Levi 24:12-22

¹²Lakea e Moses i ru dilia na bavi, ge davea e BAKOVI DAGI, ge takia na a ra naro ge rata virihia vona.

¹³Lakea e BAKOVI DAGI i takia e Moses,

¹⁴“O turari talea na mada a bakovi iea. E huriki ri longoa i harogi iau, ri gi ru langa na gina a limane ria. Ri rata mavonga, ri gi vakasiria ra bakovi iea i tahoka a maregoa pali, ri gi padimatea na kedo.

¹⁵Muri o taki e huriki a Israel, e rei a viri i harogi iau, i tahoka a ngava. Bara i bole a vuranga vona.

¹⁶A Israel, o a mosi i kurahi a ragu na tahuna i harogirogi, ra bakovi iea ni gi padimate na kedo.

¹⁷“E rei a viri i rabalaki a bakovi, ni gi rabalaki.

¹⁸E rei a viri i rabalaki a kanirau na bakovi tara, ge kolia a kanirau na bakovi iea.

¹⁹Bara bakovi i ratapile a kakaina viri, mu koli mu ratapilea a kakaina.

²⁰Bara bakovi i ubiputu a tuhana viri, mu koli mu ubiputua a tuhana. A bakovi i ratapile a matana viri, mu koli mu ratapilea a matana. A bakovi i ubisigo a ngina viri, mu koli mu ubisigo a ngina. A bakovi i rata hale navai a viri, mu koli mu rata mavongea.

²¹A bakovi i rabalaki a kanirau, ge kolia a kanirau i rabalakia. Pali a bakovi i rabalaki a viri, a bakovi iea ni gi rabalaki.

²²Ra vinara iea ne vona e mua e huriki a tahotanga ne Israel, turana a mosi ri made turane mua. Iau e BAKOVI DAGI, a Vure ne mua, a takia a ngava iea.”