Levi 25:25-36

²⁵“Bara bakovi tara i bala maki i ngaru ni habi a malala vona ni gi kona, a kabu vona muholi ge koria ge konamulea, muri ge habi mulea vona.

²⁶Bara bakovi i uka viri vona ge tuhoria, ia kunana ge konea. Na tahuna i kupo a maka moni vona, ge konamulea a malala iea.

²⁷Ge gi i riva a pida i tababana ge kona a maka pida ni koli a maki nga, ge gi i riva a mapana a kanena maki ni varo ge vakabele a malala na pida nga. Ge bole a moni ga mapana kanena maki nga, ge habi na bakovi i kona a malala vona hosi, ge bole mulea a malala iea.

²⁸Pali a bakovi iea ge uka moni, i uka ma i konamulea a malala iea, a malala ge tabuli na bakovi i konea, ge harena na Pida na Nihabimule a Maki ge bele tabu muri ma. Na tahuna a pida iea i bele, a bakovi i kona a malala ge habi mulea na tahona a malala.

²⁹“Bara bakovi i tahoka a ruma i pesi na tanga dagi ni tura halui na nure, i konea a bakovi tara, a tahona i tahoka a pida i taku ni konamulea a ruma vona.

³⁰Bara pida i taku i lobo, lakea i uka ma i konamulea a ruma, ra ruma iea ngane ne vona a bakovi i konea turane huriki a hamona. I uka ma ge habi mulea na Pida na Nihabimule a Maki.

³¹Pali a maka ruma ri pesi na tanga kiroko i uka ma ni tura halui, mu luhoi kamumu, ri manga kunana a hania. A tahona ruma i kara ni konamulea a ruma vona. Na Pida na Nihabimule a Maki a bakovi i konea pali a ruma, ge habi mulea na tahona a ruma.

³²“Pali e huriki a Levi nahea ri gi ramaia a vinara iea. Ria ri ngaru ni kona mule a ruma na tanga dagi ni tura halui a nure, bara ri kona mule.

³³Na tahuna a Levi tara i habi a ruma vona ni kona, pali i marikoi ni konamulea, ra bakovi i konea a ruma ge habi mulea na Levi na Pida na Nihabimule a Maki a ruma, a vuhuna mua lobo a Israel e BAKOVI DAGI i habi a malala ne mua, pali e huriki a Levi i uka ma i habi a malala ne ria. I habi kunana a maka tanga dagi ne ria. A maka ruma ri pesi na maka tanga dagi ne vona e huriki a Levi kunana vakaroro.

³⁴Pali a malala na harena maka tanga dagi ne huriki a Levi, nahea ge kona e huriki. Ra malala ngi ne vona e huriki a Levi vakaroro.

³⁵“Na tahuna a Israel tara i made tabukoi vomu i bala maki, o tuhoria ge manga a naro mu rata virihi e huriki a mosi vona. Mu rata mavonga a hulu matasia bara i vivi ni made turane mua.

³⁶Na tahuna i bole a moni ne mua, ge koli kunana a moni i bole. Naha ni takia ge ru langa tabu ranga. Na tahuna i kona a maki ni kani, naha ni vakarike hateka a mapana ni bole a moni dagi vona. Mu mangenge vona a Vure, bara a hulu matasia i made turane mua.