Levi 26:18-33

¹⁸“Muri na tahuna a vakamadihi mua na naro nga, pali i uka ma mu ramai tabu a ngavagu, bara vakamadihi hateka mua.

¹⁹Bara ratapile a tagenga, a nitora ne mua. A vala i uka ma ge boru, a malala bara i tora manga a kedo.

²⁰A maki ni kani i uka ma ri gi koru rike na hania, a maka kai i uka ma ri gi vua. A tuhakanga ne mua bara i lobo tavula.

²¹“Na tahuna a maka maregoa nga ri bele ne mua, pali mu tababana ni tagege, bara luhoi a maka naro hale mu rata, a habi mua a maregoa hale, i dagi hateka na maregoa muga.

²²Ga rudu a maka livoa hateka ri gi lakene ri gi rabalaki e huriki e tune mua, a maka bulmakau ne mua, ga rata mua mu ala popote, i uka viri ge laho na dala ne mua.

²³“Muri na tahuna a vakamadihi maea mua, i uka ma mu longototo a nitagu, mu tababana ni tagege,

²⁴bara luhoi a naro hale ne mua, a ratapile mua hateka tabu.

²⁵Mu ratapilea pali a ngava dagi, ngane ga rudu e huriki a pile ri gi vaubi turane mua. Na tahuna mu made pololilo na tanga dagi ni tura halui, mu luhoi ta mu made kamumu, pali bara rudua a gilanga dagi i ratapile mua. Na tahuna mu bole a maregoa na gilanga, bara habi mua na limane huriki a pile ne mua.

²⁶Na tahuna iea bara vakaperemu mua na maki ni kani. A ngatavine ala ravulu bara ri vatunu vona a kanono i taku, ri gutu a maki ni kani popote. Muri bara mu vaveru, mu kani, pali i uka ma mu gu maru.

²⁷“Muri na hini a rata a naro nga, pali mu tababana ni tagege mu longotaro a ngavagu,

²⁸bara tahate hateka na naro hale mu rata, iau kunana a habi a nimadihi dagi hateka ne mua.

²⁹Muri bara mu vitolo hateka, mu rabalaki mu kani e huriki e tune mua.

³⁰Iau bara ratapile a maka roho na nivasileki na maka vure ne mua meli na lolo, bara puka a maka dede na havu mangisipa. Bara rabalaki mua, a voro rike a podane mua na hanuna vure a ratapile muga pali. Lakea bara marikoi hateka ne mua.

³¹Ga ratapile a tanga dagi, a roho na nivasileki ne mua. I uka ma ga ngaru a maka nihabi mu rata.

³²Ga ratapile hatekea a malala ne mua. Na tahuna e huriki a pile ne mua ri bolea a malala iea ri made vona, bara ri turutu vona a maki i bele vona.

³³Bara rata e huriki a pile ri vaubi turane mua, ri lili tala mua, mu vapida lae mu mariu lakea na maka tanga basi. A malala ne mua bara i tabuli tavula, a maka tanga dagi ne mua bara ni ratapile.