Kristus Klosan Lian 1:12-24

¹²Nunia hotu, klosan sia tuun nikar nosi Foho Saitun, fila baa kota Yerusalem. Foho nia dook nosi kota, takseer kilo ida.

¹³Toꞌo kota, sia tama baa uma mak sia nein, hotu saꞌe baa keꞌan tetu. Kristus klosan sia naran, mak neꞌe: Petrus, Yohanis Yakobus, Andreas, Filipus, Tomas, Bartolomeus, Mateus, Yakobus (Alfeus oan), Simon (ema partee Selot), no Yudas (Yakobus oan).

¹⁴Sia hotu-hotu namulak nodi neon ida. Sia namulak namutuk no Yesus inan Maria, no ina seluk sia, no feto nurak sia, no tenik Yesus alin sia.

¹⁵Baa loron ida, sia namutuk tenik, takseer ema naꞌin atus ida rua nulu. Hotu Petrus nariik dale naꞌak,

¹⁶“Mamaluk sia! Emi nanis sei hanoin Yudas mak uluk nodi ema baa kohi Yesus. Lia hotu-hotu kona baa Yudas nia, natoꞌo saa mak Maromak Kmalar Lulik naruka Naꞌi Daud nakerek kedan hori uluk iha Hakerek Moon.

¹⁷Yudas nia, itakaan ema mak serwisu namutuk no ita.”

¹⁸(Baa oras Yudas faꞌan Yesus tiꞌan, nia nola osan kadoor nia, nodi sosa rai rohan ida. Hotu, rai nia dadi baa Yudas mate fatin, tan nia monu tabarakat iha rai nia, toꞌo kabun taba no teen nakbudi sai.

¹⁹Ema dale lia nia nosi ibun baa ibun, toꞌo ema hotu-hotu iha kota Yerusalem, rona nola Yudas mamaten nia. Tan lia nia, sia nanaran rai nia nodi siakaan lia Aram naꞌak, ‘Akeldama’. Lia fuan neꞌe naꞌak ‘Rai Raa’).

²⁰Hotu Petrus dale liu tenik naꞌak, “Hori uluk, Naꞌi Daud nakerek kedan nunia iha Hakerek Kananuk naꞌak, ‘Habusik niakaan hein fatin dadi fuik, tan ema la nein tenik iha nia ona.’ Naꞌi Daud moos nakerek naꞌak, ‘Habusik niakaan serwisu nia, latan baa ema seluk.’

²¹Tan lia nia, ita musti buka ema nebee seluk Yudas. Ita buka ema mak namutuk no ita kleur tiꞌan. Nia musti tuir kre-reꞌis no Naꞌi Yesus baa fatin hotu-hotu, nahuu nosi Yohanis sarani Nia. Nia moos musti naree duꞌuk Naꞌi Yesus moris nikar nosi mate, toꞌo namaan aan saꞌe nikar baa laleꞌan.”

²³Petrus dale notu nunia, sia natama naran rua. Ida naran Matias, ida tenik naran Yusuf (nosi Yustus ema uma laran. Ema moos bolu nia, Barsabas).

²⁴Hotu sia namulak naꞌak, “Ama iha laleꞌan! Ita Boot hatene tebe-tebes ema hotu-hotu neon. Yudas monu mate nela niakaan serwisu. Tan nunia, ami husu Ita Boot hatudu baa ami nosi ema naꞌin rua neꞌe, see ida mak Ita Boot boi hola hodi seluk Yudas, nebee ami foti nia dadi baa Kristus klosan.”