga ge gutu vonga.

¹³A kanono ge nono vakaroro na dede, nahea ge mate.

¹⁴“A vinara na nihabi na vit i maea: e huriki e tune Aron ri gi bolea a nihabi na vit, ri gi habia ne BAKOVI DAGI tabukoi na dede.

¹⁵I tara ne ria ge ragamu ranga plaoa kamumu ge guru langa vona a namona oliv, a havu mangisipa. Muri ge gutu a plaoa na kanono na dede. Ra plaoa popote nga, ge ratea e BAKOVI DAGI ge luhoia. Na tahuna e BAKOVI DAGI i burongi a mangina kinani, bara i vivi.

¹⁶A maka plaoa i tababana ge kani e Aron turane huriki e tuna bakovi. Ri gi bole a plaoa ri gi rata a bret i uka is, ri gi kani na Tabeke Nitaba, na matana Kape na Vaponga.

¹⁷A bret nahea ni gi vuli turana is ni gi gutu, a vuhuna ra nihabi iea ni taba, i manga a nihabi na naro hale, a nihabi na rarenga. A habi ne huriki a prister a kalavana plaoa ge ne ria, ra kalavana maki ni gutu na kanono ni habi nau, a habi ne ria.

¹⁸E huriki a bakovi na kabu ne Aron kunana ri gi kani a nihabi ni gutu na kanono ne BAKOVI DAGI. Ra vinara iea ni gi ramai vakaroro muri ma. A ra maki i padoi a nihabi nga, ni taba.”

¹⁹E BAKOVI DAGI i takia e Moses i ta maea,

²⁰“E huriki e tune Aron bakovi ri gi habi a nihabi ne BAKOVI DAGI na tahuna ri bole karaba a leho na prister. Na parava ni gamai tara ne ria ge ia a prister, ge habia nau tara nihabi. Ge bolea tara kilo i taku na plaoa, ge a nihabi na vit, ge habia na hatelanga a kalavana tara, na malunga a kalavana tara.

²¹A prister ge vuli kamumu a plaoa turana a namona oliv, ge gutu na ulo kabelabela. Muri ge keve kesikesi, ge habi ne BAKOVI DAGI manga a nihabi na vit, na tahuna i burongia a mangina kinani bara i vivi.

²²E rei a hamone Aron a bakovi ni gamai ge bole a murina, ge habi a nihabi iea ne BAKOVI DAGI. I manga a hini e BAKOVI DAGI i vakuku ria ri gi ramai vakaroro. E huriki a prister bara ri gutu-vuro lobo liu a nihabi.

²³E huriki a prister nahea ri gi kani a nihabi na vit ri bole valai e huriki. A kanono ge gutu ge vuro lobo liu, a havulana kunana ge tabuli.”

²⁴E BAKOVI DAGI i takia e Moses i ta maea,

²⁵“O vakuku e Aron turane huriki e tuna na vinara na naro hale. A nihabi iea ni gi rabalaki na murina ni rabalaki a kanirau na nihabi gutu-vuro na matane BAKOVI DAGI. A nihabi iea ni taba hateka.

²⁶A prister ge habia a nihabi iea ne vona a naro hale, ia kunana ge kani a nihabi na tabeke ni taba, ra na matana Kape na Vaponga.

²⁷A ra maki i padoia a bobona nihabi iea, bara ni taba. A darana nihabi iea ni gi voro tamali na varakia tara, mu vahiloloa na tabeke ni taba.

²⁸A prister ge nonoa a nihabi iea na ulo ni rata na taka, muri ge ubipodea ra ulo iea. Pali ia ge nonoa na ulo ni rata na bras, ge tuhari kamumua, muri ge loi kamumua na naru.

²⁹E rei a bakovi na tara na prister i kara ge kani a nihabi iea, a vuhuna ra nihabi iea ne vona e BAKOVI DAGI.

³⁰Pali a nihabi na naro hale, a darana sipsip o a bulmakau vona ni bole dili na Kape na Vaponga, ne vona ni kavitagu a naro hale ne huriki na Tabeke Nitaba, nahea ri gi kani a bobona. Ni gi gutu na kanono.”