KURINṮH̱UUS ’DE/ 12

1

2

3

4

5

6

7

8

9

10

11

12

13

14

15

16

¹Shwane/ isi gwo gom to gi shi/in kun c̱inu ki me’d mo iwaḵ mo, aha/ dinaki ŋap̱ um mmota p̱us mo.

²Um mishin me’d jin ’kona um ki dar ki ji gi luŋuŋ gana/ mo tani um suskunu this e mo mmoluŋ tomp̱inycon mo kun ’kon ki muṯṯ mo, ma e bway gunn kun joc̱kunu um mo.

³Wakan aha/ ŋap̱a um mo mmomish gwo ’ban mo ki wathin ṯal ’deŋ kamu/ yisa di’da jin oki gwo ki Shi/in Dheleladhelel ma Arumgimis mo ki sule/ mo mmo/o gwo mo ki: Dhalka Ḵrisṯẖos a’di jeenu mo. Dhali jan ṯal ’deŋ kamu/ yisa midi mish gwo o mo mmo/o ka: Yesus ta Tap̱a mo isi ciki/ ki Shi/in Dheleladhelel mo be.

⁴Hili to gun c̱inu ki me’d mo tani tana e kuku/ mo, hili ’peni Shi/ina ’de/ mo be.

⁵Dhali hili mii ma ṯu’c tana e kuku/ mo, hili Tap̱a ṯal ’de/ mo be.

⁶Dhali hili mo jin miinuwa ṯu’c tana e kuku/ mo, hili a’di ta’da Arumgimisa ’de/ mo jin umki uni eya ris uni ’baar ka ’deṯe/ ’deṯe/ mo be.

⁷E uni ’baar ka ’deṯe/ ’deṯe/ mo tani mo jin ṯoru ki Shi/in mo tani a’di c̱inu mo gom mo jin woṯẖuwa woṯẖ mo gom ’kwani ’baar mo.

⁸E wathiŋ kamu/ ’de/ mo tani a’di c̱inu Shi/in mo jin ta moyuḵ gi gwo mo dhali e jaŋ kamu/ mo tani mo jin ta monyiṯẖ gi gwo mo isi me’d gwo gi ṯala Shi/ina ’de/ mo be.

⁹E jaŋ kamu/ mo tani mo jin gamu gwo is mo tani ki jasi Shi/ina ’de/ mo. E jaŋ kamu/ mo tani to gun c̱inu ki me’d mo mmowac̱a wac̱ mo tani ta ji gi Shi/ina ’de/ mo be.

¹⁰E jaŋ kamu/ mo tani mo jin miinu miimer mo dhali e jaŋ kamu/ mo tani mmo/o gwo jin onu is mo dhali e jaŋ kamu/ mo tani mo jin mishu shi/in mo mmodhu ka ḵwa/um bwa mo dhali e jaŋ kamu/ mo tani mo jin mishu ’twan tiya wal mo e kuku/ mo dhali e jaŋ kamu/ mo tani mo jin mishu ’twa/ luḵ ki ’twan tiya mo be.

¹¹Aris uni gwansani ’baar mo umu mo ’peni a’din ’de/ mo dhali Shi/in ṯal ’de/ mo mmopwaḵ bwa mo e uni ka ’deṯe/ ’deṯe/ mo me’d jin ona a’di bwa mo be.

¹²Haali/ me’d jin ṯala buŋgwar isa ’de/ mo tani dhali tom buŋgwar is ŋala/ wana risa dhali to gi buŋgwar is mo tani bala ’ka’da miiya ma e buŋgwara ’de/ mo tani wakani a’di ta’da Ḵrisṯẖos mo be.

¹³Haali/ ki Shi/ina ’de/ mo tani ana ’baar mo ’kokunu mo mmocuc̱ mo ki yi’de/ mo e buŋgwar isa ’de/ mo – ku Yahuuda/ dhali kuŋ Griḵi mo, walla uni gun ta c̱iŋkina/ kun yolu mo walla kun ’kon ki ’kus mo – aris uni ’baar mo ’kokunu mo mmodhu mo mmonyaḵ p̱i ’peni Shi/ina ’de/ mo be.

¹⁴Haali/ buŋgwar is mo tani a’di diki ta jasi gom en toŋ kamu/ mo hili gom mmota aris mo be.

¹⁵Waḵki/ sho’k midi ’taki o gwo mo ki: Haali/ aha/ ŋala/ tana me’d mo tani aha/ yisa icila buŋgwar is mowa, itani a/a’di midi ’taki ’cwap̱ a’di ari’ceenne/ ’peni buŋgwar is mowa?

¹⁶Dhali waḵki/ ’ce midi ’taki o gwo mo ki: Haali/ aha/ ŋala/ tana e mo tani aha/ yisa icila buŋgwar is mowa, itani a/a’di midi ’taki ’cwap̱ a’di ari’ceenne/ ’peni buŋgwar is mowa?

¹⁷Waḵki/ buŋgwar is ka ’bimpil mo midi ’taki ta e mo tani mane mo jin minu ’taki ciḵ gwo mo? Waḵki/ buŋgwar is ka ’bimpil mo midi ’taki ta ’ce mo tani mane mo jin minu ’taki jiḵa shim to mo?

¹⁸Hili me’d jin wana a’di kan mo tani Arumgimis a’di thumki hilsaŋ e buŋgwar is mo uni ’baar ka ’deṯe/ ’deṯe/ mo me’d jin kwanykina a’di uni mo be.

¹⁹Waḵki/ hilsaŋi ’baar mo mini ’koki lac̱a/ mo tani mane mo jin mina buŋgwar isi ’taki di mo?

²⁰Me’d jin wana a’di kan mo tani mo ma ’ci’cimi’th ŋala/ wana risa, ba buŋgwar is ṯal ’de/ naskina/ mo be.

²¹E midi mol gwo o gom me’d mo ki: Aha/ mina mii ta gi /eya? walla doḵ/e ’kup̱ midi o sho’k kan mo ki: Aha/ mina mii diki ta gi /e mo.

²²E gwo jin ta c̱a’ckon mo tani ’ban gi buŋgwar is mo kun simmi mii e mo mmo’ka’d is mo tani uni ta uni gom a’di mo be.

²³Dhali ’ban gi buŋgwar is gwansan gun ṯosha ana gun aṯẖi montaḵ mo tani ana tashu ki montaḵ jin caaca mo, dhali ’ban gi buŋgwar is bana gun aṯẖa she/ ki aṯẖ mo tani dhuna ana ki yos mo,

²⁴a’di jin minu mii ’koki mii ta mo gom ’ban gi buŋgwar is gun ’koki aṯẖ she/ kan mo. Hili Arumgimis a’di su’kki buŋgwar is kan mo mmmoc̱ikina a’di montaḵ jin caaca e ’ban gi buŋgwar is jin aṯẖki’d mo be

²⁵ki moŋkamu/ midi ’taki diki di ki shu mo e buŋgwar is mo, hili ki to gi buŋgwar is mo mini nyaḵ hili e ka rem ’kup̱ mo be.

²⁶Waḵki/ tom buŋgwar isa ’deŋ kamu/ ’koshu ki isa nyor mo tani aris uni ’baar mo ’koshu ki isa nyori monṯal ’de/ mo. Waḵki/ tom buŋgwar isa ’deŋ kamu/ taḵu mo tani aris uni ’baar mo ’kunya bwa mo imonṯal ’de/ mo be.

²⁷Shwane/ um ta buŋgwar is ma Ḵrisṯẖos mo dhali umi ’baar mo ta tom buŋgwar is piti ki she/ ki she/ mo be.

²⁸Dhali Arumgimis a’di ki lege’th kun tiya eya ḵaniisa mo: Uni gunn kun ta kun ṯwa/a/ mo ta uni gun dhunu ki she/ mo, dhali kuŋ ’ko’d mmota imanc̱i gwo kun onu is mo dhali kun ’kon ma p̱o/i kwara mmota imanṯor gwo mo, dhali kun ta imanmii miimer mo dhali kun ta imanwac̱a wac̱ mo dhali kun ta imanwoṯẖa/ woṯẖ mo dhali kun ta imanjiya ji mo dhali kun ta imanwal ’twan tiya ki she/ ki she/ mo be.

²⁹A/aris uni ’baar mo ta uni gun dhunu ki sheya? A/aris uni ’baar mo ta uni gun ta iman/o gwo isa? A/aris uni ’baar mo ta imanṯor gwowa? A/aris uni ’baar mo mii miimera?

³⁰A/aris uni ’baar mo bu’th to gun c̱inu ki me’d mo mmowac̱a wac̱ mowa? A/aris uni ’baar mo mishki ’twan tiya wal mowa? A/aris uni ’baar mo ta imanluḵ ’twaa?

³¹Hili tayi ki bwa jin onu ka daran du mo gom to gun c̱inu ki me’d mo kun yip̱u mii is mo. Dhali aha/ mina ṯor a’di um jin ’ce’de’da p̱o/ mo a’di jin ’boro’d ki isi ’bor gana/ mo be.