Lakbogogi Wene 13:34-46

³⁴Ala en ‘At hambuluk lendagwima en iluk erogo mondok okbagya neyalok, hivis vidis arisogon dek o,’ yiluk, iluk erogo mendok okbagagi ako andi, At Ala en iri dugwit, An sek okbayogon o, yiluk, Wene eve adik denek mondok avyarat ombarup menda Daut yugogogis ako, hit at okbigigayogon o, yiluk, yagagi.

³⁵Eke, Daut en ambi inim iri dugwit, Habut Endawi Sek Adigat Denek ako, Eyave hambuluk, vidis agya hawen, hekbayogon dek o, yiluk, yagagi ako dirup warek agarik.

³⁶Ala en at Daut ogagya dogopwak yiluk vulogo bagagi ako, wane-wane at ogagya lagagirik, hombagagi. Hambigya lagagimu, ombawi hombagagwa inim saba lagagwa vidis agagi ovara,

³⁷At Ala en iluk erogo mendok okbagagi ako andi, vidis agetek.

³⁸Vidis agetek, iluk at werekma, hit weyak ogasagwi andi, At Yesus vaga Ala en dek erogo bigigaup hinilup arovovok yiluk, yukheraliga o, naswei.

³⁹Ala wene yugup Musa en dirup watigi ako vaga nenendawi mot okbininaliga dek. Ata, Yesus ovaga vanggabaluk avyarat ombasagwi vaga andi, Ala en nenendawi mot okbininaliga, yiluk, yukheraliga.

⁴⁰Anderogo atma, Ala en yugirigya hegek yugurugu lagagwa navi-navi ako en yugu dugwit, Hit Ala weyak-edok erogo belagwi yi, Hit agipik yi hudi vaga an ambi okbigigaup ako, Hit yukheraup ovara, avyarat ombarusogon dek menda ogarisogon atma, Hit vok yugu dugwit, mondok dek at arusogon o, yiluk, yugeragagwa ako, hit anderogo at okbugugu hao en, henendawi suwam watu dogones o,” yiluk, at Paulus ako en yugeragagi.

⁴²Yugirigya lagagimu, Paulus Mbarenabas it mberen it Yakuri samban ogasagwima akoma wunggu-sigik, it ap akwa en, “Wene yukneregep ako, nin hivis samban vaga yukneravovok,” yiluk, yugurugu lagagwama, wunggugwa.

⁴³It ap akwa samban okbaluk wunggu lagagwarik, it Yakuri menda inim, it weram Yakuri dek menda Ala enalon umbutu dugwit Yakuri wene wugu lagagwa inim, wisane erogo Paulus Mbarenabas inim lagu dugwit, “Ala henabwa en Yesus vaga henomaluk dek okbigigiluk henagap wendarisiga ako, henendawi dibaluk, ogarit lagu dogones,” yiluk, wene mamulirugwi, enendawi aik wakbugwis, ogagagwa.

⁴⁴Hivis samban ogasagwi vaga o kota andoma ap akwa ovok erogo Nenasin Yesus wene huluguluk, homagagwa.

⁴⁵Homagwi ako vaga it Yakuri menda inil inigu lagagwarik, “A! Nit nenane hulup ova hera, it enane adigat hulup, nenanggon!” yiluk, enaninis en at Paulus ane iris ako saganggu dugwit, wiyiknom-weyaknom yagagwa.

⁴⁶Wiyiknom-weyaknom yugu-sigik, it Paulus Mbarenabas enalon dek yugurugu dugwit, “Ala wene hit Yakuri menda henendak yukheraup ovara, ‘Nit niniluk dogop wene andi, waup ndak dek o, yiluk, nenanggon,’ yegep atma, hit hekbigiluk, it weram Yakuri dek menda ako at yugeregek nagu dogosogon.