Levi 20:2-26

²ge taki e huriki a Israel, ge ta maea, “E rei tara ne mua, o a mosi i made turane mua, ge habi e tuna ne Molek ge a nihabi, ra bakovi iea ni gi rabalaki. E huriki a tahotanga ri gi padimatea na kedo.

³Ra bakovi i habi e tuna ne Molek, i rata a mailo nau i muto, i ratapile a ragu. Ra bakovi iea a pile nau, bara lili talea ne huriki a Israel.

⁴Pali na tahuna e huriki ri mata taroa a bakovi iea i habia tara e tuna ne Molek, lakea i uka ma ri rabalakia,

⁵iau bara marikoi vona turane huriki a kabu vona, bara lili tala ria na kabu ne ria, a vuhuna ri kavurikea e Molek.

⁶“Na tahuna a bakovi tara i lakea na bakovi na malulu o na bakovi na muto, ra bakovi iea i pe iau pali, i ramai a naro na uvo. Ra bakovi iea bara a ngalahere vona, a lili talea ne huriki a viri vona.

⁷“I mavonga, mu habi mua nau bara mu laho malamala, a vuhuna iau, e BAKOVI DAGI a Vure ne mua.

⁸Mu longototo a vinara nau, a vuhuna iau e BAKOVI DAGI a rata mua mu malamala.

⁹“E rei a viri i harogi e tamana o e kinana, ni gi rabalaki, a vuhuna ia kunana i vakabele mule a vuranga vona.

¹⁰“Bara a bakovi i rata a naro na molenga ne girihina bakovi tara, ra bakovi a ngatavine nga ni gi rabalaki, a vuhuna rua kunana ru vakabele a vuranga ne rua.

¹¹“Bara bakovi i mahita turane girihine tamana, i vakahale e tamana. A bakovi a ngatavine nga ni gi rabalaki. Rua kunana ru vakabele a vuranga ne rua.

¹²“Bara bakovi i mahita turana e kana, a bakovi a ngatavine nga ni gi rabalaki. Rua kunana ru vakabele a vuranga ne rua.

¹³“Bara bakovi i mahita turana a bakovi turana, i manga i mahita turana a ngatavine, ra bakovi nga ru rata a naro i muma hateka ni gi rabalaki, a vuhuna a naro ru ratea i uka ma i ramai a vilo, rua kunana ru vakabele a vuranga ne rua.

¹⁴“Bara bakovi i parangi a ngatavine turana e kinana, tou lobo ni gi gutu na kanono, a vuhuna to rata a naro hale hateka. Ra naro maea nahea ni gi mata taro ge bele ne mua.

¹⁵“Bara bakovi i tari a ligo o a maki tara, ra bakovi iea ni gi rabalaki, a ligo tara ni gi rabalaki.

¹⁶“Bara ngatavine i lakea mai a ligo i mahita turana, a ngatavine turana a ligo ni gi rabalaki; a vuhuna a ngatavine a ligo ru vakabele mule a vuranga ne rua.

¹⁷“Bara bakovi i parangi mule e kurabana, o e tune tamana, o e tune kinana, ra bakovi a ngatavine nga a narone rua i muma hateka. Ni gi lili tala na kabu ne rua, ru gu hatakia a maregoa na naro ru ratea.

¹⁸“Bara bakovi i mahita turana a ngatavine na tahuna a ngatavine i matai a keva, a bakovi a ngatavine nga ru rata a naro i muto, ni gi lili tala na kabu ne rua.

¹⁹“Naha ni mahita turana e balomu o kinamu tara, a vuhuna bara o vakahale a viri vomu, marua varago bara ni vakamadihi na naro muru ratea.

²⁰“Bara bakovi i mahita turane girihine tamana tara o e girihine hana, ra bakovi iea i vakamaruhu e tamana tara o e hana. A bakovi a ngatavine nga bara ni vakamadihi na narone rua, i uka ma ru gu vakabele a koma.

²¹“Bara bakovi i parangi polo vona e girihine turana, ra bakovi iea i vakahale e turana, i muto. Ra bakovi a ngatavine nga, bara ru bala e tune rua.

²²“Mu ramai a ngava dagi, a vinara nau. A malala e Kenan ngane ga taparaki lokovonga mua vona, i uka ma ge lua tala mua, bara mu vivi ni made vona.

²³Naha ni ramai a narone huriki ri made na uvo vonga. Ri rata a naro hale nga lakea a marikoi hateka ne ria. Ngane ga lili tala ria na robo iea, muri bara mu bolea.

²⁴A taki mua pali na maka uve, a kai ni kani, ri koru kamumu vona a malala iea. Ga habia ne mua, ge ne mua liu. Iau e BAKOVI DAGI a Vure ne mua, a vulaki tala mua ne huriki a kabu ranga ge mua e huriki a viri nau.

²⁵“Mu pelekado a kanirau, a kadirovo i kaba mu kani, pali naha ni kani a viri i muto. A taki mua pali vona a maka kanirau, a kadirovo, a maki kiroko ri karaka ri muto, naha ni kani a vuhuna ri muto.

²⁶Lakea bara mu malamala na matagu, a vuhuna iau e BAKOVI DAGI a malamala, a ru here mua ne huriki a kabu ranga ge mua e huriki a ngate nau.