Aposels 1:12-24

¹²Leye lo mete pingowo Jisas pusa tumun liti nimpe oliv pile le pe nou pe uf ili Jerusalem, wusoli fien kolo.

¹³Wem pe pe fale Jerusalem pe punwei pe winem yuwei lelpe wuso pratei lepe. Mete nange pelpe men so pepei Pita lire Jon, Jems re Andru, Filip lire Tomas, Bartolomyu re Matyu, Jems ninge liti Alfius re Saimon (metine liti linaulipe mete piti pau uf nemple pontoluwepe mete pele pire uf lele) lire Judas ninge liti James.

¹⁴Pe pire nimoure wuso kani Jisas pepe pire Maria nimou piti Jisas nire winkem pele, pe panfi nemple wem wem piti pire Ma Ili pirpei.

¹⁵Wem nele mete piti pulpope il piti Jisas wurutei (120) pau panfi nemple. Pita leilo lile lirpepe lolpepei.

¹⁶“Wingem peiki il pinu wuso Riri Teingi lirpei fale nemi liti Devit lirpei le Judas, le linuwepe mete olpe piti penglei Jisas ma fale punkom.

¹⁷Metine fei lepei nange lele Judas le metine alpe louku wusoli le metine liti lesio towa ile louku.

¹⁸Le mangou wuso Judas kapi piti lesio towa oli lepe, le liripe laise tef fei lepe wuso le luwalo la, fango lele lawo le nilim pele naro wem le lankei.

¹⁹Leye lo mete wuru pratei Jerusalem pingitei il fei pepei, le pe pinawo tulum fei lepe pire il pelpe ‘Akeldama.’ Il pal piti nange fei lepei ‘Tulum liti Teluwi.’

²⁰Wusoli Devit laptei paitei yousi piti Sam lirpei lolpepei ‘Metine fei lepe winem lele ma yawi. Nele ma ratei kolo.’ Le le nou laptei lirpei lolpepei ‘Metine nele miso luwalo lile tulum lele lesio towa lele.’

²¹Liso metine nele ma fale watafei ku, lau lirouku mirpepe mete il piti Jisas nou leilo lepe. Le le ma metine liti lirouku wem oli wem Jisas le mepi me, mau wem fei Jon kaltetei lau fale wem Ma Ili kali le yuwei.”

²³Leye lo pe pautetei mete winges nange pelnge Josep pinawo pirpolo Barsabas (nange nele pinawo Jastus) lire Matais.

²⁴Fei le pe peletei “Ili louku, ye Apa. Ye retape enke piti mete, le fei ye ma kosauku metine minele piti mete fei tepei wuso ye yotei altei ma luwalo lile tulum liti Judas watafei metine liti lingeiye lesio towa wuso Judas lusa le le tulum wuso Ma Ili lirpei lepe.”