13 Aadhdhida eratettaa demmiya urai, akeekaakka babaa oottiya urai anjjettidaagaa.
14 Aissi giikko, appe demmiyo go77ai biraappe demmiyo go77aappe aadhdhees; appe beettiya go77ai worqqaappe beettiya go77aappe kehees.
15 Aadhdhida eratettai inqquwaappe keehi al77o; neeni demmanau amottiyo ubbai aadhdhida eratettaara likkettenna.
16 Aadhdhida eratettai ne bariyaa adussees; i neeyyo duretettaanne bonchchuwaa gujjees.
17 A ogeti ufaissiya ogeta; a loosso ubbaikka saro.
18 I bana oiqqiyaageetussi de7o mitta; a mintti oiqqiya ubbatikka anjjettidaageeta.
19 GODAI ba aadhdhida eratettan sa7aa medhdhiis; ba akeekankka salota minttiis.
20 A eratettan shaafati goggoosona; shaaratuppekka irai bukkees.
21 Ta na7au, lo77o aadhdhida eratettaanne adussi qoppiyoogaa naaga; eti neeppe shaahettoppona.
22 Eti neeyyo de7o gidana; eti neeyyo ishalonne ufaissa de7uwaa immana.
23 He wode neeni ne ogiyan hirggi bainnan hemettana; ne tohoikka xubettenna.
24 Neeni zin77ido wode, yayyakka; zin77adakka mal77o xiskkuwaa xiskkana.
25 Akeekennan gakkiya bashshau, woikko iitati xayiyo xayuwau yayyakka.
26 Aissi giikko, GODAI neeyyo ammanettiyaagaa gidana; ne gedeekka piriyan oiqettennaadan, i nena naagana.
27 Neeyyo wolqqai de7ishin, metootidaagau lo77obaa oottiyoogaa aggoppa.
28 Ha77i neeyyo de7ishin, ne shooruwaayyo, “Simmada ya; taani neeyyo wontto immana” yaagoppa.
29 Nenan ammanettidi, ne matan de7ishin, ne shooruwaa bolli iitabaa oottanau halchchoppa.
30 Nena naaqqibeenna asa, coo mootoppa.
31 Sugetta oottiya asata qulloppa; eta iita oosuwaakka kaalloppa.
32 Aissi giikko, GODAI iitaa oottiyaageeta ixxees; shin suuretuyyo i ulottees.
33 GODAA qanggettai iitaa oottiyaageetu soona; shin a anjjoi suurebaa haniyaageetu soona.
34 Otorettidi qilliicciyaageeta GODAIKKA qilliiccees; shin banttana kaushshiyaageeta nashshees.
