Kon na Krin 15

1

2

3

4

5

6

7

8

9

10

11

12

13

14

15

16

17

18

19

20

21

22

¹Baka dati mi si wan tra bigi èn ferwondru marki na ini heimel. Mi si seibi engel di ben abi den seibi laste strafu. Bika nanga dati a faya atibron fu Gado kon kowru.

²Dan mi si wan sani leki wan se. A ben brenki leki grasi èn a ben moksi nanga faya. Na a syoro fu a grasi se disi, den sma ben tnapu di ben wini a meti nanga a bigi popki san gersi en. Na a meti disi abi a nen san de wan nomru. Den sma ben tnapu nanga gitara san den ben kisi fu Gado.

³Den ben e singi a singi fu Moses, a knekti fu Gado, nanga a singi fu a Lam taki: Masra Gado di abi Ala Makti, den wroko san Yu e du bigi èn den de fu ferwondru. Yu di e rigeri leki kownu abra ala folku, Yu e du sani tapu wan leti fasi èn sondro fowtu.

⁴Masra, suma no sa wani lespeki Yu? Suma no sa wani gi Yu glori? Bika na Yu wawan santa. Ala folku sa kon boigi gi Yu fu anbegi Yu, bika now ala sma si tak' Yu e du sani nanga leti.

⁵Baka dati mi si tak' den ben opo a Santa Presi fu a Santa Tenti fu Gado di de na heimel.

⁶Dan den seibi engel di ben abi den seibi strafu kmopo na ini a Santa Presi. Den ben weri krin linnen krosi san ben brenki, èn den ben tai wan gowtu banti lontu den borsu.

⁷Dan wan fu den fo libilibi sani gi iniwan fu den seibi engel wan gowtu skarki san ben furu nanga a atibron fu Gado di e libi fu têgo èn ala ten.

⁸Ne a Santa Presi kon furu nanga a smoko fu a glori nanga a makti fu Gado. No wan sma ben man go na ini a Santa Presi, solanga den seibi strafu fu den seibi engel no ben klari.