Levi 25:40-53

⁴⁰Ge made turane mua, manga a vora. Ge leho ne mua, ge harena na Pida na Nihabimule a Maki.

⁴¹Na pida iea, ia turane girihina, e huriki e tuna ri gi pe mua, ri gi hamule mai a kabu ne ria ri made na malala ne tubune ria.

⁴²Hosi e huriki a Israel ri made manga a vorakato o Egipto. Muri a tuli tala ria vonga, ge ria a vora nau. Ngane naha ni kona mule a viri ne ria ge a vorakato ne ria.

⁴³Naha ni vakavora hateka ria. Mu togo iau, mu rata kamumu ria.

⁴⁴“Mu ngaru ni bole a vorakato, mu bole tala na maka robo basi.

⁴⁵Mua mu ngaru tabu, mu kona e huriki a mosi ri made na tanga ne mua, turana a kabu ne ria ni poda ria na malala ne mua, ge ria a vorakato ne mua.

⁴⁶Na tahuna mu mate, e huriki e tune mua a bakovi ri gi bole e huriki a vorakato, ri gi rata a leho ne ria vakaroro. Na tahuna e huriki a viri ne mua ri leho manga a vorakato, naha ni vakavora hateka ria.

⁴⁷“Na tahuna a mosi tara i tahoka hateka a mahala i made turane mua, pali a turane mua tara i bala a mahala, ra mosi iea i kara ge konea a turane mua ge a vorakato vona, o ge ia a vorakato na kabu vona tara.

⁴⁸Muri na mosi i konea a Israel iea, ge ia a vorakato vona, a viri vona tara i kara ni konamulea,

⁴⁹o e tamana tara, o e turana tara, o a viri na kabu vona tara, ria ranga ri kara ni konamulea. Pali ra bakovi iea ge tahoka a moni, bara i kara ni kona mule ia, ge vano.

⁵⁰Ge gi palupu a maka pida ri tababana ge harena na Pida na Nihabimule a Maki. A matakari iea ge ru a mapana a vora na pida nga. Ra bakovi iea o a kabu vona tara, ge konamulea na mapa ge maea:

⁵¹a pida vona i kupo i tababana, a bakovi iea ge koli mule a moni i kupo lakea na matakari, ge kona mule ia;

⁵²a pida vona i popote i tababana na Pida na Nihabimule a Maki, ge koli mule a moni popote lakea na mata­kari, ge ramai a maka pida i leho vona, ge kona mule ia.

⁵³A matakari ge luhoia ra vorakato iea ge manga a vora ni kona na pida takutaku, nahea ge vakavora hatekea.