Leveleseni 16

1

2

3

4

5

6

7

8

9

10

11

12

13

14

15

16

17

18

19

20

21

22

¹Naa higena havuana ikapinaga hanea mono nopiti nagola tusia agegefa aigena havugeno sevenia (7) ensole vayafe mage huno hie “Tamakaya Anumaya Kotina haima vaigeno aipamoa atama nelea yana sevenia (7) yopafi hanegi alitama mopafi mo aitagu-feho.” huno hie.

²Higeno hagote molia ensole kanomoa viaamo ani yopaafima hanea yana alino mopafi mo aitagu-fegeya kefo afai afumo avoma amaugafalema kae-malenea veamoya ani kefo afai afumo amefena “Anumayati mainane.” huya agima alisaga nehaya veamogamina tusia kele amamu amale-maine.

³Amamuna amalegeya mainageno anile molia ensole kanomoa yopaafima hanea yana alino hagelipi mo laki-talegeno ani hagelimoa falimainaya veamogami kolamoma hia kava huteno mukia tipima mainaya kafayaga faliya faluti-mainae.

⁴Falutigeno anile tagufa (3) molia ensole kanomoa yopaafima hanea yana ala tima nelavia tipiene kapaima nehagea tipiene taki-talegeno ani liyagamoa kolamaage ti hapae-maine.

⁵Naa higena havugeno titema kava yagai-mainea ensole kanomoa mage huno hie “Anumaya Kotiga nayona mainananagika menia ania huka maineka kefo yana nohana Alu aotage kanogika kaiyekema humateka kefo yamo anonaama hu-matana yana fatago huka nehane.

⁶Ani veamoya kagaikaa alu aotage veanene amaune veanekaene hamayageya fali-mainae. Faligeno ani veamogami kolamoma takilavi-mainea yafe kagaya ani kefo yaamimo anonaamia neamaminanagiya ani kola tima nesayana kagaya kanale kava hu nematane.” huno humaine.

⁷Higena havugeno afuma heya kae salamanama hu neataya folamoleti nago kemoa falote huno mage hie “E, tamage mukia tokiyakaa hanea Anumaya Kotiga kaiyekea fatago hulama huka hu neamatana kano mainane.” huno humaine.

⁸Higena agogeno anile fo (4) molia ensole kanomoa yopaafitila yagefi ailaki-talegeno Anumaya Kotia atalegeno yagemoa tusia amukoage huteno mukia veala teno amasagali-maine.

⁹Amasagaligeyagi veama kefo yamo anonaamima amamisia tokiyaama hanea Anumaya Koti agia aye haviya nehayanagiya amakua aiyahae huya Anumayamo agia alisaga ohunae.

¹⁰Ohageno faefu (5) molia ensole kanomoa yopaafima hanea yana kefo afai afumo siale taki-talegeno mukia ani kefo afai afumoma kava humatenea kaiyaga tusia hani kigeya agai veamoya amaugafa amakatama aiya yafe amakaiami amavefunafi hataga hatago huya akafula ani-mainae.

¹¹Neanigeno amaugafaleenena amamuna amaleno amakatama aiya yafena ikapinaga mainea Anumaya Kotifena kamuge hatageya vaitayanagi kefo yama humainaya yafena amakua aiyahae ohunae.

¹²Aiyahae ohageno sikisi (6) molia ensole kanomoa yopaafima hanea yana tusia lina Yufaletisi lima nelavia tipi taki-talegeno ani limoa taneno hau huteno ala kakefa falote humaine. Higeno yagema vayi nehilegati ala Sauve vayama esaya kamoa falote humaine.

¹³Falote higena nagaya neagogeno tagufa (3) Kefo Avamula utu kana avamula nagola osifavemo avayafiti vayi higeno nagola kefo afai afumo avayafiti vayi higeno nagola havigegeyama nehia aune kanomo avayafiti vayi humaine.

¹⁴Vayi huteya ani talia (3) Kefo Avamumoya haiya maineya tokiyaage avame yana nehuya mukia ma mopafi Sauve vayatema vayana ani vayala amavaleya alitalu humategahe umainae. Tusia tokiyaama hanea Anumaya Kotia ala tuma hisia kanafina Anumaya Kotiene tuma hisaya yafe melitalu humatenae.

¹⁵Yisasia mage huno humaine “Haviho ‘Omegahie.’ hutama nehaya kanafina musufa kanomoa neea avamete kava huna egahue. Egahuanagi ani kanafina kenaamia omalenageya alapaagela maisaya veala amakayea ohisaya yafe menia nagaifema amakesa nehaviya amaula ofaeya kenaamia fai-lisayana musena hugahae huna nehue.” huno humaine.

¹⁶Utu kana Kefo Avamumoya mukia kotegati ala Sauve veamogamina amavaleya ayaamoya Yuta veamogami kefina Amagetoni huya nehaya kumate melitalu humatene.

¹⁷Aupaa seveni (7) molia ensole kanomoa yopaafima hanea yana ikate hanea yasifi taki nea-talegeno ikapinagama hanea mono nopitila ala kegefa falote huno mage hie “Mukia yana hai hano hie.” huno humaine.

¹⁸Ani kea nehigeno aulumaya kotino ute ete higeno monagemoa tusiya huno agea neaigeno tusia imila ali-maine. Veamoya ma mopafima mainaya kanafina ania augafa imila aligeya oagenayanagino mukia imila agaseno tusia imikefa ali-maine.

¹⁹Aligeno ala kumala Papilonia ali haviya huno tagufafi (3) ali fako higeno mukia ma mopafi ala kumayagaene alino haviya humatene. Anumaya Kotia Papilonia ala kumapi maineya kefo yama nehaya veafena agela okaninegi agesa havino haima nevaiya yamoa aipafina ata nelegeno kefo yaamimo anonaamia amamigeya alimainae.

²⁰Ala imikefa aligeno mukia hagelimo amunopima hanea mopaene agoyagaene fanane humainae.

²¹Tusia komopa, yafa ku kana huteno, ala alaisi ku kana huno kanaage huno ikapinagati asaga hulavi hulavi hiaamo veamogami amaugafale taviaamo ali haviya humategeya Anumaya Kotifena “Otahaiya kano mainane.” huya kamugea hatageya vaitenae.