La Bilalaha 13:4-11

⁴Tio, La Kalulu La Marokala goio baha taro egirua solau te la mautu e Selusia. Golau te la mautu e Selusiale, egira goio sae lou te sipi, e sipi vahari egirua solau te la olu uru e Saipras.

⁵Egite goio sibitala mai ele, egira goio la mautu e Salamis, egira goio goilo te la luma la lotu tegite Iuda, egira goio veipala la merera te La Tahalo Uru. E Ioanes oio tegirua, eia susuli tai egirua.

⁶Te la tuluga tegirua mai ele, egira polo kabili te la olu uru e Saipras ele, egira goio guvi oio e Pepos. Oio e Pepos ele, egira hilo la tahalo isasa, eia la tau Iuda, la isala e Baiesas, eia la tahalo la irasi, la iligo la maholo me la papaga isahari lou mai ele, eia veia eia veipala la merera te La Tahalo Uru eala moli eia la tahalo la visigolola.

⁷Eala moli eia la bilalaha isasa te la mulugaluga la olu alele, la isala e Segius Paulus. La mulugalugale, la gabutatalala tetala taritigi pepeho, eia baha tavu e Banabas me Sol ele, egira goio tetala, la vuhula eia masagea ge lolo la merera te La Tahalo Uru.

⁸Eala moli e Limas, la tahalo moli ale rasirasi, eia igigo la maholoe, egite vulo lou la isala te la merera e Grik, egite toila e Limas, eia masagea veia ge tao talu e Banabas me Sol, veia e Paulus kama ge gabu tikumu la merera tegirua, eia kama ge vulo la gabutatalala tetala tavu e Iesus.

⁹Eala moli e Sol, egite toi loula e Pol, la vagagari La Kalulu La Marokala eia pou sesele tetala. Eia goio mata tototiale Limas ele,

¹⁰eia goio veitialao mago “Eme la tahalo la visigolola sesele. Eme e latule Satan, la vulovulo ale taritigi eme gima molia. La merera te La Tahalo Uru ale taritigi, eme pile molia. Gaisa eme ge piligi taro la vulovulomu aleie?

¹¹Male, gageie La Tahalo Uru ge kuemei, eme ge mata kea, la matamu kamati ge matagaga kara te la haro isahari ge polo.” Tio e Pol veiala mai ele, goio, kama tabaa, oio moli ovola te la milatalata tetala la paga isa uru mai la tuluvu la mori, eia parakukuru, eia mai ale pigi robo molia, la matala savu robotio, e maurale goio vava bubu moliti, sasala bububu moliti mai ele, veia eia ge pilau isa la tahalo, la tahalole eia ge sau la limala, ge tata e maura soio te la gauru.